DANGLAM NGAI LO NUNGCHATE

Khawvelah hian mihringte hi mâwlmang taka bul ṭanin, hriamhrei atan lung hriam leh ramsa kite hmang ni mah ila, Eden bawhchhiatna aṭanga duhâmna rilru pu tawh, mahni hmasialnaa khat kan nih avangin, nawmsak tumnain kan khat a. Tunah chuan in ropui tak takte sain, khawpui ropui tak takte kan din ta.

Khawl ṭha leh changkang tak takte siam chhuakin, kan nun a danglam zung zung ta mai. Inkalpawhna kawngpui zau tak tak kan sial a, lirthei man to tak tak nen kan tawlh zêl zêl mai a nih hi. A tui ṭha ṭha eiin, thisen sang leh zun thlum khawpin kan eiin kan in a, nghei hlau reng renga khawsain, a theih dan danin kan inchhêk khawl ṭên ṭun mai. Kan nawmsakna tur leh kan hrawk tihtlai nan thil siam dangte tihnat leh tihhreawm emaw, suat rêm vek pawh kan pawisa lo a, kan nunah rualawhna leh duhamna hian chinlêm a nei lo.

Khua a lo thim a, zan a lo nih pawhin mihringte chu mahni in luma khum nuam takah pawnthuah changkang tak tak thuahin kan mu thei a, zing khua a lo vâr pawhin ei tur dap chawp ngai miah loin a tui ṭha ṭha kan inchhawp mai a ni. Kan dam chhung khawsaknaah hian lungkham tur kan neih ber chu, neih belh duh a, kan duhâmna mai a ni si. Mihringte hi kan duham em avanga Pathianin khawvel mawi taka a siam kan tihchhiat nasat tawhzia leh nungchate chunga kan hleihlenna rapthlak tak mai hi ngaihtuah ngam pawh a ni lo.

Hetia mihringte muangleia kan awm lai hian, nungchhate chan erawh chu thawpikthlak tak a ni. Mihringte’n an nawm an mâkin an nghaisain an tihlum fo va, silaia kâpin, an vah velnaa an awh nan thang an kam thul; thihna túrin an hrai hlum fo bawk ṭhin. Hlau leh thlabâr rêng rêngin an khawsa a, chenna tur leh riahna mumal pawh nei loin an vâkvai rawlai mai mai ta a ni.

An chenna ramngawte lah chu tuk chereusak zel an ni bawk si a, tawm hulna takngial pawh an tan a vâng a ta hle mai. Thaw dêp dêpa nun hmangin, thinthia mutna tur hmun pawh an nei lo. He kan khawvelah hian nungchate tan khua a vâr mawlh lo va, inhnangfâkna tur thing rah tak ngial pawh an nei tawh lo. An tan zawng, khawvelah hian nung ve tur pawhin thapui thawh takmeuha beih a ngai ta a nih hi.

Hawh teh u, khawvelah hian nungchate hi an lo pun ve theih nan, an intlah pun hun lai tal hi chuan lungmuang takin i awmtir ve teh ang u. An kawp lai lungdite nen lên dun ve an mamawh tih hriain, zahngaihna an chungah i lantir ve ang u hmiang. Kan pi leh pu te, ramvachal kan tih em emte pawh khan heng ang hunah hi chuan nungchate chungah zâwl an dawh ṭhin asin. Nungchate hian duat taka an enchimloh an chawi lai notête an chawi len ve theih nan hmun ralmuang leh hun duhawm an mamawh ve a ni.

Chuvangin, Pathian thil siam ropui ber mihringte hian thilsiam zawng zawng chunga hotua min dah angin, heng nungchate hi Siamtu siam ang anga nung leh khawsa reng thei danglam ve miah lo an nih hi, hringnun tinuama timawitute an va ni em. An inthlah pun hun lai tal hi chuan an chungah zah i ngai hrâm ang u.

- Hausanga Hauzel