Mizo Diaspora Cell
ZPM thla 6 lek a sorkar hnu June ni 11, 2024 khan Mizo Diaspora Cell (MDC) chu sorkarin a din a. Chief Minister's Office atangin a function dawn a ni tih pawh CM Pu Duhoma chuan a sawi nghe nghe. Chairman-ah Pu Vanlaldina Fanai, ICAS, Commissioner & Secretary to CM chu dah a ni.
MDC hi ram danga Mizo awmte hui khawm nan leh an chanchin chhui zui ngai leh buaipui ngai an awmin a ṭangkai em em a. Mipui sum seng em em si lova hmalakna ṭha tak, Mizoram sorkar kum 50 chuang kal tate’n an la din ngai miah loh ni si hi kalphung thar sorkar thil tihah kan sawi lan ngai vak loh pakhat a ni awm e.
A bikin, ṭhalai hnathawh tur zawngte sorkar hna ringawt chuan min daih seng lo va, exam-a tlin chi hna ṭha tak takte lah mi nawlpui ban phak vek a ni lo bawk nen, ram dang, India ram aia pawisa hlut zawkna hmun hrang hrangah hna hnuaihnung deuh thlenga thawk turin kan ṭhalai tam tak an vak chhuak lo thei lo.
Tun hnaiah pawh he MDC hi a ṭangkaizia kan hmu mek a, Mizo nula Vietnam-a zin, a chanchin hriat zui loh pawh an ngaihven reng a, Laos-ah a awm a ni tih an chhui chhuak tawh a ni.
MDC hian a din tirh aṭangin hetiang hi ngaihvenin August ni 13, 2024 khan a vawi khat nan an ṭhukhawm a. Placement agency-te dan ang taka engkim an kalpui theih nan LESDE Placement Rules an siam te pawh an thlirho nghe nghe.
Nikum 2025 July khan MDC hian Diaspora Hub siamin, Mizoram pawn hmun hrang hranga awm Mizo association-te chu Hub-ah hian in register turin an ngen a. Hriat theih chinah Zoram pawna Mizo association 40 zet in register tawhin, India ram pawn association pahnih an tel bawk. State pawna Zo fate inpuih tawnna leh inhriatpawh tawnna atana ṭangkai tak tur a ni.
MDC hotute sawi danin, ram pawna case langsar zualte chu–Dubai, Maldives, Nepal, China, Malaysia-ah te a ni a. Tam tak chu passport lem hmanga Myanmar kaltlanga ram danga dan lova hna thawka kalte an ni.
December ni 23, 2025 pawh khan MDC hian Mizo zinga 'influencer' an tih mai, social media lama hriat hlawh leh zuitu ngah deuhte thingpui inpuiin, MDC hmalakna leh ram pawna Mizo awmte’n an hriat tur, tunlai mipui titi khawchang sawina hmunpui ber (social media platform)-ah te thehdarhsak turin an sawm. He hun hi CM pawhin a telpui nghe nghe.
Mizo ṭhalaite ram pawnah tun aia tam hi kan vak chhuakin, hnathawh leh zirna avangin khawvel ram hrang hrangah kan la chetla nasa zual zelin a rinawm a. Ram dang dan leh hraite zawm ṭha lo an lo awm palhin Mizoram sorkarah bawk an rawn tlu lut lo thei lo va, chung hun atan chuan sorkarin MDC a din hi a ṭhain a ṭangkai chho tulh tulh dawn niin a lang.
- Hruaia Kawlni