Lirthei khalh hmangchâng: Hmaa mite tlân pelh hun
Hman deuh lawk khan scooter-in Zarkawt kâwn aṭangin Thingpuihuan Tlang (MacDonald Hill) panin ka tlan chho a, lirthei inzui thluai thluai kan ni lo bawk a, tlân chak viau lo mah ila, ka tlân muang lêm lo. Zarkawt Kohhran biak in thlen hma deuh, kawng chhak lam (veilam)-a Zarkawt community hall pan chhohna kawng pêng thlen dawn hnaih tawhah hnung lam aṭangin bike pakhat hian min rawn tlan pêl fua a.
Chu bike chu a chunga ka sawi, Zarkawt community hall lam panna lama pên chhoh tum a lo ni a. Mahse, ka tlân muan bik lêm loh avangin chu kawng pêng chu ka thleng titih ve tawh bawk si nen, kâwi luh tum mah se, ka hnaih chilh tawh avangin kâwi luh chi a ni ta si lo a, a tlan tlang zawk a, a dik chawt bawk a; balance hlohin, a tlûk phah ṭhelh nghe nghe.
Kha bike kha kei aiin a tlân chak fé ngei mai, kei pawh ka tlân muang lutuk bik lo. A pên tumna kawng pêng kha ka hnaih viau tawh tho a, a tlem berah second 5 chhungin ka tlân thleng tawh dawn tho si a, ka tlân pelh hun kha han nghak lawk mai se, buai loin, awlsam leh ṭha takin a pêng thei mai tur kha a ni a. A hmanhmawh luatah ṭul hauh loah a buai deuh hlek phah ta a ni. A pên dawn avang khan signal light lo hmang pawh ni se, ka tan khan hmuh hman a ni tawh lo hrim hrim mai.
Lirthei kan khalh a, tlân chak deuh leh tlân muang deuh kan awm. Khawpui chhungah hi chuan tlân chak lutuk a ṭha lo a, tlan muan lutuk pawh a ṭha chuang lo; a âwm tâwk a awm. Hmaa tlânte ûm pha tâwka tlan a ṭha tlangpui a, chu chu lirthei tlan dan (traffic movement) a ṭhat zawk nan leh traffic jam tihziaawm nan pawh awmze nei a ni.
Hmaa tlante lehpelh dawn hian fimkhur a ṭha. Keimahni duh dan ang anga hmaa mite lehpêl mai loin, a hun em, a remchang em tihte hi ngaihtuah ve ṭhin ila; chetsualna leh chetsual hlauhthawnawma kan awm tur te, inmelh rum deuhte kan pumpelh thei ang. Ka thil tawn ka sawi pawh khi, a hun loah min lehpelh a tum a, amah kha a buai phah a, a chetsual phah ṭêp a ni.
Kan tlanna kawng pangngai aṭanga veilama pêng tur kan nih chuan hma tlânte leh hnunga tlânte ngaihtuah tel ṭhin tur a ni. Pên kan tumna pêng hnaih tawhah chuan hmaa mite tlân pelh loh a ṭha; tlân pêl loin, ka pênna tur an tlân pelh hun nghah tawh tur a ni. Chu chu ka hmaa tlânte leh keima tan a him.
Entir nan, Treasury Square city bus stand bul aṭanga Venghlui/Republic Veng lama pêng tur i nih a, pêng i hnaih tawh chuan i hmaa mi chu nang aia tlan muang zawk pawh ni se, tlan pêl kher tawh suh. Assembly House lam aṭangin chhim lam panin i tlân a, Tuikhuahtlang lama tlan chho tur i nih chuan, Lok Bhavan south gate thlen hma vel aṭang chuan i hmaa tlante lehpêl kher tawh suh. Kan him tlanna tura thurâwn a ni e.
- Kezo