THE BIBLE SAYS SO

Piangthar thite hi vanah an kal nghal nge, Lal Isua lo kal nghakin thlanah zalh an nih ang khan an awm reng ta reng nge? Mi zawng zawngte hi Lal Isua lo kal leh hunah a ruala kaihthawh an ni ang a, vanram kai tur leh hremhmun kal tur rel fel tur em ni dawn? Bible chuan fiah takin min ziaksak a.

Piangthar lova thite chu mitthi khuaah an kal nghal ang a, piangthar thite erawh chu Lal Isua hnenah an kal nghal ang, hetiang hian Lal Isuan A sawi “Kutdawh chu a thi a, vantirhkohten an kalpui a, Abrahama ângchhungah an dah a” (Luka 16:22) tiin. Abraham angchhung tih hi Thuthlung Hlui huna Pathian thuawih (piangthar) thite awmna a ni a. Mi hausa piangthar lo thi kha chu Mitthi Khuaah meikang na tak tuarin an awm a (Luka 16:22,23). Lal Isua ngei hian mihring kan thih hian vanram hmun nuam taka kal pawl leh mitthi khua, mei kâng zinga kal pawl hrehawm taka, vanram nuam tak hmu pha reng si, ît em em, mahse inkal pawh theih miah si lova awmte an awm dawn A ti a nih hi.

OT hunah Pathian thuawih thite kalna chu Abrahama ângchhung tih a ni (Luka 26:22,23). He hmun hi NT hunah chuan Paradis tia sawi a ni tawh a. Chu pawh chu Lal Isua ṭawngkam aṭanga kan hriat a ni. Misual khai kân ve, sima Messia atana pawmtu "Isu i (Lal) ram i thlen hunah mi hre reng ang che" titu hnenah khan "Vawiinah hian ka hnenah Paradis-ah i awm ve ang," a tih avangin NT huna piangthar thite chu Lal Isua hnenah, Paradis-ah an awm ta zel a ni tih chu nuam takin a pawm theih ta a ni (Luka 23:42,43).

Piangthar thite hi Lal Isua hnenah vanah an kal nghal a ni tih hi Tirhkoh Paula awka aṭang pawhin kan hre thei a. Rom khawpuia a tân lai khan Philippi kohhrante hnenah lekha a thawn khan "Kal chhuaha Krista hnena awm châkna ka neih avangin” (Phil 1:23) a tih hian kal chhuah chu thihna a tihna a ni a. Krista hnena awm a chak thu a sawi avang hian Paula hi chuan piangtharte chu an thih hian Isua Krista hnena awm turin a ngai tih a hmuh chian theih khawp mai (Phil 2:23).

Mitthi vuitu ṭhenkhatte hian thil an chhut ngun lo deuh ṭhîn a ni. Lal Isua lo kal thlenga thlan chhunga awm reng turin an chham fo ṭhin. Kolosa kristiante hnenah pawh piangtharte chu an thih hunah chauh ni lovin, leia taksa pua an nun reng lai pawhin “In nunna chu Pathianah chuan Krista hnenah thuhrukin a awm si a" tiin nungdama la awm Kolosa kohhrante chu a hrilh a ni (Kol 3:3).

Kristian tam takte chian lohna chu piangtharte hian, Lal Isua leia rorel tura A lo kal leh hunah hian van ram an kai dawn nge dawn lo tih “Rel la ni dawnin an ngai tlat hi a ni”. Van ram kai dawn leh dawn lo chu Krista thihna leh thawhlehnaah khan rêl fel vek a ni tawh e (Johana 5:24; 1 Kor 6:11; Rom 8:16,1 Johana 3:1; Kol 3:2,3). Piangthar tawh, chhandam ni tawh zawng zawngte tan vanram kai dawn leh dawn loh hi a fel vek tawh. Hei hi chhandam tawh kan tihna a ni a. Chû'ng chhandam tawhte chu rorelsak an ni dawn tawh lo. Krista thihna leh thawhlehna kha kan chunga rorelna, chatuan atana tih zawh tawh chu a ni. Hei hi Chhandam tawh (past tense, saved) kan nihna chu a ni.

Chung chhandam tawhte chu Pathian thiltihtheihnaa venhim tlat an ni a, chhandam nih leh loh a awm thei tawh lo (Johana 20:28; I Pet 1:5). Hei hi chhandam mêk kan nihna chu a ni. Lal Isuan A mi thianghlimte lam tura boruaka A rawn chhuk hunah leh leia A Lalram din tura khawvela rorel tura a lo kal hunah chuan, he ṭawih thei taksa hi hnawlin van taksaa thuam kan ni tawh ang. Hei hi chhandamna chhâwng thumna chu a ni (Johana 15:3; I Thess 4:16,17; I Johana 3:1-3). Chhandam tawh kan ni a, chhandam mek kan ni leh a, chhandam tur kan ni bawk a ni.

Thupuan 20:11-15 thu hi piangthar tawhte chungchang sawina a ni lo, Eden huan aṭanga kum sang lalram tawp thlenga chatuan nun la nei ve lote kha, an thiltih sual nasat ang zela rorelna leh meidila paihna thu a ni zawk. Piangtharte chuan Kalvari leh Golgotha kal tlanga, vanram kai dawn ngei tih chianna Zakhamna Thlarau nei tawhte kan ni? (Eph 1:13,14).

- F Lal Thanzuala. 9436141242