THE BIBLE SAYS SO!

Kan Pathian Thuthlunga hun ropui tak pakhat Judate Penticost Ni, keini Kristiantena Thlarau Thianghlim thlen nî kan tih chu tun Sandei ni 24 nî hi a lo ni ta. Kan Pathian–Pa leh Fapa leh Thlarau Thianghlim chuan (Gen 1:1,2; Johana 1:1; Kol 1:16) lei leh vân an siam a. Anmahni hi Pathian Pakhat chu an ni a, lei leh van siamtu Pathian Pakhata-te an ni.Mi ṭhenkhate chuan Pa A awma, Fapa A awma, Thlarau Thianghlim A awm bawk chuan, heng Mî (person) pathumte hi Pathian nihna an neih bawk si chuan, Pathian pathum an awm tihna a va ni ve!? An ti thin!. Ni lo ve, kan Bible-in Pathian a sawi hi chu Pa leh Fapa Thlarau Thianghlim* an ni. Bible thu-ah chuan Pa leh Fapa ringawt kha Pathian an ni thei lo. Chutiangin Fapa leh Thlarau Thianghlim ringawt kha Pathian an ni thei bawk lo. Bible-in Pathian a sawi chu Pa a ni a, Fapa a ni a, Thlarau Thianghlim an ni. Pathum hi Pakhat an ni. Hetiang hi Bible-in Pa leh Fapa leh Thlarau Thianghlim Pathian pakhat a sawi chu a ni.Pathian Pathianna sawi hi chuan leiṭawng ni lova Van lam ṭawng leh vân lam thil ngaihtuah dân kha hman a ngai!

Kan Lalpa tisa put lai nîah khan vawi khat chu Judahote khan "Nang kum sawmnga pawh la ni lo pui che!" an ti ngawt mai a,kan Lalpa chuan "Abrahama awm hma pawhin ka awm !" A ti daih mai. Mizo tawng chuan a grammar dik leh dik loh a sawi a har. Mahse English-ah chuan a chiang si. Kan Lalpa hian lei lam English Grammar A hmang lo, "Abrahama awm hma pawhin ka awm" A ti (Johana 8:58). Chu chu " Before Abraham was I Am” tih a ni a. Grammar dan chuan present tense leh past tense te hi sentence khatah a hman pawlh theih loh! Khawvel English Grammar dâna kan ekzam chuan Lal Isua ṭawng hi a grammar a dik lo kan ti ang. Abraham chu hmanah hmanah Pathianin A ko tawh (Gen 12:1). Kan Lalpa erawh chu BC 4 leka piang A ni si. Lal Isua khan khawvel ṭawng grammar-ah chuan A tisual, mahse Eternal Grammar-ah chuan A dik si! Chatuan mî a ni a, awm loh lai nei lo A nih avangin “A tan past tense a awm ve lo”. Mosian Pathian hming a zawh khan "I Am that I Am!" tiin Pathian chuan ENG LAI PAWHA AWM RENGA A NIHZIA sawiin Pathian rintlak A nihzia A hrilh a nih kha (Exod 3:14). Mosia khan man chiang tak maw!! Keini pawh hian Pathian Thu ziaktuten Pa te, Fapa te, Thlarau Thianghlim te hi Pathian Pakhat an ni tia an sawi chuan, kan mihring tawng dan grammar mil lo mahse Pathianin A sawi avangin î hê lovin, lungawi takin pawm hle hle mai tur a ni. Kan Lal Isuan lei a rawng A bawl lai khan nupui mak a thian leh thian loh an zawt a, a thian lohzia sawiin mipa leh hmeichhia inneia te kha mihring pahnih ni tawh loin tisa pumkhat an ni tawh zawk a ni tiin A chhang.

A inneiate kha engzat nge an nih han chhiar la. Lei hisapah chuan mihring pahnih i ti lo thei lo. Pathian erawh chuan pakhat A ti si. Chutiang chuan Pathian sawi dan kha chiang takin a awm nalh a, mihring chhiar dan nen chuan a inang lo. Chutiang chu a ni Pa leh Fapa leh Thlarau Thiang-hlimte PAKHAT an nihna chu.

Pathian pakhata Pa chuan keini misualte chhandamna hna thawk turin A Fapa Lal Isua A rawn tir a. Lal Isuan krossa thia tho lehin chhandamna hna A thawk zo tawh. Chu A hna thawh zawh tawh chu lei mihringte nuna hmang chhuak turin Pathian Pakhat zinga Thlarau Thianghlim chu Penticost nî, May ni 24 hian Jerusalem khawpuiah A lo thleng thla ta a. Tun hma khan Thlarau Thianghlima baptisma an chan tur thu leh Thlarau Thianghlimin chatuana A luah tur thu hi kan Lalpa leh Baptistu Johana khan an sawi tawh a (Math 3:11; Johana 14:15-17). Penticost ni hian Thlarauva baptisma an chang a, anmahniah chuan Pathian Thlarau chu A lo lut a, chatuanin A awm tawh dawn a ni. He nî a thil thleng hi a va ropui em!

Thlarau Thianghlim hnathawh tur ber chu Lal Isua thihna leh thawhlehna hmanga mihringte chatuana nunna min neihtira Krista nun chu keimahnia lo pung telh telh tura hnathawh a ni. Lal Isua chu Thlarau Thianghlimin A chawimawi thin avangin Thlaraua khat leh hruaia awm ringtu chuan Lal Isua hi an hmangaihin an ngaina thin a, A thu hi sawi lovin leh ngaithla lovin an awm thei lo thin. Thlaraua khat ringtu chu Lal Isuain an khat thin.Thlarau chu Lal Isua tana thawktu a nih avangin (Johana 16:12-15) a rilru leh a kâ luahtu chu Lal Isua chanchin a ni thin. Vawiinah hian Lal Isuain i khat ang u, chu chu thlarau lawm zawng a ni e.

- F Lal Thanzuala. 9436141242