NEIHLOH KHAW SAWN TUR LEH PEACE CITY

Tlem lai khan Lunglei pana ka zinna MST bus-ah Neihloh khaw nu pakhat nen kan ṭhu dun a. Kan titina aṭangin an bialtu MLA Pu Lalduhoma, Chief Minister hmalaknanain an khaw hmun sawn a nih tur thu ka hria a. "Kan khaw ram chhungah tho a ni ang," a tih chuan, aw Thenzawlah te in sawn ula a va tha zawk awm ve, in veng ram nei thei thoin, CM chu sawipui leh ula, ka han ti ngawt a.

Kan CM zahawm tak hian a bial chhung khaw him lo tura lang hetianga ngaihsaka hma a lakpui hi Neihloh khaw mite tan chuan a lawmawm viau ang. Chutihlaiin, cheng nuai 15 chu tlema lo nei ve sa tan lo chuan a beitham viau mai. Neihloh khua hi chhungkaw 77 lai an ni a, hetiang zat zat sawrkarin pawisa a ruahmansak hi chu a ṭha ngawt mai.

Kan CM hmalakna lian tham ang reng tak chu Thenzawl Peace City tura a ruahman hi a ni a, ṭha takin kal chho turah ngai ila. Tahrik ni 7th May, 2026 Vanglaini-ah Neihloh khaw sawn chhuah tur thu a lo chhuak a, rilruah a lo thar ve leh ta a. Kan CM hian Thenzawl Peace City tur hma a lak mekah hian Neihloh veng siam mai se la, Thenzawl khua pawhin tlemin a lo len phah hlek bawk ang a. Anmahni tan pawh thingtlang khaw tê ve lehzuala awm ai chuan khawpui zawk chu ziaawmna chin te pawh a awm deuh ngei awm si a. Chutihlaiin, tuna Neihloh khaw ram hi tuna la awmte hian an khaw ramah nei zui ve zel se, tih te ka lo ngaihtuah mai mai a ni.

Hmânah Lunglei bul khaw pakhat leimin leh min belh zel hlauhthawn thuah sawrkar (DC) hmalaknain an khua sawn a lo ni tawh a. Anni pawh kha Lunglei khawpui chhungah an khaw hming puin vengthar pakhat siam sak belh mai se la, Lunglei khuain a lo len phah ang a, anni pawh khawpui zawk deuh mi niin nakin zelah an tu leh fate tan a ṭha zawk tur a nia, tih ka lo ngaihtuah tawh a ni. Tichuan, he khua hi an khawbul kawngpui dung, vai BRTF hote nena inchen pawlhna hmunah an insuan chho ta a; a ṭha tho nâin, vaihote nena inchen chilh a, veng khata khawsak ho hrim hrim pawh kha thil fuh tak chu a ni lo deuhin ka hria.

Rambuai lai, 1967-68 chho vel khan India sipaite khan MNF sipaiho an beihna remchanna leh MNF ho dan chêpna atan khua min sâwi khawm kha a ni a. A lan mawi nan, People Protected Village (PPV) an ti a ni. Mahni khua ṭheuha intodelh ṭhin, kan village economy kha min tihchhiatsak a. Chutihlaiin, nikhua a lo rei a, khang PPV eng emaw zat chu khawpui, district headquarters an lo ni ta a ni. A tirah hrehawm mah se, sâwi khawm an nihna khuaa let lehte ai chuan khawpui zawk, zirna, damdawi in, electricity, supply, etc. ah te an lo awlsam ta zawk a, dinhmun ṭha zawkah kan lo awm ta a ni.

Lawngtlai lam mi ka ni a, kum 32 kal taah khan kan hotu district council chief executive member-te leh executive member ṭhenkhatte kha hmasawnna turin 'Development Village Grouping' policy siam u la, Central hotute hnenah thlen u la, mipuiteah awareness campaign nei u la, Lai district hi khaw sawm velah min group u la, nasa takin hma kan sawn ang, ka ti a. Khaw tereuhtê teah kan awm a, kan khaw êng hmuh a zîm a, mite mamawh kan duh ve vek si a, ram, mipui leh nangni politician-te tan a ṭha zawk vek ang, ka ti a ni.

Khaw têtaktê têa kan awm hian khawpui mamawh zawng zawng, tui, eng, damdawi in, kawng ṭha, civil supply, etc kan mamawh vek si a, Mizoram sawrkar tan pawh heng neuh neuh hmasawnna atana pawisa sen a lo tlem zawk ang a. Khaw lian zawkah chuan zirna leh thil dang kawng hrangah economic zawk, ṭha zawkin kan awm thei ang. Central sawrkarah thlen u la, ṭha an ti viau ang ka ti a. Mahse, tumahin an ngaihsak lem lo.

Aw le, Neihloh khaw sawn tur chungchangah kei a engamahin min 'concern' lo mah se la, kan ram chhunga thil awm mek a ni a, eng eng emaw ka han sawi (ziak) ta nual a. Neihloh khua leh kan CM zahawm tak pawi kan sawi em lo ang chu maw.

- Rev. Lalbiaksanga Chinzah