MUHCS – SAWRKAR – SYNOD

1. MNF Sawrkar khan Synod Hospital, Durtlang kha Health Care Bill cheng vaibelche 1 lai an lo bat ralsak a, chu chu an pastor-in a rawn puang chhuak ta si a. An thinrim lutukin Synod beih dan kawng an zawng vak vak niin a lang.

2. Private hospital liante’n an duh thâla Mizoram Sawrkar control a, MUHCS zawm tura agreement an ziahpui duh loh avangin MNF ho lawm lutuk khan MUHCS a rintlak loh, private hospital pawhin an zawm duh lo tiin an tlangau nasa hle.

Mahse, Mizorama hospital changtlung ber Synod Hospital-in Mizoram mipui hmakaw ngaiin MUHCS a zawm ta thut mai si a. MNF ho thinrim lutuk chuan an inremna copy chu hospital dang fuihpawrhna turin an dil ta ngat ngat mai a. Mizoram Synod chu puanhnuai thil thupah an puh ta ngat ngat mai a nih hi.

3. Synod hian Mizoram Sawrkar hi inremna a ziahpui mai bakah, an kohhran mipuite MUHCS-ah inziak lut turin an chah a, a inziak lut thei lote pui turin an tualchhung kohhrante a ngen bawk. Hetia MUHCS ring tawk taka mi harsate inziak lut tura Synod-in a puih vang hian MNF ho hi an lo thinrim viau niin a lang bawk.

4. Synod Hospital, Durtlang panna kawng leh Hospital tualzâwl, kum tam tak MNF leh Congress hun laia chhe em em ṭhin kha ZPM sawrkarin a siam ṭha ta si a. Chu mai ni lovin, Synod Hospital chuan PWD Minister hnenah lawmthu a sawina te chuan MNF ho a tithinrim zual niin a lang.

Thil awmzia dik tak chu, Mizoram Sawrkarin Mizoram mipui tana theihtawpa ke a pên laia Synod-in a lo thlawp hi MNF ho hian hmuh hrehawm an ti hle a. Theihtawp chhuahin Synod hi beih dan kawng an zawng ta ti ila kan sawi sual awm lo ve.

Engpawh ni se, RTI Act, 2005 hnuaiah hian sawrkar hmalakna document zawng zawng pek chhuah tur tiin a inziak lo a. MNF hovin ‘public interest’ an tih hi Mizoram mipuite chuan ‘politics interest’ an ti ve thung a ni.

- H. Hlawnmual