Metir list târ chhuah leh chhuah loh a ni ber lo

Mizoram Board of School Education (MBSE) hnuaia HSLC leh HSSLC result–merit list, division leh top ten te chu a vawi khat nan sawrkar chuan kum 2026 result booklet-ah a tar chhuak tel ta lo a. Hei hi by-heart system leh naupangte’n mark hmuh ṭhat ringawt tuma lehkha an zir ṭhin tihtawp an tumna a nih hmel a. By-heart vak a, exam hall-a va ziah chhuah leh tawp, result (division) ṭha neih hi kan tum ber a ni a, sikul ṭha kan tehna pawh result ṭhat danah a ni tlangpui. A dikna chen chu a awm mah se, quality-ah min siam em tih hi a pawimawh zawk chu a ni lo’ng maw.

An thil tum by-heart system a bo nan tih chu a ṭha viau, mahse, pawl XI leh college an luh dawna an mark hmanga seat/admission an zawn leh tho si chuan awmzia a va nei tam awm lo ve. Zirna in ṭhaa luh kan duh ṭheuh si chuan naupang khan mark hmu sang tura a zir vak (by-heart) mai loh nâkah; chuvangin, by-heart system a bo nan tih hi chu an dap ṭhelh ve deuh chuan ka hria.

Board result merit list tar chhuah leh tar chhuah loh ringawt hian a hranpa tak chuan nghawng a neih thui viau ka ring lo, a hnu lama kan kalpui danin a zir a ngai. Admission hmuh nan school leh college hian an mark hmuh ringawt aṭanga teh lovin, entrance test emawte neihpui se, an tihṭhat dan azira lak mai khan result nei ṭha vak lo tan pawh a beisei san ngam ve ang a, by-heart-a mark hmuh ṭhat ringawt tuma zir lovin, an zirlai hriatthiam tak tak tumna neiin an zir zawk ang a. Chu chuan hriatna nghet a tuh sak ang a, an zir leh zelnaah pawh a pui viau ang.

Ka hriat sual loh chuan, a college ang zawng chuan Pachhunga University College (PUC) chiah hian entrance test (CUET & PUCET) an kalpui a. A ṭha khawp mai, a fair bawk a. Av ang chu, result nei ṭha vak lo, thiam tho si tan kawng a awm ve dawn. Chutianga kan hrut rual theih hunah chuan by-heart system chu a bo hret hret thei ang.

By-heart ngai chu a awm tak meuh mai, tuna kan kal dan system tiziaawm tur chuan elementary level aṭanga kan insiam ṭhat a ngai. A lêr aṭanga ṭhuai kan tum leh ringawt ṭhin a; inthlak hlawk a har tawh thin. Zirtirtute’n note an pek loh chuan zir tur nei lo riau anga inhriatna pawh a awm thei. Note pek ṭhan kan nih chuan mahnia note siam tumna, inhai kuak tumna kan nei lo va, college-ah kan buai duh châwk.

Private school pawl (MISA) chuan merit list tihlan loh ṭha an tih loh thu an sawi a nih kha; private school tan harsatna a thlen theihna lai chu a awm thei ang! Exam dawn hnaiah result ṭha neih loh leh pass kim loh hlauvin hostel-ah an innawr liam a, fee an chawi ṭeuh ṭeuh a. Chhungkaw ṭhenkhat tan chuan phurrit a tling; an fate zirna pek an duh ve tho si a, hetiang em em lo deuh pawh hian a kalpui theih ang maw le.

Sikul neitute/enkawltute an pawimawh. Zirtirtute pawhin hlawh hmuh nan chauh ni lovin, Pathian rawngbawlnaa ngaia thawh tur zawk a ni. Mi dangte tana thil ṭha tih duh tak takna thinlung pu mi tan lo chuan zirtirtu hna hi hna hlauhawm a ni ka’n ti teh ang, ka sawi na mah mah em ka hre lo. Tih bik, mi rilru tihnat tuma sawi ka ni lo a nia, ka vei zawng ka rawn au chhuahpui ve thawr mai a ni e. Result ṭha tak nei chungin CUET, NEET, JEE, adt. ah kan ti ṭha leh viau bawk si lo va, hengahte hian ti ṭha ila a lawmawm zawk.

Zirtirtu indaih lohte hi ngai pawimawh zawk ila hma kan sawn zawk ang; zirna dawn hi naupangte chanvo ve alawm le. Zirtirtu lak lamah pawh a tling leh tlak, a tui tak tak mi ni rawh se. Zirtirtute azir hian kan subject tui zawngte a dang ve thei a nia, class kal min tichâktute an ni thei asin. Dr APJ Abdul Kalam chuan zirtirtu hi a dah pawimawh khawp mai, hetiang hian a sawi a: “Creativity is the key to success in the future, and primary education is where teachers can bring creativity in children at that level,” (Kan hma huna hlawhtlin theihna hmanrua chu thil siam/ngaihtuah chhuah thiamna (creativity) a ni a, pawl hniam zawk an nih lai aṭanga chutiang thiamna neihtir theitu chu zirtirtute hi an ni,”).

Zirna hi mihring min tihmasawntu pakhat a ni. Nelson Mandela chuan, “Education is the most powerful weapon which you can use to change the world” (Khawvel thlak danglam theihna atana hmanraw chak ber chu zirna hi a ni), a ti. Mihring chu a pawn lam lan danah, a thil neihah ni lovin, a chhunga a quality aṭanga teh hi a tlo ber fo.

- R Lallawmawma