Hruaitu ‘Thup’ Nge ‘House Arrest’: MNF tlukchhiatna bul!
Political party chakna chu an hruaitute huaisenna leh an thuchah fiahnaah a innghat ṭhin. Mahse, tun AMC inthlan campaign-ah khan MNF chu party in-thununna (discipline) nei ṭha tak ni lovin, mahni leh mahni in-phuar-hlum (political suicide) mek ni berin an lang.
President ‘Bihrukna’ Leh Star Campaigner ‘Credibility’ Tlachhia
Party President meuh mipui hmaa a rawn inlan ngam loh hian, thup tum engemaw lian tak a awm tih a hriat reng mai. Party chhung in-khuahkhirhna emaw, ‘house arrest’ ang hiala President thup tlat a ni hian “Tu berin nge MNF hi hruai?” tih zawhna a siam lian hle. Hruaitu ber ṭawngka chhuak mipuite’n an hriat duh em em laia ‘khung hran’ a ni tlat kha, MNF sipai rualte tan chuan hruaitu nei lo sipai ang maia talbuaina a ni. A thusawi belhchian dawl lo leh ‘damage control’ vanga President thup tlat kha MNF tana zahthlak tawpkhawk a ni hial ang.
Chutih laia Assembly Session-a hmingṭha viau lo, Brigade field issue leh ‘ropeway/skywalk’ thawnthua boruak vung em em, *Pu Robert Romawia Royte star campaigner-a an han hmang lehzel kha chu mipui hmuhsitna tluk a ni. Inthlan hi chu ‘Credibility’ (rinngamna) khelhna a ni a, mipuiin an rin loh ber pakhat hmahruaia an hman khan MNF party ‘brand value’ a tihniam vek a ni. Dampa bial ang ngawt a ni lo tih hi MNF hian an hre chhuak har deuh nge; Aizawl mipui rilru hneh tur chuan ‘astro-turf’ leh ‘ropeway’ thawnthu ringawt hian a daih zo lo tih an hre lo zawk?
MUHCS Sawiselna: Retheite Hliama Chi Phul?
Damlo rethei leh pachhiate innghahna ber Mizoram Universal Health Care Scheme (MUHCS) a nih lai a, a aia system ṭha zawk duang chhuak thei chuang si lo ten an han sel fo mai kha thil ṭul lo leh finna tel lo a ni. Pu J. Sawma’n Health Care Scheme a sawihnawngna leh Kohhran (Synod) ngeng chhun zawnga document a dil kher kha—MNF tana ‘Self-goal’ mai ni lovin, an tlukchhiatna ‘Red Card’ a ni ringawt.
Damlo harsa leh scheme beiseitute tan chuan an hruaitute kà aṭanga chhuak kha beidawnna namen lo a ni. Thlarau lam hruaitute leh mipuite mamawh tak chhun zawnga hmalakna hi politics bawlhhlawh tak a ni a. Mipuiin an bill chhuah hun nghah ngai lova hahdam taka an awm laia, ‘Healthcare System’ an han vawrh chhe chiam mai kha chu ‘Political suicide’ dik tak a ni.
‘Siamṭhatna’ Nge ‘Tihchhiatna’?
Tunlai khawvelah chuan mipuite hian ‘Siamṭhatna’ (Reform) an duh ber a ni tawh. MNF-in anmahni thiltum leh ‘vision’ fiah tak sawi tur hre lova, sawrkar policy ringawt an sawisel (Negative campaigning) khan an campaign a tithuanawp zual hle. Thil thar rawn chhawp chhuah tum lova, “Hei hi a dik lo; a ṭha lo” tih ringawt hian mipuite rilru a hneh tawh lo.
Tun thlenga hmasawnna tur kawng fiah tak an rawn la chhawp chhuak thei lo fo hi an lungphu chawlh hlenna tur a ni ang em? Project lian tham deuh deuh vawrh vung a, a taka hmuh tur leh lungawi pui tur awm leh si lo ṭhin hi mipuite’n an hrechiang tawh a. Ram hlui zia a ram hruai tum, ṭawngkam thlum leh dawt sawithiamna hian mipuite min bum reng thei tawh bik lo a ni.
A tawp berah chuan, MNF hian an hruaitu an hman thiam loh leh thuchah fiah tawk loh avangin mipuite beiseina kawngah hmun an chang zo ta lo a ni ber. Hruaitu berin ‘Aw’ (Voice) a neih loh a, campaigner-in ‘Rinna’ (Trust) a hlawh loh bawk si chuan, MNF hi an tliak a ni ber. An President an ‘protect’ lutukna lamah mipuite lak aṭangin an ‘isolate’ ta zawk a; hei hi MNF tlukchhiatna leh vanduaina inṭanna bul a ni chiah ang.
Lo thlir reng rawh!
- Thangtea Thawmte