RAM HRUAITU CHU
Khawvel demcracy ramah chuan ram hruaitute chu duhsakna leh zahawmna nasa takin sawrkarin a cheibâwl a; minister-te ngat phei chu mipuite aṭangin duhsakna te, lawmpuina te, zahna te an dawng reng a. Eng vangin nge dinhmun ṭha leh zahawmna pek an nih kan tih chuan, dinhmun ṭha aṭangin thahnemngai leh dik takin hma lam pana ram tan hna an thawh theihna tur atan a nih bakah, awhna rilru lakah an fihlim theihna tur pawh a ni.
Vote hmanga thlan tlin an nihna chuan democracy ropuizia leh a hlawhtlinna an rawn tarlang ṭhin. Zahawm leh nuamsa taka cheibawl ni mah se, mite hmaah chuan tláwm taka nun dan zir thiam chu an tih tur a ni ngei ang. Mi chi hrang hrangte’n an harsatna an thlen theihna hmun a nih hian ram hruaitu chu a hming a lo ṭha ṭhin a ni.
Ram hruaitu chuan mipuite hnenah dikna chanchin ṭha hi an hrilh tur chu a ni. Rinawm taka an thil tih tawhte mipui hnenah puanzar a nih hian ram an hmangaihna a lo sawi tawhte chuan a rawn nemnghet ṭhin. Thianghlim taka rawng an bâwl hian mite’n an hna chelh chu an phû rêngah an ngai a, inthlan leh hunah pawh thlan tlin an lo ni leh mai ṭhin.
Ram hruaitu, mi dangte chanvo ngai pawimawh hmasa ṭhin chu a thâwm ri a mawi a, mi rilru a hneh ṭhin. Awhna leh îtna avanga lo thleng Eden huana eirukna thubuai chu kan Lalpa’n min chinfelsak tawh a. Khawvel pumah eirukna hi scandal lian ber a la nih avangin hetiang laka fihlim thei ram hruaitu chu a fakawm a ni.
Chhungkhat lainate aiin râlkhata mite chu an tam zawk daih a, chungho chuan an lo thlir reng a, an duh hunah an thlang tling a, an duh hunah an paih leh mai ṭhin a ni. Ram hruaitu hna chu ram hruai a nih avangin a khirhin a hahthlak a, hahdam leh nuamsa taka ram hruai hna kalpui a nih chuan ram chu a lo tluchhe mai ṭhin.
Ram hruaitu chuan dik tak leh taima taka ram a hruai chuan a bial chhung mite’n hma an sawnin an lo hlim tlang ṭhin. Duhsakna vote avanga thlan tlin a ni tih hre rengtu chuan thiam takin a nun a hmang a, a thil tihte chu a dinhmun sawh ngheh nan a hmang thiam zel ṭhin. Mi fing finna leh remhre remhriatna tiboraltu chu Lalpa a ni a, Lalpa ṭih erawh chu finna a ni.
- H. Neihchungnunga, Durtlang