Chukchu Party

Tun hnaia India ram politics nasa nghawng dawttu chu ṭhalai (Gen Z) rual bawh em em, social media lama tun hnai tea lo lar Cockroach Janata Party tih hi a ni. India ram politics a nghawng a, sorkar a tibuai phak hial.

He thil thar hi politician-in an ngaimawh a, a kal zel dan tur an inrinsiak ta luai luai a, a buaithlak duh khawp dawn a ni, sorkar tan pawh. A chhan chu ni li chhung lekin Instagram lamah mi maktaduai sarih zetin Cockroach Janata Party hi an zawm (follow) tawh tlat hi a ni.

A ṭobul

May 15-ah mai khan Supreme Court-ah Chief Justice Surya Kant chuan ṭhalai ṭhenkhat chu 'chukchu' (cockroach) ang mai an nih thu sawiin, thatchhia, hna thawh mumal nei si lo, social media lama mi sawisel vak vak, a ṭhen chu journalist-te leh RTI activist ni ta mai mai angin a chhuah a ni.

He thu hian dem a hlawh tak zet a, ṭhalaite’n an ei lo hle. A tuk mai, May 16-ah tun hmaa AAP social media lo enkawl tawhtu Abhijeet Dipke chuan tihelna nen social media hmangin a bei let ta a. X (tun hmaa Twitter an tih ṭhin kha) lamah a ṭuan a, ṭhalai "thatchhia leh chukchu’ tan aw râwl chhuahna tur X a awm thu a sawi ta a, a rawn che hit cher cher hle a ni.

May 16-ah Cockroach Janata Party hmingin website a siam a, Instagram account an nei zui bawk a. Hengah hian sorkar ding lai tihelna, a bikin NDA/BJP chet dan ngeiawm leh nuihzatthlak taka beihna, sorkar tana chaw tak khûka khûkpui hluai chi ni si lo a rawn tilang ta. Hei hi sorkar tan ngawihsan rem si lo, beih let harsa tak si a ni a. An website-ah sorkar tihelna thu a dah khawm a, a thu chheh pawh Gen Z hîp takin a dah a ni.

A nghawng

Rin phak bakin X lamah an lâr a, sawi an hlawh nghal em em a ni. Tichuan le, an website a lûn ta nghal mep mep a, an Instagram phei chu mi maktaduai sarih zetin an follow ta.

Chheile, tunah zet chuan le, an thu post apiang ṭhalaite’n ram pumah an pu darh a, an che vel hi sorkar tan ngaimawh tham a tling ta a lo ni.

Mipui nawlpui ngaihven tak tak a nih hmain ṭhalai ho tualchaina social media lamah chuan CJP hi an ruling ta deuh der mai a. NDA-in media lian apiang an lamṭanga an siamna khawvelah CJP hian BJP sorkar thunun ve loh social media hmang ṭangkaiin an duhthâlin NDA sorkar an bei thei a; fiamthu nen dik lo nia an hriat an phawrhsak chho mek a ni tunlai hian. NDA sorkar sahuat an khawih ta a ni ber e, a tih theih ta a ni.

Mizoram lamah

Mizoramah ZPM an sorkar mek a, an insiamṭhat loh chuan social media lama party worker râk narân ni lo hoin an beih hun a la thleng ve ang.

CM emaw, CM lo emaw, minister leh ‘ter lo lam a ni lo, Gen Z rualin an beih chat tawh chu an talbuai ngei ngei a ni ber a, party worker lamin Facebook tih vela an beih hi chu engmah a ni lo thung. ZPM ho an fimkhur a ngai a, an tan warning ṭha a ni.

Tunah chuan AMC inthlan en chuan ZPM hi an boruak a la ṭha a, nimahsela, an ṭawngkam fimkhur se. Kan CM ngei pawh thu uar lutuk suh se, nakin lawkah an thusawi hi social media kaltlangin chukchu-ah a chang ve thei reng a ni.

MNF hian hei hi an hre chiang hle tawh turah ngai ila. Kum 2023 inthlan dawn khan social media-ah mipuiin an au thla hmasa a, a hnuah inthlan tak takah an tla zui ta a; chukchu mai an ni zui ta a ni. MNF hian AMC inthlan dawnah an rawng huai nia ngaihte an rawn sêr a, MNF star campaigner ho an ṭawng chhuah tam poh leh social media lamah ngei an hlawh a, an bei let nasa ting a ni mai.

Cockroach Janata Party lo lian zel ang hi he Mizoramah hian a thleng thei a; ZPM hi an fimkhur chuan an ṭhatpui ang a, an fimkhur loh chuan MNF ang tho an ni ang. Tuna ZPM ho hian mipui duh zawng ngaithla lova an theih tak emaw ti a, "Hun rei tak chhung ZNP/PC aṭangin ka rinawm tawh a, ka candidate ve tawh dawn," tih mentality nen kum 2028 inthlanpui hi hmachhawn an tum chuan, Gen Z rual ṭhangthar hian mi thar, changkang, lehkhathiam, tunlai leh hawizau an duh a, tuna an MLA leh minister ṭhenkhat pawh drop hreh lo se. Chuti lo chuan ZPM hi chukchu hian a ei ral thei. An insiam rem thiam chuan Cockroach Janata Party ang maia ṭhang duang pawh an ni ve thei tho bawk a ni.

- James VL Vuite