INSAWISÊL CHING MIZOTE

China-ho zia nge, Kawlho zia nge, British-ho zia nge, India vaiho zia nge, tu hnam zia ber nge kan lak chhawn? Nge, a tir aṭanga kan hnam zia ve hrim hrim zawk? Heti em ema inrêl leh insawisêl, insawichhiat, insawi bawrhban kan ching mai hi le? Kristian 87.16% awmna tiin hahipin kan sawi uar hle thin si .

Upahovin, ”Mizo hmeichhe pahnih awm dun an phun ser ser tawh chuan tu emaw rêl an nei ngei ngei a, mipa awm khawm an nuih dar dar tawh chuan zahmawh an sawi ngei ngei,” an lo timathlawn lovin, mi rêl leh sawichhiat, sawisêl hi kan chaw tui ber a ni chho mek zel niin a lang.

Exodus 23:1-ah, "Thuthang dik lo chu i sawi chhâwng mai mai tur a ni lo: hretu fel lo tak nihna turin mi suaksual zîngah chuan i kut chu telh ve suh,” tih a ni! Pathian thu hi chhiarin sawi châmchî ṭhin mah ila, a taka nunpui si loh chuan awmzia pakhatmah a awm lo.

Mizo Union din kum 1946, April 9 aṭanga kum 80 chhung zawng khan Mizoramah political party rintlak, dâwt tel lo political party pakhatmah hmuh tur an la awm hauh lo nia! Lengpui ram chhunga IAF ram lei chungchanga dâwt thu puarpawlêng leh rinthua huai tak taka political party tinte an han inchirhtheha an han insaipuk a, an han inhâm puar vel kha chu a hneawm tak zet a ni. Political advantage lak tuma lo buai chiam chiam hi Zoram mipui tan ninawm leh hnawmhne mai a ni tih hriat a hun hle.

Kan ram hruaitute hian dikna, rinawmna, taimakna hi vawng nung tlat reng se'ng chuan ṭhenawm state changkang tak tak tawhte ang hian raltiang ram kan kai ve tawh tur. An sawrkar laia an tih theih reng pawh ti chuang lovin, an sawrkar loh veleh mi dang sawrkarah an ngaimawh thar leh em em zel ṭhinte hi thil mak tak a ni.

Juda Talmud chuan ṭawng sualin emaw, insawisêl hian mi pathum a tichhe thei, “A sawitu, ngaithlatu leh a sawia te chhiatna a ni,” a ti. Juda dan chuan insawisêl a khap a, sawisêlna thawm pawh ngaihthlak a khap a, mi fak pawh a phal lo; chungte chu ngaithla lo turin a ti bawk. Mizote erawhin mi fak thâwm aiin mi rêl thawm leh sawisêl thawm rîvâ hriat leh ngaihthlak nuam kan ti zawk ṭhin. Fak tlak leh chawimawi tlakte chawimawia fak hi kan hreh ṭhin niin a lang; kan fak chhunte lah kan fak uchuak thei hle a; a let leh beisei nei rânin kan fak tlawr thiam hle ṭhin.

Kohhran leh NGO hrang hrangte pawh insawisêl, indeusawh, innghirngho kan ching. Kohhran kehdarh, pawl kehdarh leh inṭhen darh pheng phungte lah hmuh tur bo hek suh. Ṭawngkam ṭha erawh kan ui lovin kan sakhawmi hmel em em. Pathian rawngbawl awm tak kohhran rawngbawl ni zawk si te, Pathian bèl si lova kohhran bèl tlat zawk te, Pathian rawngbawl duh si lova nihna ringawt ãtchilh te, nupui pasal fanau, chhingkua hmangaiha ngaihsak chuang si lova mi dang ngaihsaka hmangaih daih ṭhin te, mahni eizawnna hna ber ngai pawimawh si lova kohhran leh YMA hnatlang leh thil dang ngai pawimawh zawk tlatte leh chi hrang hrang sawi tur a tam hle mai!

Hawh u, Zofa zawng zawngte u, Pathian hnenah intulutin, hawi kîr leh ila, kan chìn ṭha lo insawiselna leh kan sualte hi sim tlang tawh teh ang u.

- Dr. C. Lalrampana