DARKAR CHANVE REI (lo) BER!

Ka mitin sana lian ka veilam bang sanga an dah chu ka melh ṭawk ṭawk a. Nurse a lo kal vat a, “Eng nge ni ta?” a ti a. Kei chuan, “Dar 10 a ri dawn tawh em tih ka en a,” ka ti a. “Eng ngati nge?” a tih chuan, “Ka chhungte an lo lut thei dawn a ni lo’m ni?” ka ti a. “Ka pi, tunah hian zan a ni tawh a, vawiin chhun lamah vawi hnih an lo kal tawh alawm,” tia min chhan chuan hun eng emaw chen ka tibo tih ka inhrethiam thei a!

He thil thlen hun hi May ni 5 zan a ni a, kei chu May ni 4 zan dar 6 vel khan ka kal dinglam paih turin Ebenezer Hospital inzaina pindanah ka lut kha a ni a. Chuta ṭanga darkar 28 vel chu harh miah loh leh harh chian lohnan hun ka hmang a lo ni. HDU a awm chhunga chawhma lam inhmuh theih hun kha dar 10:00 aṭanga 10:30 a ni tih kha eng emaw takin ka lo hria a ni mahna, dar 10 ka lo melh ve ngawt chhan kha!

HDU-ah chuan damlo 5 kan awm a, ka luh tukah pakhatin van kohna min chhansan a, a tukah pakhat a lo lut leh a, kan seat chu a full reng mai. Zan 4 leh ni 3 ka awm chhung khan Pathian zarah min zaina kaihhnawih piah lam engmah harsatna ka nei lem lo. Rilru a fim a, ngaihtuahna ka kawm a, hun ka chhiar a ni ber (min zaitu ka daktawr khan min zai hma khan zan 4 vel HDU-ah i awm ve ang a, kha a tih lawk avangin zan 4-na ka nghakhlel hle kha a ni a).

HDU-ah chuan kan dam pauh leh muthilh a har a ni mai! Chuvang chuan sana melh hi a awl em em a. Ka’n maimitchhing a, rei tawk fang muhil deuh tawh nia ka inngaiha sana kan melh te hian minute 20 emaw chiahte kha a lo kal chauh ṭhin. Hetianga hun a kal muan em em reng lai hian chawhma leh chawhnuah hian hun hian kal muan lehzual bik hun lai a nei a, chu chu zing dar 9:30 leh dar 10:00 inkar leh chawhnu dar 3:30 leh dar 4: 00 inkar kha a ni. Harsa ti angreng takin sana lam ka’n thlek phei a, 9:30am a lo kawh va tawh kha chuan a hlimawm duh hle. Rei tawk lehlam hawiin hun khawhral nan ka maimitchhing a, dar 10 rik hun awm vela mena chhungte hmel hmuh beiseiin. Ka’n meng a, dar 9:40 chauh a lo la ni! Kha sana kha a va muang tehlul em… hetiang chiah hi chawhnu dar 3:30 aṭanga dar 4:00 inkara HDU sana muan dan chu zuk ni ã!

Tichuan, chawhma lamah dar 10 a ri har em em a, chawhnu lamah dar 4 a ri thei lawk lo bawk a. Chutah a’n ri ta chêng a, a dawt minute 30 kha a rei lo leh em em ta mai a nih chu! Kan chhung leh khat leh lainate an lo lut a, kan inen zuai hman chauh emaw tih laiin, “Inkan hun khar ang aw…” an rawn ti leh nghal zat mai kha niin ka hria. Zan mut theih loh lai leh inkan hun hma darkar chanve a la awma sana ban kal muang em em mai kha a invai ta zawt zawt mai ni hian a hriat a, HDU chhung, tihtur awm lo zeta mu ringawt tan chuan dar 10:00-10:30am leh 4:00-4:30pm kha sana kal chak ber lai, darkar chanve rei loh ber lai a ni ka ti lo thei lo!

He ka thil tawnin min ngaihtuah chhuahtir tak chu, hun hi Siamtuin hun a ruat tirh ata kha a la danglam ngai lo va, mi tinin hun kan neih pawh hi a inang vek reng tih leh, chu hun awmze neihtirtu mihringte hi a danglam zawk ṭhin chu kan ni tih hi a ni.

Kan thiltih mek leh tihtur azirte, kan awmna hmun leh kan awmpuite azirte, kan nghahhlelh thil thleng tur a awm leh awm loh azirte, kan huphurh thil hmachhawn ngai si kan neih leh neih loh azirte hian mi tin tan hian hun hi a reiin a rei lo mai zawk a lo ni. “Ral tawh mai se lei ninawm hi,” tih hla phuahtu tan chuan a nghahhlelh vanram thleng tur khan hun kha kal muang a ti em em a, “Zankhua ral mai lo la, ding rih rawh,” tih hla phuahtu tan erawh chuan zing khawvar kha a hmangaih tak nena an inṭhen a ngaih hun a nih avangin hun kha kal chak a ti em em thung si!

Heti taka kan thil tawn leh kan hun hmanpuite avanga hunin awmzia lo nei ta a nih thu hi HDU a awm kher lova hre tawh tam tak in awm ngei ang. Kei erawh chu Pathianin hetiang ngaihtuahna nei tur hian HDU min luhpui a, mahni hnaa buai reng renga tei vel ṭhin kha hun thawl min pe hi a lo ni a. Ka hun kal tawh ka ngaihtuah let a, ‘Keimah avanga hun kal chak ti hi nge tam ang kal muang ti hi’ tihte ka inchhut let a. Ka hun hman titawitu tute nge ni ang aw tihte nen lam ngaihtuahna hun thawl ka nei bawk a.

Harsatna leh rilru hahna nasa tak nei, hun kal muang ti ngawih ngawih hi ka lo va kal pel liam tam tawh awm tak em tihte ka ngaihtuah tel a.

Hetia mahni buai buaia mahni ṭha tih zawng leh nuam tih zawng uma kan tlan suau suau lai, hunin min daih ngang lo nia kan hriat laite hian ṭhenkhat chu chau leh nguiin, beisei tur nei lo nia inngaiin hunbi an chhiar a, kal muang ti em emin kawla ni chhuak an chhiar si.

Tichuan, ‘Ni khatah, mi pakhat tan tal, a hun engti kawng emaw tala tirei lotu ni turin ṭan ka lak a ngai a ni’ tiin rilru ka siam ta sauh sauh a.

- Dikteii Hnamte
(From cabin no 611, Ebenezer Hospital)