THE BIBLE SAYS SO!

The Bible Says So! tih thupuia hmangin khawvel hun hnuhnung thu (Eschatology) chu vawi eng emaw zat chu kan sawi ta a. Space zau lo têah chuan han sawi zau viau a har hle a. Rapture kan tih mi thianghlim lawr (piangtharte) vana lâk chhoh an nih hun tur ropui leh lawmawm tûrzia pawh kan sep hlei thei lo a nih hi. Chutiang bawkin piangthar zawng zawngte vana Lal Isuan A lâk chhoh duak hnua lak ve loh, piangthar lote hrilhhai leh baihvai tûrzia, leh an mangan tûrzia pawh kan sawi hlei thei lo a nih hi. Kan Bible-ah chuan Lal Isua chu ringtu thi tawhte thlarau A hnêna A awmpui sate chu hruaiin (I Thess 4:14) vân aṭangin A lo chhuk dawn a (I Thess 4:16). Amah ringtu piangthar lo thi tawhte thlarau A rawn hruai thlak chu taksa thar pein A kai tho ang a, keini piangthar tuna la damte chu van taksaa tihdanglam kan ni bawk ang (I Kor 15:52). Chûng thil ropui tak takte chu Bible chuan "mitkhap kar lovah" a lo thleng dawn a ni a ti (v.52). Mi ṭhenkhat chuan piangtharte vana lâk chhoh bîka piangthar lote Sakawlh kutthlakna tuar tura hnutchhiah bik chu a va fair lo ve an ti fo ṭhin. Pathian fêrzia emaw chu sawi rih lo ila. Piangtharte vana A lâk chhoh bikna chhan pahnih khat erawh chu lo enho ta ila a ṭha ang.

Bible chuan Lal Isuan Amah ringtute hi, A sawi A sawi angin, an chunga A lawmzia lantir nan A lawmman A pe dawn a ni. Lal Isuan he leia A rawng i bâwlsaknaa i chunga A lâwm avangin A pe dâwn che a ni (Thu 22:12, my rewards A tih hi!). Chumi chu, piangthar lote pawlh buai lohvin, Amah chu Lal leh Chhandamtu atana pawma A rawngbawltute chu duhsak takin vanah A'n hruai chho bik ang a, chawimawina ropui tak A pe dâwn che a ni. Chu chu Bible chuan "Mi tinin (piangthar tinin) taksaa thiltihte, kan tih ang zela (lawmman) kan hmuh ṭheuh theihna tûrin Krista Rorêlna Ṭhutphah hmâah chuan tihlanin kan awm vek tur a ni si a" tiin a sawi (II Kor 5:10). I inpeih a ngai a nih chu! He hun hi Krista Nî tiin sawi thin a ni (I Kor 1:7,8; 3:13; Today's English Version).

Keini piangtharte hi Lal Isua Krista nena la innei tur kan ni a, kan pasal tur hi Tirhkoh Paula chuan min lo hualsak diam zu nia! (II Kor 11:2; Thup 19:7,8). Chu kan inneih nî tûr chu kan incheina an peihfel diam hunah a ni dawn a. Chu kan incheina mawi tak mai tur chu, he leia i Lalpa rawng i bâwl ṭhat leh ṭhat lohvin azir dawn a, he leia A rawng i bâwlna rilru kha Pathian lawmzawng a ni em tih kha a pawimawh ta em em a ni. Bible chuan he inneihnaa i hâk tur thawmhnaw chu "Mi thianghlimte thiltih fel a ni" tiin a sawi (Thup 19:8). I thiltih, i thawhlâwm pek, i zai, i thusawi, i ṭawngṭai et cetera zawngte kha thlir kir teh, Pathian hmuha rilru dik taka tih a ni em le?

He khawvela, mi thianghlim (piangtharte) min lak chhoh hma hian duh tak leh uluk takin kan Lalpa rawng hi i bawl zel ang u. Lal Isua tana rilru dik leh ṭhahnemngai taka thawktute chu lawmman hlu tak, mawi taka Amah nena kan inneih nîa kan hâk tur a ni a, Nang Lal Isuan A pêk che lâwmman chu a mawi ve ang em le? (Thup 19:8; 2 Kor 5:10).

Ti khan, mi thianghlim lawr a awmna chhan tur thil pahnih chu kan hmu ta.

Pakhat i lo en leh hrâm teh ang. Chu chu Daniela Hapta 70-na atan hun pêk a ngai! Eng vângin nge ni? A mi Israelte chuan an Messia kha an hai a. An Tora te leh an zawlneite thupuan aiin an pipute thurochhiah an awih zawk avangin, ahnam anga an Messia an pawmna tur hun ṭha kha an hloh a. Han hriatthiam mai theih loh zawngin Lal Isua khan thu A sawi ta a. A zirtirte pawh khan mak an ti a. "Engti zia nge tehkhin thuiin an hnêna thu i sawi?" tiin an zawt hial a. Kan Lalpa chuan "Van (Lal)ram thuruk chu nangni hriat zawng phal a ni a, anni hriat erawh chu phal a ni lo," (Math 13:11) A tih kha. A sawi zawmnaah chuan "...hmu mah se la an hmuh ṭhin loh va, bengin hre mah se la an hriat ṭhin loh va, a ngaihna pawh an hriat ṭhin lohna turin," A ti a nih kha. Israel fate khan an Bible-a awm reng chu hmu duh lovin an pipute thurochhiah Talmud ami, Mishash ami, Gemara ami an awih zawk a. Khawvel pumpui tâna Chhandamna Chanchin Ṭha hril darh tura Abrahama aṭanga A thlan (Gen 12:3) ni mah se Pathianin A hnawl ta rih a, hriat theih lohna rilru A pe a, Mosia lehkhabu an chhiar pawhin an hmai puan khuh ang maiin an hre thei tlat lo (Rom 11:7-10; II Kor 3:14,15). Tichuan paihthlak, sîra hnawl an lo ni ta. Kan Lal Isua chuan "Pathian lalram chu in hnên ata lâksak in ni ang a, rah chhuah tur (Jentail) hnam hnênah pek a ni ang tih ka hrilh a che u" A tih tak kha (Math 21:43) Pathian ram thu dawnga puang darhtu atan Jentailte chu thlan an ni ta tihna a ni a. Tirhkoh Paula pawhin "Pathian chhandamna thu hi Jentailte hnenah thawn a ni tih hre rawh u" tiin Rom khawpuia Juda awmkhawm te a hrilh kha (Tirh 28:28). Tichuan Chanchin Ṭha lam thuah chuan Israelte chu thlauh thlak leh hnawl an ni ta rih. Mahse Pathian chuan A mi atana A thlan (II Sam 7: 16,24) leh A chhungkaw hriat chhun (Amos 3:2) an nih avangin A thlahthlam hlen dâwn lo, A kai tho leh dawn! Chumi hun chu Daniela hapta 70-na hun chhung hian a lo thleng dawn! Israel-te bo dan hi a thûk hle mai. Mahse Pathian chuan chhungtea A lo neih an nih tawh avangin pianthar theihna hun hnuhnung berah, chutih laia an Messia pawmtu zawng zawng chu, an zavaiin an pawm tawh dawn si a, chhandamin an awm vek dawn a ni tih Bible-in a sawi chiang hle a ni (Rom 11:25-27). Hemi hun lo thleng tur hi a ni Gabriela pawhin Daniela hnenah, "Bawhchhiatna tikin turin, sualna titawp turin, khawlohna thianfai turin, chatuan felna la lut turin et cetera" tia a lo hrilh kha (Dan 9:24).

He hun lo thleng tur hi kan Lalpa pawhin A sawi, Mathaia chuan, "Chumi hunah chuan hrehawm nasa tak a awm dawn si a, Chutianga nasa reng reng chu leilung pian tirh ata tun thlengin a la awm ngai lo va, awm pawh engtikah mah a lo awm leh tawh hek lo vang. Tin, chung nite chu tihtawi ni suh se la, mihring reng reng damin an chhuak lo vang; nimahsela thlante avang chuan chu'ng nite chu tihtawi a ni ang” tiin a ziak a ni. Pathian chuan A chhungte atana A thlan Israelte chu piangthar hnuhnung berah A ṭantir dawn ta! Kan Lal Isua khan thu pakhat chiang taka a sawi chu Hnuhnung berte chu hmasa ber an la ni ang a, hmasa berte pawh chu a hnuhnung berte an la ni ang tiin A sawi. Pathianin Abrahama aṭanga A thlan, Pathian dik hre hmasa ber, Pathianin ka chhungte tia A sawi, Dan dawngtu, engkima hmasa ber ṭhin kha, an hnuaiah awm tura an dah Jentail te pianthar zawh vek (Rom 11:25) hnuah, hnam pumpuia la dam (remnant) te chu nunnaah an lut ve chauh ang a, Gabriela'n chatuan felna lakluh tur a sawi kha an Messia an chatuan felna chu an lo la lut ta. Hmasa ber nih hi a finis danin a zir loh chuan hnuhnung ber a lo nih theih a nih hi.

Jentailte famkimna, Jentail la damte pianthar zawh hunah chapo taka Pathian duhsak bik nia inngaite chu, a tawpa tawpah an Messia pawm vein Zion aṭanga Lal ber thuchhuak chuan A angchhungah A la lut dawn ta! Tin, eng nge lo awm leh dawn! E le, khawvel siam thar (Math 19:28; Thup 20:4; Isaia bung 65:17) a lo lang ta e, han thlir teh le!

- Upa F.Lal Thanzuala, Ph : 9436141242