Sawrkar ṭha ber khûmtu

Hriat theih chinah kum 17 zet kal ta, 2008 kum tawp atanga 2013 kum tawp thleng Congress sawrkar kha a la tha berin a lang, mahse, ZPM sawrkar hian a khum dawn.

Kum 2008 sawrkarah khan Congress khan MLA 32 zet neiin record an siam a, mipuiin sawiselna nei lem lovin an rorel danah an lungawi a niang, kum 2013 kum tawp inthlanah MLA 2 neih belhin, MLA 34 neiin anmahni record an rawn khum a nih kha.

Kum 2008 an sawrkar hma khan NLUP tha mi, in tinah cheng nuai 1 an tiam a, khatihlai nuai 1 kha tunlai nuai 1 ai chuan la hlu tak a ni.

"Kan sawrkar tukah kan sem dawn" ti si khan an sem lawk thei lo va. Khatihlaia NLUP Implementing Board Chairman Pu R. Selthuama, MLA phei kha chu a mangang hman viau a niang, Lal Isua lo kal leh hun tur chu Pa chauhin a hria, an tih ang mai khan NLUP sem hun tur kha, "Pa chauhin a hria" ti khan House-ah a sawi hial a nih kha.

Mithiam leh experience nei Pu P.L. Thanga, IAS te kha Implementing Board Vice Chairman-ah dahin kawng an han dap ngial hnuah, sawrkar kum khat leh chanve lai kal hnu July ni 15, 2010-ah The Cabinet Committee on Economic Affairs (CCEA) khan NLUP pawisa a rawn sanction ta chauh a, kum hnih an sawrkar pumhlum hnuah an sem ṭan ve ta chauh a nih kha. Chupawh an vanneih asiamin central lamah Congress kaihruai UPA a sawrkar hlauh a.

ZPM sawrkar hian khatiang kha nei ve lo mah se, kum hnih an sawrkar hmain an thutiam angin kut hnathawktute thlai thar an leisak thei a, a thawm lian ber sawthing pawh quintal nuai 3 leh sing 3 chuang leiin a man pawh an pe tla vek tawh. Sawrkar hnathawk hlawh a hma sawrkar ang lo takin a hunah tak an pe thei a. Administrative reforms lamah aikal, tihphung pangngaia kan neih tawh an titawp bawk.

ZPM kum hnih chhung sawrkar thil tih hi chipchiarin sawi vek lo mai ila. Heng kan sawi tak point tlemtê vang ngawt pawh hian kum hnih lek sawrkar la kal chauh mah se, hun kal tawha sawrkar ṭhaa mipuite lo ngaih pawh kha a khûm sa nghal var var a ni.

- Hruaia Kawlni