Mizo State Language Bill: MIZO ṬAWNG CHU PASS A NI TAWH

Mizo ṭawng hi Mizoram state-a office zawng zawngah leh Assembly sitting rorelna

ṭawng atan hman tura dan a pass thlap a ni tawh. Kan tlangmipui Nagaland state-ah chuan ṭawng lian tak tak pasarih nge, a aia tam nge an nei a. An inzat tawk hial hlawm si a, state ṭawng atana hman tur bikah an buai a, Assamese ṭawng pawlh siam chawp Nagamese an tih chu an pawm ta ngawt mai a ni. Meghalaya state-ah chuan Khasi leh Garo ṭawng hi a intiat tawk hle a, thla hlui mai khan ṭawng pahnih an nei ta chauh a ni.

Mizoramah hian British-in min awp kum 57 chhung, Mizoram chu Lushai Hills ram tiin min vuahsak a. Kan lalte kha Lushai ṭawng hmang deuh vek an ni a. Lushai lal ni chiah lo pawh khan Lushai ṭawng chu pianpui ṭawng anga thiam deuh vek an ni. Pawih leh Lakher region tih lohah chuan.

Kum 1947- ah India ram chuan zalenna a hmu ta a, British khan min chhuahsan dawn ta a. India ram chu British rorelna ni tawh loin mahnia rorelna a lo ni ta a. Kum 1952 January ni 3 & 4-ah District Council thlanna Lushai Hills-ah chuan neih a ni a, bial 18 chauha ṭhen a la ni a, ruat seat 6 telin a vaiin 24 an ni. Lushai Hills District Council chu April 25, 1952-ah ṭhut khawmna hmasa ber an nei a. Rorelna tur in (Assembly House) an neih ṭhat loh avangin ro an rel thei lo tluk a ni. An rorel ṭan tak tak chu ni 23.6.1952 a ni. Kum 1954 April 19-ah Lushai Hills tih chu Mizo District tia thlak a ni ta (Act 1954 L18 of 1954).

Kan ram Lushai Hills British sorkarin min awp aṭanga lal bàn April 1, 1955 Assam sawrkarin dan siam The Lushai Hills Acquisition of Chief Right Act of 1954 dung zuia Mizoram chhunga lal bàn zawng zawng (headman telin) 320 vel an ni. An zinga lal 200 vel hi Lusei an ni a, Lusei ni lo hnam dang 50 zet hi mahni pianpui ṭawng ang thova Lusei ṭawng hmang an ni bawk. Entirna, Durtlang lal Suaka leh Chaltlang lal Thangphunga te ang hi an pianpui ṭawng chu Lusei Duhlian ṭawng a ni.

Kum 1972-ah chuan Mizo District chu Mizoram Union Territory-ah order No. F11/26/72/-SR New Delhi I, the 6th 1972 hmangin kan lut dawn ta a. Chu lehkhaah chuan, “In the exercise of the power conferred by clause (b) of section 2 of the North Eastern Area (Reorganisation) Act 1971 (81 0f 1971) the Central Government hereby appoints the 21st January 1972 as the appointed day for the purposes of that Act,” tiin UT sorkar chu a piang ta a ni.

Mizoram Union Territory (UT) a lo pian hnu lawkah chuan The Mizoram Gazette Vol. 1 Aijal Friday January 28, 1972 issue No. 1 Section 6-ah chuan heti hian kan hmu a: “On and from a new Union Territory to be known as Union Territory of Mizoram Comprising the Territories which immediately before that day were comprised in the Mizo District in the existing state of Mizoram,” tih a ni. Chuti anga Mizoram UT-a kan lo awm hnu chuan state ṭawng atana kan neih tur chu hriat sa mah ni se la, a dan ang taka dan a pass ve ngei a lo ṭul ta a. Kan ram danpui Constitution-in a phal sa anga a ziak dan chuan he ti ang hi a ni.

Indian Constitution Part XVII Official Language Chapter II Regional Languages chungchangah hetiang hian kan hmu a. Constituion Article 345 state-a official ṭawng emaw ṭawngte (official language or languagees of state) (Article 346 leh 347) State Legislature chuan dan siam hmangin ṭawng chi khat emaw, a aia tam chu mi state ṭawng chu emaw, Hindi ṭawng emaw chu chumi state ṭawng dangte emaw, a zavai chuan official ṭawng atana hman turin a ti thei ang.

Mizoram UT a lo pian veleh khan rorel tura kan thlan tlin hmasate ber Pu Ch Chhunga, Chief Minister hun lai khan Assembly ṭhut khawm vawi 6-na 1975 October ni 10-ah Pu Ch Chhunga Chief Minister chuan Speaker Pu H. Thansanga remtihnain, “The Mizoram Official Language Bill 1974” chu House-ah a pu lut ta a. A tuk ni 11 October 1975 session-ah Chief Minister-in thuneihna a pek angin Supply Minister Pu J. Lalsangzuala chuan Bill hi sawiho theih turin a chhawp chhuak ta a. Thusawitute zinga langsar zual tlemte sawi ila.

Pu Lalkunga, MLA chuan, “He bill kan sawrkarin a zu hawn theih hi beisei piah lam a ni a. EGS leh Relief Work chungchangah instruction sei pui pui sap ṭawngin ziah a ni. Thingtlang lam VC-te’n an hrethiam lo a, office tam takin an hre thei lo bawk. Cyclostyle-a fiah lo taka her chhuah a ni a. Thingtlang lamah a thawktu turte chuan chu paper chu thingremah an khung bo mai mai ta ṭhin a ni. Tun hnuah chuan mahni ṭawng ngeia Language Bill pass a lo nih chuan kan ṭangkaipui tawh hle dawn a ni,” tiin a sawi.

Pu Vanlalhruaia, MLA chuan, “Kan ṭawng ngei Official Language atana kan hman hun hi ka nghakhlel tak zet a ni. Kan chhehvel Bengali hian Language Bill an lo hmang tawh a, an chhiatpui aiin an ropui zawk. Vawiin ni thleng hian an pass hnuah an ropui zawk,” a ti.

Pu Hrangvela, MLA chuan, “Mi state dangte’n anmahni ṭawnga engkim an tih theih tawh hnua lo la muangchan chu dikin ka ring lo va, a rang thei ang bera hman turin pass leh, a hre lo leh ṭulna hmunah chuan sap ṭawnga translate chauh ni thei se,” tiin.

Member-te sawi zawng zawng chu sawi lo mai ila. Ṭha ti lo lama sawi an awm meuh lo va, mahse, uar luar lutuka kan hman chuan state dangte nena competitive IAS leh a dang te, inbiakpawh leh a ṭul dangah min tibuai lo tura zirlaite’n an thiam a ṭul thu sawi a ni. Mi panga laiin an sawi hnu chuan Speaker chuan a pu luttu Pu Lalsangzuala chu House member pass-pui tura ngen turin a sawm a, ani’n a sawm anga member-te a ngen hnuah Mizo ṭawng Official Language Act 1974 chu hman atan pass a ni ta a ni.

Hemi pass a nih hnu pawhin 1975 May 9 Official Gazette-ah he Act chungchang hi tihchhuah a ni tawh a, chu chu UT sawrkarin a hman tur a ni. “The Mizo language shall subject to the provisions of Section 34 of the Government of Union Territory Act 1963 be the language to be used for all or any of the official purposes of the Union Territory and different dates maybe appointed for different purposes or for different areas in the Union Territory,” tih a ni.

Tin, Section 4-ah chuan, English chu official-a indawrna thilah chuan hman theih a nih thu tarlan a ni bawk; hetiangin: “Notwithstanding anything contained in Section 3, as from the commencement of this Act, the English Language may be used for all or any of the official purpose of the Union Territory,” tih a ni.

He Official Language Act 1974 hi a nihna ang taka hman lar a ni lo va, mipui duh ang taka hman a la ni lo. Kum 12 hnu, 1987 August ni 15 aṭanga hman ṭan turin sorkar notification chhuah leh a ni. Chu notification, The Mizoram Gazette, Extraordinary, Vol XVI, Aizawl, Friday 14.8.1987 Sravana 23SE 1909 issue ni 84 (B) published by Authority-ah tarlan a ni. A thu chu a sei deuha tarlang lo mai ila, hei hi Pu Laldenga Chief Minister hun lai kha a ni.

Zirna huang chhung leh office tam takah hman ni mah se, sawrkar notification leh official letter-ah an la hmang ṭha vak loa a lan avangin Pu Zoramthanga, Chief Minister hun lai khan 2021-ah hriattirna a tichhuak leh ta a. Chu hriattirna chu a tlangpuia lak tawi a sei lutuk loh nan han tarlang ila: Tahrik 25 June 2021, Mizo ṭawng chu Mizoram sorkar thil tih reng rengah hman tur a nih thu pawh a lo chhuak tawh a. He lehkhain a sawi angina, Mizo ṭawng hman kher a ngaih lohna tur ṭhenkhat a awm ve bawk ang. Chuvangin, Mizo ṭawng leh Sap ṭawnga ziak ṭul hun pawh a awm ang.

Hengte avang hian, “Mizoram sorkar hnuaia Dept. office zawng zawng chu sorkar hnathawk tam zawk leh mipui vantlang tam zawkin an hriat tur ang chu sorkar thuchhuahah Government instruments, notification, office memorandum, etc. an siam reng rengin sap ṭawng leh Mizo ṭawng chhuah ve ve ṭhin turin ngen leh hriattir an ni e,” tiin.

Chutichuan, kan ram roreltute chuan ‘The Mizo Language Bill’ pass tawh Mizo ṭawng chu state ṭawng atana nasa taka an lo pho chhuah dan kan hre ta a. Kan IAS officer ṭhenkhat pawh mi state-a an Language Bill pass hman dan ka zawt ṭhin, official-a an hman uar dan an sawi nasa mai a. Engvang nge ni, sorkar department hrang hrangte hian an thuchhuah mipui hriat tur hi Mizo nâwlpui chuan an hre thiam thei lo, Mizo ṭawng chu ni se zaah zain an hre hial zawk ang.

Entir nan, kan hnam lâm Cheraw kân hi India te chuan bamboo dance tiin min tihsak a, a dik lo hulhual, mau lâm a ni lo. Cheraw kan tihin hnam dangte pawhin sawi mai rawh se; a hming a ni a, a hmingin an lam ve tur a ni. Mizo hnam dan bua sazumeidawh, khawnthiang, thla hualna ar, rem ar talh hnan tihte hi sap ṭawnga ziah chuan a awmzia leh a hlutna bo ṭhak khawpin pehhêl taka sawi duah a ngai ṭhin.

Chuvangin, kan Language Bill hi hmang ṭangkai ila, sorkar notification, order, advertisement leh a dangahte hian Mizo ṭawng vekin office lam hian chhuah ni tawh se la, mipui kan va lawm dawn em! Kan hnam ṭawng humhalhna dan zawmna a ni bawk ang.

Kan Mizo hnam dan pawh “Mizo Hnam Dan Bu” ti ila, Mizo ṭawng vekin ziak ni tawh rawh se.

- C. Lalaudinga 9862769948