Party politics nge ram hmasawnna: Performance-in thu a sawi
Mizoram politics kalphungah hian party vawn ngheh (fanaticism) aia hnathawh (performance) dah hmasak a hun ta hle a. Politics-ah thlawp bik neih hi thil sual ni lo mah se, ram hmasawnna tak tak thleng tur chuan sorkar hnathawh hi mimal emaw, party duhsakna vang chauh ni lo, ram hmangaihna nena thlir thiam a ngai a ni.
Hnathawh ṭha hian rilru a hneh ber
Tun hnaia sorkar lai (ZPM) hnathawh leh hmalaknate hian party thliar lova mipui thinlung a hneh ṭan mek hi hmuh hmaih phal rual a ni lo. MNF leh Congress thlawptu rinawm tak takte pawhin sorkar hmalakna dik leh rintlak an hmuh hian “Ramin hma a sawn chuan a tawk” tih rilru an pu thiam ta. Party-a rinawm bur ringawt aiin, kawng dik zawh a rintlak taka sorkarin hna a thawh hian mipui thinlung a hneh zawk tih a chiang ta hle a ni.
Neutral mipui: Sorkar tichaktu
Party-a kan ruh bur tlat hian sorkar a inthlahdah ṭhin a. Mahse, tuna sorkar lai erawh chuan neutral mipui chauh ni lo, party dang mite pawh an hnathawh hmangin an hip khawm mek a ni. Mipuite'n dik taka sorkar hna thawh kan teh thiam hian sorkar a fimkhur a, hna a thawk ṭha zual sauh ṭhin. Tuna mipui sukthlek kan thlir hi chuan, thawk ṭha apiang mipuite'n kan thlawp zel dawn tih a lang chiang hle a ni.
AMC leh a hnu zel: Performance chabi
ZPM sorkar hnuaia hmasawnna tak tak leh sorkar hnathawh kal phung thar mipuite’n kan hmuh hian kum 2028 thleng chauh ni lo, term leh zel tur thleng pawhin performance hian thu a sawi dawn tih a chiang. AMC inthlan kha sorkar hnathawh mipuite'n kan hlut tawk fiahna hmasa ber a ni a, hmasawnna duh mipuite tan chuan thlawp thiam a pawimawh hle.
Ram dah hmasatu mipui
Politics puitling awmzia chu, mipuiin party aia ram hmasawnna kan ngaih pawimawh hmasak zawk naah hian a innghat. Sorkar hian kawng dik leh felfai taka hna a thawh a, mipuite'n ṭha kan tih a, kan thlawp tlat chuan hmasawnna hian kal zel turin chakna a nei ṭhin. Ram hmangaihtu mipuite chuan kan sorkar hi rinawm takin kan thlawp tlat tur a ni.
"Hnathawh ṭhat hi sorkarna vawn nghehna chabi a ni a; chu hna thawk ṭha sorkar thlawp tlat chu mi puitlingte tih tur a ni."
- Thangtea Thawmte