DAMDAWI ZUARHO NUAR
All India Organisation of Chemists & Druggists (AIOCD) chuan All India Strike neih tura ruahmanna a siam angin May 20, 2026-ah India ram pumpuiah damdawi zuarte’n nawrh an huaihawt a, dawrte an khar. Mizorama damdawi zuarte pawhin an thlawp a, nilenga an dawrte khar vek turin Mizoram Chemists & Druggists Association (MCDA) chuan thuchhuah a siam. Strike vanga an buai loh nan mamawh tur damdawite chu lei lâwk turin mipui an ngen bawk.
AIOCD-in India ram pumah damdawi dawr khar an tihna chhan lian deuh deuh pathum a awm:
1. Online damdawi zawrh an dodal: Online pharmacy lian–Tata 1mg, PharmEasy, Netmeds, Amazon Pharmacy te hian damdawi an zuar nasa a. AIOCD chuan prescription enfiah lovin damdawi an pe ṭhin niin an sawi. Prescription thuhmun vawi tam tak hman a ni ṭhin. AI hmanga prescription lem siam chhuah hmangin antibiotic leh ruih theih damdawi an pe thei. COVID laia home delivery phalna G.S.R. 817(E) kha tun thlengin an la hmang sual.
2. Discount an uar lutuk, ‘Predatory Pricing’ a tam lutuk. Corporate pharmacy liante’n 20-30% discount an pe a, sawrkarin NPPA/DPCO hnuaia bithliah a siam tawh sa ai pawhin a tlawm zawk. Damdawi dawr tenaute tan inel a har a, mi maktaduai 5 vel eizawnna a nghawng thei an ti.
3. Sawrkarin dan siam lo: Drugs & Cosmetics Act, 1940-ah online zawrhna dan a la awm lo. Delhi High Court-in dan siam tura a tih tawh hnuah pawh sawrkar a la chechang lo.
AIOCD hnuaia damdawi dawr nuai 12.5 vel India ram pumah khar vek turin an ti a. Emergency damdawi, sawrkar damdawi in leh emergency pharmacy erawh hawn a ni.
Assam Drug Dealers Association chuan damlovin an tuar an hlauh avangin strike an zawm ve lo. An thil phût ber chu, online damdawi zawrhna dan khauh zawk siam rawh se, discount mumal lo khap rawh se, COVID laia phalna pek kha titawp rawh se, tihte a ni.
An nawrh chhante khi kan thlir chuan, mipui hamṭhatna hmuh mek tihtawp tumna a ang. Discount % an dodal phei hi chu mipui tan a pawi lehzual. Anni pawhin discount % ṭha tawk siam ve ta mai se la a ṭha tlang ni mai tur. Prescription hman nawn pawh damlo tan a ṭulna a awm tlat ṭhin.
Online pharmacy-te hian doctor dik tak tho duty an nei a, AI hmanga prescription siam chawp chu an hre hrang tur a ni law'm ni? Antibiotic pawh doctor duty-in an pe mai ṭhin. Online marketing titawp dawn ta se, online sumdawnna dang pawh an tihtawp a ngai ang. Online damdawi dawr lian heng Tata 1mg, PharmEasy, Netmeds, Amazon Pharmacy te ang hian offline pharmacy-ho hian mipui hamthatna ngaihtuahin discount pe ṭha ve mai se a ṭha mai lawm ni?
An nuar hrim hrim hi chu an dikna chanvo a ni a, kan sawisel chi a ni lo. Mahse, mipui hamthatna tam tak a kiam theih avangin thil awm dan ka han tarlang ve mai chauh a ni e.
-Dr. C. Lalrampana