LUIPUI DUNGA LEN ZAI I REL ANG AW

Nipui a lo thaw a, thlasik khaw vawt tak maiin duhtawka a hmeh avanga chakna nei tawh lo, thing hnahte chu an tla zawih zawih mai a, thing tinte chuan khaw lum boruak hnuaiah chuan hnah thar an rawn chhuah hring leh ta hlep hlep mai le. Chung Pathianin a anpuia duh taka a siam keini mihringte pawhin pawnthuah lum leh thawmhnaw lumte dahṭhain, khaw lum silhfen kan inbel leh ta a ni.

He nipui boruak nuam takah hian, ruah sur avanga nun tibahlahtu awm lovin, hun thawveng takin kan hmang thei a. Zing varṭianah han harh ila, râl hla taka Kiltheihrawk hrâm lauh lauh ri hriat tur a awm a. Khawfîng a lo chah meuh chuan nungcha tinrengte chuan hlim em emin awrâwl chhuah meuhin an zai chuah chuah mai a nih hi. "Zingah savate’n Pathian an fak a, pangparin a ropuizia a entir fo," tih hla dikzia min ngaihtuahtir fo ṭhin a ni. Boruak thengthaw tak hnuaia Tuklo hram ri dut dut han hriatte hian, eng thilin nge min zem le? engtin emaw tak hian lung a leng veng veng mai a nih hi.

Ram dang leh hmun dang chanchin chu ka hre vak lo a, nimahsela, ka hriat ve chhun chu, nipui laia Zo fate’n kal kan chak em emna ṭhin hmun a awm a, chu chu luipui dungah a ni. Mizorama kan luipui dung leh a kam vel hi nipui lai chuan a tuihulin a nuam em em mai a, fûr laia tuipui-suthlah leh rairuang zing phui lûk te chu an ro zo vek a, lui dung chu a veng eng huai mai a ni. Lui sir tawn tawnahte chuan thing leh mau an rawn kur siau siau mai a, chung thing leh mau karahte chuan Vazar rual an chiar nuai nuai a, chêpa a zuang zak zak mai bawk a. Lui dung chu a faiin a kaw rul mai a, luikawr a kawi hma chuan lui dung chu thui tak tak a lang thei a ni. Lui dungah chuan Chínrâng leh Lalruanga-sehnawt savate pawh an sawt thauh thauh a, a khât tawkin Safia ek hmuh tur a awm reng bawk. Tawn fuh phei chuan chêngkek hmin leh hruipui rahte lui kam velah chuan hmuh tur a awm ṭhin a ni.

A huhoin emaw, ṭhian dunin emaw nipui lai hian Mizote hi luiah kan kal nasa em em a, a ṭhenin chengkawl leh chakai an khawrh a, a ṭhenin sangha an vua a; sangha chauh man loin kaikuangte pawh man tur a awm bawk ṭhin a ni. A ṭhenin sangha awmna nia an rin deuh, pûk lo hung laih laih tawk an awm bawk a; dil tui lo sah kang tawk te, khawi lai dûmah emaw te chuan tuikep lo inthiat fur mai lo chhar mawlh mawlhte hmuh tur an awm bawk ṭhin. Lui kama tumbu lêng leh kawhtebel lo zawng te, aidu sentil lo khawrh tawk an awm bawk a. Ankhapui zawng leh hruizik kheh te an awm ve reng a. Nipui sen sa hnuai mah ni se, luipui tui fim tak mai inchiah daihna awmna luipui dung tluan hian hlim nui ri awr awr hi a thang rawi rawi mai a ni.

Tunlai hian Mizoramah rêl a lo luh tawh avangin ram dang mi Mizoram rawn tlawhtu an tam hle mai a. Hengho sawi tam ber chu, Mizoram hi mawi an tih thu leh nuam an tih thu hi an sawi uar hle a ni awm e. Nipui laia Mizoram luipui dung nawmzia hre tur leh hmu tura tih dante hi awm se a va duhawm em. He kan lui dung nawmzia hi tlawhin han hre ve hlawm se la chuan, "Luipui dung kan zuk thleng, Lengi lunglawm nui ver ver," tia kan hla sak ṭhin hi a takin an hrethiam ve mai tur a ni.

- Hausanga Hauzel