VANGVAT 764 thumal

Madonna leh Maradona hi. An hming hi i en chuan inlaichìnna nei an ang viau mai. Maradona erawh hi chu hre lo kan awm kher lo ang, a hun lai na nâ nâ chuan, a body erawh chu tâwi mah sê a sei tlat asin. Football ngainatû tân chuan hriat loh ngaihna a awm lo alâwm, ni e, tûnah erawh lei dàiah a zâl tawh a. Mahse a hming a dai tawh ngai lo vang. A HMINGAH hian "ra" khi awm lo se chu Madonna tih nên pawh a inang hial ang. An hming ringawt en chuan. Mahse an 'chemkalna' leh mihring mihrinnaah pawh chhim leh hmar ang hlauha inang lo, intu lo lutuk an ni si. Maradona a zai a thiam kan hre lo. Chutiang bawkin Madonna pawhin bâwl a pet thiam âwm kan hre lo. Mahse ani Madonna hi zawng, a hmêl leh a zâi a nalh em em thung a, chìk dâwl (reasonable) kan tih ang hi a ni ber ang chu. A tlo hle bawk a, a kuma phû lohvin a la lang naupang a tih theih. Pakhat a zaithiam, pakhat zawk bâwl pêt thiam, an inan loh dân a inang a ni ber. An inlaichîn lo phawt.

Zû leh ZIAL

A hriain in hria. An inlaichîn tlat alâwm, zû leh ZIAL chu. Mahse ka tia, zû pawh hi mi tam tak chuan amah mai chuan 'sual a ni hleinêm' an ti a, ka pawm zâwng tak a ni. Ni e, a awm hlê hlê te chuan mi pawi sawi hek lo i! I ti ve em ?Mahse, mahse... en mah rawh, mihring kaw chhûngah a lût a, an lo danglam tâ, a hma zawnga an sawi duh/ngam loh kha an sawi ngam ta sî, mite tâna pawi tur pawh dâwn lovin an sawi ta piap piap mai le... hûi... Cho loh loh tûr tur an cho...an va nâwi... chu chu alâwm ka tih reng, mihring kaw chhûnga a luh chiah khân an lo danglam ta ṭhin a. 'Danglam dân danga danglamin.' Zu chu sual a ni lo' titu kan nih chuan "zu bâwihah," zu thuhnuaiah awm lo ngam ang u, chumì ni tûr erawh chuan i kaw chhûngah a awm phal suh, a sâ ang a, a lum pup ang a, i sawi loh loh tûr i sawi vê mai ang, chuvângin kan pum chhûnga a luh i phal lo ang u. Zu duh chuan zial a duh loh theih loh, chu chu chiang sâ, sawi tam a ngai lo e.

YMA leh ÂMY

Hei erawh chu ÂMY hming hi chu mizo nula tleiràwl hmêlchhe lo zet leh nungchang ṭha em em a ni thung a. A intisâp ve lo va, sâp ṭawng leh vai ṭawng erawh chu duh tawkin a thiam, a pianpui ṭawng ang tlukin a thiam, mahse a nun a tlàwm tlat, ngaihsân tur dik a ni. A hming khi a lêtzâwngin YMA tih a ni a, an nun chu inang tak a ni, kan hria. YMA thiltum leh hmachhawpte, nang leh kei hian kan thiltihte hmangaihnaa tih a nih chuan a YMA e, YMA chu puih ngaite puih, fuih ngaite fuihtu, chhan ngaite chhantû, hnem ngaite hnêmtû a la ni reng. A la danglam lo, nangmah zawk khân YMA hi i lo changkânsan ang e âw... ÂMY leh YMA hi an inan dân erawh a inang lo mai a ni. Pâwl hming a nia, pakhat erawh mihring hming a ni. An thiltih leh hnathawh erawh chu mite tân a ni zâwk, a ni, mite tân a ni zâwk asin. An inang.

PHÎRA leh PHAWKA

'Mihring pakhata minung pahnih' chu, mìze pahnih kan nei a, a ṭhen chu, khaimah aw, mi ze pahnih chu, 'thup ngai leh thup ngai lo,' a dik em? Â diikkkkkkk... Chu chu alâwm PHÌRA ka tihna chhan... 'Double role.' Pathian hmâah chuan kan inngaitlâwm em em a, sual nei lo ang maiin kan awm a; mahse chawlhkâr thar a lo nia, a ṭhen chuan an zia an thup ta daih a, an tâ tûr ni lo, khawi lâi kawng emaw, Zoram hmasáwnna tûra hnathawhna tûr chu an ipteah an ak ta daih a, i dâwt ngam leh dâwt la, i in ngam leh in rawh, tu ma'n an hmu lo che emaw i tia nge, ak rawh, thâm la, EIRÛ rawh, hlêpru la, mì tihdân alâwm, i lo hausa ang a, mi zah i kai thuai mai ang. Kohhranah te, pâwl "association"-ahte hlei hlei thawhlâwm thawh awk awk la, i "promotion" chu a chak viau ang. Mahse, i thawhêng, i hût ru tlat atin lâwm. An chhui ang che 'nga, jail bang i zût mai ni lovin i hrût hial ang. Chutah i hnap i sût i sût mai ang. I phawk a maw i tih kha i thiltih dik loh an "PHÂWK" záwk che asin, PHAWKA... I phîr.

Hmangaihna âw

Chutiang a thlen loh nân, zoram hmangaihtû tak tak kan nih chuan a leilung, thing leh mâu leh mihringte lam pawhin tihchhiat kan phal ngai lo vang. Sum leh ruihhlo avânga hlâwkna leh hausakna ringawt atchilhtûte erawh hi chu Zoram "fahrawn" an nih loh vêk pawhin Zoram VANGVAT lian chî, "hringmi VANGVAT saitrial" an ni hial ang. Thisen an dáwt a, an la duhkhawp lo cheu nia! An va râpthlâk êm! Nang chu chutiang ni vê lovin hmangaihna tak tak i chhâkchhuak ṭhîn ang. Kha deuh mah sê, i pumah a thlum veng veng thung sì ang. Zilhhauhna hi thil ṭha lo laka min puitu a ni. Hremna emaw lo ti suh. Gehenna lak ata chhanchhuaktû che asin ni. Pâin fâ a hmangaih tak tak chuan nunna a neih nân a khawlohnaah a hrem hreh lo. A sim erawh chuan Zoram hian hmangaih takin a lo kuangkuah ang a, "Ka fâ lo hâw rawh, i tân ka lo ṭawngṭai reng asin," a la ti ang.

"Sual dovin thisen chhuak khawpin in la ṭang lo va," tih hi DIKNA lama ṭang inti sîa mite thisen va chhuah lam a ni lo, mahni zawk kha dikna ṭan avânga tuarna (tawrhna) kan thisen hial chhuak khawpa tuar (tawrh) ngamna, thudik ṭanna a ni zâwk.

"Sual dovin thisen chhuak khawpin in la ṭang lo va,"

(Hebrai 12:4) Khua pawh a vâr dâwn tâ.

- K. Lalmalsâwma, Ramhlun North, Basic Mual