DAMLO TAN SORKAR

Mi chhungkaw chunga thleng tura kan ngaih ṭhin khan kan chhungkua min luh chilh ve a, nunna inchhan thei lo mah ila, MUHCS erawh kan thinlungah a nung reng thung si. Mizoram Universal Healthcare Scheme kan sorkar hrawn mekin a tlangzarh tirh khan ka lo ralkhat huphurhpui tak zet a. A chhan chu khawvel ram changkang developed country te pawhin an buaipui leh, inthlannaa an auhla te a ni ṭhin.

Mizoramah pawh sorkar kal tawhten an buaipui tak kha a ni ṭhin a, hlawhtling tak erawh chuan sawi theih a la ni lo thung. Sorkar hmasa hun laiah khan Healthcare hi reimburse theihin an ti thung a, keini pawhin reimburse tura bill kan thehluh aṭangin hmun thuma ṭhena hmun khat chu kan hmu let ve nghe nghe, a za vaia senso hmuh let erawh a har viau ang, chhe tak tia sawi tur a ni chuang lo.

Mahse, i'n ti teh ang, ZPM sorkarin pawisa nei lawk lo, natna avanga lungngai rúm mekte tan zalenna dar a rawn khawng ta, tunah chuan empanelled hospital-a thawktuten, "In chhuak tawp thei, in bill tur sorkarin a peksak tawh che u," an tih thu Social media heng - Facebook, Instagram, Whatsapp-ah mi post kan lo hmuhte hian awmhmunah kan lo lawmpui ve em em mai a ni. A nihna takah chuan harsat mangan buai lai, sum leh paia chhungkaw tlakchhiat lai leh damloh lai te hi a innang duh phian a, heng hun han tawn hi chuan rilru hi a vak thui duh hle a ni. Kan mangan lai ber, kan harsat lai bera min puitute hi hriat reng an hlawh bik a, theihnghilhte hi an har bik riau asin. A tam emaw, a tlem emaw pek let tur nei ve lo mah i la, mi pangngai chuan rulh let dan tur hun remchang hi kan dap fo a nia.

Tin, mi tam tak hi sum leh pai neih loh avanga natna tuar tlawk tlawk mai hi kan lo tam khawp mai a, a bikin thingtlang lamah phei chuan damdawi in awm man chauh ni lo, vahvelna pawh hautak tham tak a ni. Chu'ng a nih avang chuan mi hriatpui loh hian nu tling pa tling tam tak hian an natnate hi an lo tuar ve tlawk tlawk ṭhin a ni. Heng harsatna tam takte hi thawklehkhatah kiam vek lo mah se, tun sorkarah chuan Hospital bill lungngai miah lovin, pawisa nei lawk lo tan pawh a inenkawl theih ta te hi a hlu lehzual ngawt mai.

Chuti chuan keini chhungkuaah pawh natna khirh takin min tlakbuak ve a, a damlo bera kha sorkar hnathawk sang lo tak mah ni se, Mizoram Universal Healthcare Scheme-ah chuan a inenkawlna cashless kha unlimited-in a lo tih theih reng mai a. Mi hausa ho chauh inenkawlna tur emaw kan tih; phai damdawi in ṭhate kan pan ve theih phah ta a ni. A damlo enkawlna senso kha eng anga tam pawh ni se, a natna rit hle mah se tawp chin awm lova MUHCS in a huam tlat avangin nuai 46 teh meuh mai Mizoram sorkarin min han tumsak a nih kha. A lawmawm bawk si, sorkar lakah a inthlahrunawm bawk si. Khi'ng sum zozai khi keini tan chuan khawiah mah chatuana kan neih loh tur a ni.

Heta ka sawi duh chu, Federation of Mizoram Government Employee & Worker (FMGE&W) ten nikum lamah khan MUHCS-ah sorkar hnathawkte huamtir ve lo turin an ngen a, an ngen hlawhtling ang tih a lo hlauhawm ngawt mai. Kan ṭhian sorkar hnathawk natna khirh tuarte damlo kan kan a, kan ṭanpui a ni tih hi hre tel thei se a duhawm. Anni ho thawhkhawm zarah sorkar hnathawk lote pawh a thlawnin an inenkawl thei ta si a.

Hetih lai hian MUHCS zawm ṭhenkhat, a bikin phai lam damdawi in te hian sorkar an dim lo mah mah em aw a tih theih. Ṭawng mawi lo ni lo se, damdawi in ṭhenkhatte hi chu sumdawng an ni ve bawk a, discharge bill summary vel han chhiar hian rin aiin bill an tisang duh ang reng viau. Sorkar hotute, Healthcare staff te zawng zawng ṭang zel se, Zoram mipui mamawh hi MUHCS hian rah ṭha a chhuah zel dawn a ni. Tun dinhmunah phei chuan Healthcare leh kohhran a insuihzawm tawh a, kohhran hrang hrangin an thuchhuah, an kohhran huam chhunga chhungkaw harsa, Healthcare zawmna sum leh pai nei lo an tihsak dawn thu an han chhuahte hi, a va Kalvari damna em!

- Eddie Lalhmangaihzuala