KA NUIH PAWH AN TIZA LO E
Mizote hian kan ram neih ve chhun Mizoramah hian ei leh bar intodelh a, thlamuang taka kan awm hun tur chu, ṭhal tui angin kan nghak tlawk tlawk mai a nih hi. Hetih lai hian, tunhma aṭang khan, kan ram hruaitute chuan, khawi kawngah nge min hruai a, eng ram nge min hruai thlen dawn tiin tlumte thlir takin kan thlir reng bawk a. Nimahsela, tun thlenga min hruai thlenna chu hei hi a ni. Hranghlui deuhte chuan kan hre mai awm e, kan ram leh hnam an hmangaih vangin, kan ṭhalai tam takten mahni In lum pawh thlahlel thei loin, An vanglai nite chu, ramhnuaiah Vangvat leh thosi karah riahna mumal pawh nei loin hrehawm tinreng an tuar a. "Riahna run kan vai, tukloh ram daiah, Piallei hmun rem kan bel e," tiin, kan ram tan a nunna hlu tak mai, hlan pawh mi tam tak an awm a ni, ṭhangtharte hian an mahni kan hriat reng pawh a ṭha hle mai. "Aw i hming a dai lo vang, ṭhang leh thar chhuan tam hle mah se, Zoram chhana i tuarna hian a man tawk e, Chham ang i zalna" tiin. Nimahsela, Tun laia kan political party ṭhenkhatte chet dan hi chu, Ram hmangaihtu awm dan tur a ni dawn em ni le?. Hming ṭhat tum a, mahni ṭanghma hai vak mai hi. An puten Bula tu rawh, an tih vang a, Sa-pa-tal ta chiam chiam maite pawh an ang a lawm. Kan ram hmasawnna tur reng reng an lungkham lo a nih hi. Chuvangin, kan ram tana nunna hlu tak hlantute thlarau kha an zahawm ka ti hle mai.
Mizote hi kum za chuang Kristian kan ni tawh a, Ram rorelna pawh Pathian duh anga kalpui turin kan Bible-in min zirtir a ni, Nimahsela, kan ram hruaitu kal tate khan, he lam hi an hawi mawh hle a, Kohhran pawhin ṭan a la nasa reng a ni. Kumin 2026 pawh hian Mizorama kohhran lian ber Presbyterian chuan Puitling Sunday school-ah "Kristante leh Ram rorelna" tih kan zir reng a. Hetih lai a, kan ram hruaitu ṭhenkhatte khawsak dan han en hian, Kristiante awm dan tur chu a ni lo a ni, Kristan ni lote chuan lo ti pawh ni se, a hriat thiam theih a. Ram hmasawnna turin thil ṭha an ti bik ang, tih hlau ni awm tak a, Party ṭhenkhat an khawsa te, Dawt hmanga a chhe thei ang bera an inbei te, Ram leh hnam hnuk khawih pawh ni lo, mi mal chungchang an buaipui chiam chiam mai te, kawngpui ṭha sa, chhun chhiatte leh zun in lo vuak chhiat ringawtte, hriat tur a awm leh ṭhin a, A va Pathian thu loin a va zahthlak em, Heti anga tiṭhinte hian eng rilru puin nge, an tih ang le? Pathian nung rawngbawltute tih atan chuan a va tih chi lo ve.
Kan Pathian thu chuan, "In eng chu mi mit hmuhin eng rawh se, chutichuan in thil tih ṭhatte an hmu ang a, in Pa vana mi an chawimawi thei ang" (Mt 5:16) a tih laiin. Nimahsela, "Mi suaksulte erawh chu leilung ata tihboral an ni anga, Vervek taka titute chu tihboral phiar an ni ang". (Thuf 2:22) a tih ang hian kan awm mai ang tih a va hlauhawm em. Kan rama politician ṭhenkhatte chet duh dan han en hian ."Thil ṭha lo tih chu an lawm zawng a ni a, Thil sual bengtla lo mai mai-ahte an lawm ṭhin. (Thuf 2:14) a tih ang mai an ni zo ta a nih hi, Kei chu, tun laia kan ram party ṭhenkhatte chet dan leh awm dan hian, Ka nuih pawh an tiza lo e.
Khawvelah hian ka ram tih tur pawh nei ve lo, mi a nuai tel tak meuh meuh an awm lai a, Keini Mizote erawh chu chenna tur ram, Pathianin min pe hi, a lawmawm hle a ni. He kan ram hi Pathian duh dana ṭha taka enkawl tur chu kan ni. Hetih laia kumin 2026 Legislative Assenbly Session-a kan ram hruaitu inti ṭhenkhat awmdan leh khawsak dante kha chu, Naupang inkhualte lem pawh an tluk loin ka hria. Ram hmasawnna atana ṭangkai pawh ni lo, an buaipui a, hun rei tak boruak an han siam ringawt mai te kha, Ka rilru an ti na a, ka nuih pawh an tiza lo e, Pathian a zahawm hlein ka hria. Hawh teh u, Mizote u, Pathianin ram min pek hi, Amah duh dan anga enkawlin A lalna ram dinin a kutah i tlulut zawk teh ang u "Kan ram Krista kan pe, Kan rilru pawh kan hlan," tiin, Chutichuan, He kan ramah hian "Rorelna dik chu lui angin luang sela, Felna chu luipui kang ngai lo angin luang rawh se," (Amo 5:24) Amen.
- Hausanga Hauzel