HRAITE, KAL CHHET CHHET, ARTUI HLAWH HLAWH

Pastor pakhat hi a bial hlui, khaw pakhatah Kristian chhungkua thusawi turin an sawm a. Ani hi Pathianin "Chi tam tak thlaha lo pungin leilung hi luah khat ula, in thu thuin awm tir rawh u" (Gen 1: 28) tih thuthlung vuantu a ni. A va kalna khuaah hian In pakhat a kal pelh dawn lai chuan, nu pakhat nau awm thawm a hria a, Chu nu chuan, "Hraite, kal chhet chhet, Artui hlawh hlawh", a lo ti lauh lauh mai a ni. He nu hi, Pastor hian an biala Pastor a nih laiin, nula senior pasal neih pawh tum vak lo a ni a, Nimahsela, Synod- in "Mizote piang pun tura in zirtir ni se," an tih chu, Pastor hian bawhzuiin tlangval pakhat senior ve deuh tawh nena a sawi rem avang innei an ni a, Tunah hian fapa duhawm tak mai neiin an fapa chu a lo lawm vel a ni. Pastor hian a rawngbawlna a hlawhtling chu, nui var var chungin a kal pel ta a.

Mizote hi khawvela hnam ropuite ngaihtuah chuan hnam tlemte kan ni a, kan tlem nak-a-lai hian ruihhlo avangin mipa kan thi zawih zawih mai a, Pian pun kan mamawh em em a, Hetih lai hian nula leh tlangval nupui pasal nei lo, nula senior leh tlangval senior eng emaw zat hi, veng tin leh khaw tinah hian an la awm leh ta nghal a. Heng nula leh tlangval leng laklawhte hian kawppui tur an duh loh vang hrim hrim pawh an niin a lang lo a, eng emaw avang maia kawppui nei lawk lo an ni tlangpui a, Chuvangin, kan hnam hian pian pun kan mamawh tih kan sawi, kan sawi lai hian, Lengṭul mai tur nula leh tlangval hoteah hian ṭan kan lak a ṭul hle mai. Mi ṭhenkhat sawrkar hnathawk kawppui nei lo pawha awm thei maia inngai an awm rual a, Mi ṭhenkhat hnathawh mumal nei loh avanga chhungkaw dina fanau hrawk chawm huphurh avanga kawppui neih hrehte a awm theih bawk a. Heng ang dinhmuna dingte leh harsatna hrang hrang avanga kawmpui nei mai lote hi Kohhran hruaitute hian thurawn an pek a ngai hle a ni.

Mizote hi hnam lian leh ropui ni ve turin, tam kan mamawh em em si a. Hetih lai hian Mizo hnahthlak zingah pawh Mizo nih duh lo an la awm zel a, Mizo tih hmingah ringawt pawh hian kan la inlungrual thei lo zui a, "Ṭanrual hi chakna a ni", tih chu hre vek mah ila, kan la ṭangrual hlei thei lo chu a nih si hi. Han ṭangrual ila chuan, kan chheh vel hnam dangte zingah pawh kan zahawm ve deuh tur a ni a, Nimahsela, Rotekawla sepa an sawi ang maiin kan chenna ṭheuh bial zimte a, kan hruaitute hi an la vawk lal len ve em em ṭheuh zawng a ni si hi. Hengho hian inpumkhatna kawng min zawh pui thei lo chu a ni ber a. Inpumkhat tur chuan min ṭhui khawmtu tur hming pakhat kan put tlan a ngai si a. Engtikah tak hre thiam hlawm ang i maw?

Tunlai khawvelah hian hnam fing apiangin tam hi chakna hnar a ni tih hriain an chhehvela an chi leh kuangte nen insuihkhawm zai an rel mup mup lai hian, keini Mizo hnahthlakte hian kan la tih ve thei tak si loah chuan, Mizoram chhunga cheng Mizo tia lungrual ho zingah tal hian ṭan kan lak a ngai a ni. Hawh teh u, kan ṭhalaite zinga nupui pasal nei mai lo ho zingah hian, Mizote kan pun zel nan, kawppui an nei ve theih dan tur i zawnpui teh ang u, He mi kawngah hian Kohhran hruitute an ṭangkaiin an pawimawh thei hle ang. Fa nei tam turin beisei awm ni tawh hlawm lo mah se la, Chi thlah lo a, an awm mai ai chuan fa an neih hrim hrim hi a ṭul a ni. Fa pahnih khat tal an nei ve a, Hlim tak mai a, chhungkua din a, "Hraite, kal chhet chhet artui hlawh hlawh", an tih ve theih nan, Mizoram Kohhran hruaitute u, Pathian thupek zawmin ṭan han la teh u.

- Hausanga Hauzel