Community Based Tourism
Mizoramah pawh community-based tourism CBT hi kan uar tan a, hei aia uar chhoh zel pawh hi a tha maithei.
CBT-ah chuan a hlawkna kha direct-in khawtualah a lut nghal a, khualzinte sum thlauh kha khawtual intel khawm pawl, Mizoram angah chuan VC emaw, YMA emaw, society-te emaw pawh a huap thei ang.
Nikum 2025 Champhai Hnahsin Kut kan tih ang chi te kha khawtualin a hlawkna tam tak, eiin siam te, riahna siamte leh thil dang dang zuar ten a hlawkna an tel a ni.
Jan 6-7, 2026-a Phuaibuang khuain Tlaizawng Paradise an tih te pawh kha CBT huangchhunga khung chi a nih hmel bawk.
Khualzinte’n a sap ṭawng taka 'authentic experience' an tih an neih theihna tur thil, Hmar chawhmeh dik tak, Hmar bai, etc. chaw lo zawrh te, kan culture leh tradition ziarang lang thei hnam lâm emaw zai lo entir te pawh a tel.
Kum tawp ni December 31-a Sakawrhmuituai Tlang programme pawh Sihphir khawtlangin a tlawhtute atanga sum lengvak an dawn khawm kha a hlu a ni. Nikum 2025 lamah lozawh programme tam takte pawh CBT ang zawnga cheibawl zel a fuh mai thei.
Tourist-te’n hmakhawsang atanga Mizote eizawnna ber lo neih hnathawh dan te, hah taka kawla ni chhuak chhiara an thawh rah, kum tawpa hlim taka an seng dan a hmun ngeia entir a, an thlai tharte khualzin leh chhimtu mipuite’n ṭanpuina atan a man pangngai aia to deuha an lei te kha, a buatsaihtu khawtual mite ipteah a lut zel a, thil ṭha tak a ni.
CBT-ah hi chuan mass-tourism an tih mai, a huhoa Great Wall of China tlawh dum dum emaw, Eiffel Tower emaw thlirho ang kha a kâwk chiah lo va. Tourism hmanga khawilai khua emaw hmasawnna an hmuh theihna tur leh an khawsak phung leh hnam ziarang te pho chhuah theihna tur leh a tam thei ang ber khawtual mite an inhnamhnawih a, an tel ve theihna ang chi hi a ni a.
Entir nan, khualzinte’n khawtual mite an chenna hmunah khawsaktir (home stay) te, an kal velna tura lo hruai kual (tour guide)-a lo ṭanpui te, chung atanga mimalin sum an lo hmuh a, khawtlang hmasawnna tur atan tlem te te an lo pek chhawn leh te kha CBT-in a tum ber pakhat chu a ni awm e.
- Hruaia Kawlni