Mizoram tana ka hmathlir tihlawhtlingtu ER. H. LALZIRLIANA, MLA LEH ER. H. GINZALALA, MLA

State pawna zirlai ni chunga Mizoram kan vei ṭhin ang tak khan Mizorama kan let leh hnu hian han vei ta vek mai ila chuan, kan Zoram nuam hi a va nuam lehzual dawn em!

Assembly House-ah Mizoram kal dan tur an rel ṭhin tihte kha chu kan lo hre ve a, engtin chiah nge an sawiho ṭhin tih erawh chu tunlai ang hian kan hmu ve thei si lo. Sakeibaknei, Harhna, PUCL Journal, Zo Nieng leh a dangte aṭangin session zawh hnu feah a tlangpui kan lo hre ve mai ṭhin kha a nia.

Fiamthu kal sual nge ni ang a, tu pa zukhawn chang lo thu zawk nge ni dawn, building sak tur estimate-ah a foundation an chhawk a, a dang zawng an approve tihte kha kan beng tivirtu kha a ni a. ‘An ti’ tih kha kan ṭanfung hum ngheh ve theih awm chhun kha a nia. A enga pawh chu ni se, ngaihtuahna min sentirtu leh kan hmangaih Mizoram tana hmathlir min neihtirtu erawh chu a ni miau bawk si le.

“Mizoram Assembly House-ah hian technical mi kan ṭhut ve a ngai,” tiin khawte tlangau aia au ring zawk ni lem lo chungin ka han au ve ngawt mai ṭhin kha a ni a. A ngaithlatute khan tun hunah hian min la hriatsak tak ang maw.

“In fapa hian politics khelh a tum a nih hmel hle mai an ti che a nia, i lo tum reng em ni?” tia ka patea’n {Lalsailova Sailo (RIP), Ramhlun Venglai} min han zawh khan ka nuih a za lem lo nâ a, politics hi a awmzia ka hriat loh em avangin, “Tum lo e,” tia ka rilru dik tak a chhanna pek bak kha sawi belh tur ka hre lem lo.

Nia, final year zirlaite thlahna nia uar lehzuala, “Mizoram Assembly House-ah hian technical mi kan ṭhut ve a ngai,” tih ka sawi ngaithlatu ka zirlaipui ni lo, chanchin thar buaipuitu lam tan chuan khatia ka chhungte an lo hrilh pawh kha thil awm lo a ni lem lo. Ka zirlaipuite pawh khan an lo ring ru ve bawk mahna.

Public darling nih harsat turzia te ka ngaihtuah hian, MLA candidate han nih hi chu kei zawng ka dai ngam loh tuipui fâwna pên luhna tur angah ka ngai tlat. ‘Ruat seat’ te hi awm se la, min duhsakin min rawn ruat ve thut ta se chuan ka hnar phal loh tur a ni thung si ang.

Hun a lo kal zel a, ka zirpui Er. H. Lalzirliana chu MLA a rawn ni ta. Chheih, a va nuam ham ham ve le (technical mi mi dang pawh an awm a, amaherawhchu, an chanchin kan sawi hman rih lo ang). Ṭhiante MLA an han ni chu rilruin a lawmpui mai ni loin, ka lo suangtuah ve rauh rauh a taka ka han hmu kha ka lawm hle a ni.

Ngaiteh, MLA term dang a rawn inher chhuak a, Er. H. Lalzirliana roommate Er. H. Ginzalala pawh MLA atan thlan tlin a rawn ni ve leh ta. Ani hi Adviser to Chief Minister (Technical)-ah dah a ni ta lehnghal a, ka va han lawm tak em.

Er. Zira’n, “Kei chu senior MLA ka nia,” a tih zawh chiaha Er. Laltea’n “Kei chu ruling MLA ka nia,” a han ti kha ṭhianho inhmuhkhawmnaa boruak siam nuamtu a va ni tak em. Ka ṭhiante hi ka chhuang a, theihtawpa Mizoram tana tha leh zung, an ngaihtuahnate an seng tak meuh meuh tih ka hmuha ka hriat hian ka fak lo thei lo a ni.

Tichuan, hlawhtling inti takin, theihtawp chhuaha awr phiar ṭawng ṭawng khawpa ka lo tlangaupui ve ṭhin, “Mizoram Assembly House-ah hian technical mi kan ṭhut ve a ngai,” tih chu heng ka ṭhiante pahnih hian an rawn tihlawhtling ta a ni. Ka va intithei tehlul em aw! Keima ngaihah chuan ka campaign hlawhtling chiang alawm!

Anmahni râwn miah loin an rilru ka han chhuidawn ve leh ta a. Ngaiteh, ka thu an awih vanga politics khel chhoa MLA ni ta an ni reng reng dawn lo. Ka thusawi pawh kha an hrechang tawh kher lo ang. Mahse, khatih hun lai aṭang tawh khan an rilru leh ngaihtuahnaah ka vei ang kha an lo vei ve reng tawh a, an sawi chhuak ve lo mai zawk a lo ni. A hun tea rah ṭhin tih angin a hun teah chuan mawi takin an rawn par chhuak ta a, an hmangaih Mizoram tan ke an rawn pên ta a lo ni. An va fakawm tehreng em.

NMZP (NERIST Mizo Zirlai Pawl), NCF (NERIST Christian Fellowship) leh NMI (NERIST Mizo Inkhawm)-ah tea ka lungrualpui ṭhin engineer chhuanawm tak pahnihte hian Mizoram tan an theihtawp an chhuah zel dawnin ka hria a, ka chhuang tak meuh meuh a ni.

Tichua,n ka ngaihtuahnaah chuan ka duhna hi keimah ni loin a ti thei fate’n min lo tihhlawhtlinsak a lo ni reng mai a, an chungah ka lawm em em a ni. Mizoram lo hi ram dang kan nei lo a, kan nei tawh dawn bawk si lo a; chuvangin, hmangaih chikima he kan ram hi hmangaih zel turin heng kan MLA pahnihte hi ka sawm nawn leh a ni.

- Hrangchhuana Sailo

Mob: 9436352280/ 8837095663

Email: hsailo_pg@yahoo.com