Tunlai Mizoram politics-a mipuite kham ber

Tunlaia Mizoram political party-te inbeihna boruaka neutral mipuite kham ber chu, opposition party-te’n sawrkar ding lai an beih dan hi a ni. ZPM sawrkar hian sawrkar kal tate kha a rawn khûm vek ang a, an tih theih ngai loh leh tih en pawha an en ngai loh pawh an rawn ti zel ang a, an party-in a chhiat phah zo vek ang a, an mawng a rawn hlim mualpho lutuk ang a, ding chhuak leh thei tawh lêk lo turin an chhiat phah ang tih hlauh vang ni awm tak a, sawrkar ding lai hna thawh ṭhat pawh pheh chhiat a, mipuite rilru hruai kawih tum a, Mizo ṭawngkam chhia leh ṭawng hlâwk ṭha ṭha hmanga an ṭawng khum hi a ni.

Chuvang chuan, sawrkar kal tawhte thil tih dik lo an sawi lan hlekin "Sawrkar hmasa sawi chhiat reng mai," an ti hlur reng mai bawk a nih hi maw. Mahni'na sawrkar ding lai a chhe thei ang bera sawi duh si a, sawrkarin an hun laia an thil tih fel loh a sawi ve a, an haw leh hle si te hi awm dan mak tak zawng a ni e.

A dik tak chuan, tun sawrkar ding laia minister/MLA-te hian hmangchang hriatna leh finnaah chuan anmahni kha an la tluk rih lo va, vervêk thiamah ngat phei chuan an nê pawh an ek lo vang. Mahse, takna leh taimak kawngah chuan a beitute hian an tluk lo zawk dawn chu a ang khawp mai. Ni e, sawrkar ṭha siama ram hmasawnna thawk chhuak tak tak tur chuan, hmangchâng hriatna leh thiamna mai ai chuan, tih tak takna leh taihmakna hi ramin a ṭhatpui zawk fo. Ram hruaitu ṭha ni tur hian thiamna leh finna a pawimawh ngei e. Amaherawhchu, finga thiam zel zul, ti tak tak peih si lo te, rinawmna nei lo leh mahni ham hai chingte ai chuan, mâwlin thiam lo zawk deuh mah se, mi taima leh rinawm, ti tak tak peihte an ṭha zawk daih ṭhin. Mi chu a taimak a, takna a neih a, a tih tak tak phawt chuan finna pawh a lai chhuak chawp zel mai ṭhin a nih hi.

Tuna opposition lamin kan Chief Minister dâwt sawia an puh leh ngawt ṭhinna tam ber pawh hi han chhui chian deuh chuan a ngialngana dâwt sawi a ni ngawt bik lo tih a lang reng a. A thil hriat sual palh te, a sawi lâwk ang taka thil a lo awm tak chiah loh te, a thil tih tum a sawi a tihpuitlin theih tak bik lohahte hian dâwt a sawi, tiin dawhehah an puh ta tehchiam ṭhin a ni ber. Hetiangah hi chuan Pu Duhawma aiin party dang hruaitute hian dâwt an sawi tamin an sawi lian zawk mah fo awm asin. Kan Chief Minister kal ta pakhat pawh kha a thil tih tur sawi, a tih leh theih si lohte khan a inhai vûr vûm thûr a nih ber kha. Hemi thua mi sawiselna chhanga a insawifiahnaah pawh, "Ka vission ka sawi a lawm, hetiang ka sawi loh chuan vision nei lo ka ni anga sin," a ti mai a nih kha.

A thu hrimah hetiang em ema mahni tluk lohte tihchhiat tuma beih hian mipui a hneh ngai lo va, an beihate lainatna avangin mipuite’n a beitute hi sualah an ngai zawk mai ṭhin a, a beitute hian an chhiat phah zaw lel ṭhin a nih hi. Pu Duhawma pawh hian hetiang khawpa parata beihna hi chhiatpuina tawk chu nei ve bawk ṭhin mah se, heti taka beih rawn hlawh reng ta chu, mipuite hian mi chak eng emaw tak a nih ringin Chief Minister-ah hial an siam phah ta zawk a nih hi.

Pu Duhawma hi mi chak lo leh zuau deuh chi phei chu ni se an beihna hi phur zo lo va, chhiatpuiin hmana hmana pil bo tawh tur a ni a. La dam ve pawh ni se, an vengah leh a Sihhmui huanah bak hmuh tur awm tawh lo hial tur a ni ang. Mahse, an beih rawnna hian a siam lian deuh deuh zawng a nih hi. Chutiang taka mi tum ruh leh chhel chu a nih avangin a beitute huphurh ang ngei chuan tun hun rei lo tê an sawrkar chhung mai pawh hian mipui hmuh châk ang ngei leh a beitute hlauh ruk ang ngei chuan chakna leh theihna thuruk eng emaw tak zawng a lo kawl ru ngei ni pawhin a lang ṭan ta reng a. Hetiang chakna leh theihna ralthuam a kawl hmu rutute tan chuan bâng lova beih tham zawng a lo nih reng hi tih tur a ni.

Kan sawi tawh angin, ram hruaitu atan chuan thiamna leh finna aiin rinawmna, taimakna leh takna a pawimawh zawk ṭhin. Mi thiam leh mi fing, mi tak tling zo si lote hi ram tan thang hlauhawm tak kam a, khuarkhuruma hruai luttu an ni châwk.

- Timothy-a pu Pachuau