MUHCS ṬHATNA ZÂR KAN ZO VE
December 20, 2025, Inrinni chawhma dar 9 pelh hretah khan ka pa, Chaltlang Bethel-a kan in pui luahtu chu a zakhnuai âwm a na thut mai a, kawmthlang maia Nazareth Hospital-ah tlanpui nghal chûk chûk a ni.
Nachhâwkna chak taka an chiu hnuah doctor-te’n an endik a, heart attack (Myocardial Infarction) a lo nei tih an hmu chhuak nghal a ni.
Nachhâwkna hmangin ṭum hnih chiu a ni a, damdawi mûm pali an bârtir bâkah, damdawiin an chiu bawk a. Tlai thlenga hmasawnna leh 'investigation' mumal a awm theih tâk lovah chuan zan dar 7-ah Nazareth Hospital ambulance hmangin enkawlna khâwl ṭha zawk awmna Ebenezer Medical Centre, Chawnpui kan pan leh ta a ni.
Empanelled leh empanelled loh
Nazareth Hospital chu Mizoram Universal Healthcare Scheme (MUHCS) empanelled hospital a ni a, cashless an kalpui a, pawisa kan chawi lo. Ka pa hi Ebenezer Hospital lam chu empanelled hospital a nih loh avangin a rilru a hah tih a hriat a; amah hi a harh a, nâ pawh a hria a ni.
Mahse, sorkarin 'thih leh dam inkar' (life threatening) tihlah chuan khawi hospital-ah pawh luh râwih a, emergency certificate siamtirin MUHCS-a inziak lût nih chuan a bill leh theih tih ka hria a. Sorkar ruahmanna ṭha tak chu a chhawrtu ni turin emergency certificate chu ka siamtir ta a ni. Heti hian Pathian zârah kan dam ang a, MSHCS lamah kan bill ve leh thei ang.
Amah hi sorkar aṭanga pension thlenga thawk a nih ve tawh avangin MUHCS-ah hian a inziak lût sa a, harsatna a awm lo turah kan ngai. Ebenezer Hospital ICCU lamah ngaihṭha takin an enkawl ta a ni.
Refer case pawhin a theih
Sorkar hian mipui tan hian ruahmanna ṭha a ngaihtuah nasa hle mai a. Empanelled hospital aṭanga refer an nih hian MUHCS-ah bill theih a ni leh zel bawk.
Private hospital-te inphahhniam zel se
Aizawla private hospital ṭhenkhat chuan MUHCS an zawm ve zel a, a lawmawm hle. Synod Hospital Durtlang pawhin an zawm tawh a. Health Minister Pi Lalrinpuii chuan private hospital dangin zawm leh an tum mek tih pawh a sawi tawh a ni. Mipui rawngbawlna atan khawngaih takin Ebenezer Hospital, Trinity Hospital, Aizawl Hospital leh private damdawi in dangte pawh hi MUHCS bill theih turin han inphahhniam ve hram se, Mizoram mipui hi kan va lawm dawn em!
~ Zoa Tlau, Buannel Cabin