ZO NUN ZE MAWI VANGIN

Ṭum khat chu Aizawl city bus-ah ka chuang lut ve râwih a. Rei lo teah kawngkhar bula ṭhu hmeichhia kum naupang leh hmel fel tak chuan a ṭhutna min kian nghal a, "Ka pu, ka ṭhutnaah sawn va ṭhu rawh," min rawn ti a. Ka ṭan chuan inthlahrung leh inthiam lo tak chunga din reng kha tih chi a ni lo va, ṭhutna min kenna hmunah chuan, “Ka lawm e aw,’ ti chungin ka va ṭhu ta a.

Ka ṭhut hnu chuan ka ngaihtuah ta a. Ka hmuh ngai loh, min hre ngai loin ṭhutna min kian ta mai chu rilrua lawm em em chungin mak ka ti hle mai a. Ka ngaihtuah chhuak ta a, Zo nun ze mawi vang a lo ni a. Ṭhutna min kiantu, chu nula hmel fel tak chu mi zingah keimah vangin hrehawm takin va ding mah se, a hmel chu ka va en a, hlim hmel em em hi a pu a. A ṭawngkam ri nêlawm takte chu ka va hriatpui phak a, ka tana thil ṭha a tih avang chuan a hma aiin a hmel chu ṭha ta riauvin ka va hmu a. Ṭhalaite chuan chutiang nun mawi kengtute chu ngaisang thiam se, kan hnam nun timawitu an lo ni ang. Chutiang ang mite hmelah chuan Zo nun ze mawi chu kan hmu ṭhin.

Bus chhungah pawh Zoram thar nun a lo thleng ta a, lawmthu kan inhrilh tawn mawlh mawlh ta mai. Chhungkhat laina ṭhian ṭhate induhsakna leh inhmangaihna khaikhawmtu, phût lêt nei lo thlâwmna nun, thawhrimna leh huaisenna nena mi dangte ṭanpuitu, Zo nun chuan kan zingah hian a ze mawi tak chu hmuh theihin lo vul chhuahtir zel se, lawmthu inhrilh tawn zel ang u. “Aw Zoram, ka hmangaih che, i tan chauh lo ni zel se,” i ti zel ang u.

Khawvela hnam tin hian Zo nun ze mawi hi an entawn hunah an hnam nun timawitua an hman hunah chuan Zo nun hian khawvel hi a hneh dawn a lo ni reng mai.

India ram leh khawvel ram danga awm, hnam dangte pawhin Zo nun ze mawi avangin Mizoramah hian lo kal an châk ṭhin. Zo fate, khawvel ram danga awmte pawhin kan hnam nun mawi avangin Zoram hi an rawn ngai ngawih ngawih ṭhin. Zo fate chuan khawi hmunah pawh awm ila, kan bula awm ṭanpui ngaite tan Zo nun ze mawi hi i lantir zel ang u.

- H. Neihchungnunga, Durtlang