Arms laying & homecoming Mizoram chuan 'ber' nihna a nei leh ta!

'Eirûk tlemna ber' kan ti a, ziak leh chhiar thiam lamah 'ULLAS hnuaiah fully literate' tih te chu Mizoram dinhmun a ni mek a. Heng zawng zawng zinga bung kan kai thar ropui ber pakhat chu, a takin 'State ralmuang ber' a takin a ni ta zel hi a ni.

April 30, 2026 khan Central Training Institute (CTI), Sesawngah HPC-D (Lalhmingthanga Sanate Faction) chuan 'Arms laying' neiin, silai an tung ta! Heti hian Mizoramah hel (rebel) ralthuam keng an awm ta lo! Hei hi record a tling a, a takin state ralmuang ber kan nih tak hi.

‘Inṭhendarh tham kan ni lo’–CM

Chief Minister Pu Lalduhoma chuan programme-ah khan thu pawimawh, ngaihnawm leh ngaihtuahna tithui a sawi a. Mizote chu inṭhendarh tham kan nih lohzia a sawi a ni.

Hei mai bâkah hian thutlukna siam sual avangin Mizoram chu India ram state zîngah kum 20 laiin kan tlai phah tâk thu a sawi a. Kan ram a buai avanga kan tawrhna, thihna leh changkanna tur kum 20 ngawt kan hloh tâk te, Scottish Pattern min zawrh reng laia zir chiang loa kan hnawl te thlir lêtin, kan tawn tawh zawng zawngte kha paltlang leh dawn ila, kha rambuai ang kha tawng leh dawn ila kan la duh leh ang em, tiin mipui a zawt a ni.

‘Remna chhinchhiahna’–HM

Home Minister Pu K Sapdanga chuan, Chief Minister Pu Lalduhoma’n remna leh muanna atan a tawrh nasatzia a sawi a. Mizorama hel zinga silai keng zawng zawngin an silai an tung fel ta vek chu, "Kan Chief Minister hi symbol of peace a ni a, Mizoram mipui aiawhin lawmthu ka hlan a ni," a ti nghe nghe.

HPC-D-te hi 'faction' hrang hrang an ni a, ṭum hnih chu silai tung tawhin, Mizoramah hel zingah silai keng an awm tawh lo, tih theih loh turin HPC-D zingah Pu Lalhmingthanga Sanate faction hian silai an la tung si lo a. Tuna sorkar chuan nasa takin hma an la a, CID-te’n theihtâwp an chhuah bawk. Sipai 43-te chuan rifle 18, pistol 4, mortor 2, silai mu leh inbiak pawhna set-te chu an tung/hlan ta a. Sorkar lamin pawisa fai an inchhawmdawlna tur cheng nuai 129 a pe ve leh bawk. Hei bâkah hian sorkarin rehabilitation package an la ruahmansak bawk dawn niin a lang.

Unity Bridge

Kan sorkar hian remna lam hawiin hma a la nasa hrim hrim a, February ni 22, 2025 khan Mizoram leh Manipur inrina Tuivai lui inkalpawhna tur Unity Bridge hawn a lo ni tawh a, meter 200 laia thui a ni nghe nghe.

Pu Lalduhoma kaihhruai sorkar hian Mizoram chu a ralmuang zawng, eirûkna bo zawng, a intodelh zawngin a kalpui mêk a ni. A ṭha lam hawia hmalâkna hian rah ṭha a thlen zêl turah ngaiin, beisei ang.

~ Zoa Tlau, Buannel Cabin