Letter to God

Kan thupui hi lo hre ṭhin tawh kan awm nual ka ring; Sap film pakhat hming a ni a, naupang cancer veiin Pathian hnena a thawn ṭhin chungchang a ni. Tunlai mite chuan lehkhathawn hi kan hre tawh lo vang, a aia ṭha leh rang, chiang thei bawk si smartphone kan neih tak vang a ni. He film-ah hian naupang hian lehkha a chhungte’n an inthawn ṭhin chu hriain Pathian hnenah lehkha thawn ve a, dak bâwmah a thlak ve rap a ni. Dakin hnathawkte leh khati lai biala doctor-te thin a ṭhawng hle a, keini ang bawkin an rilru pawh a hneh hle niin ka hria. He thawnthu ang bawk hian kan Mizopui, kan unau, fanu, fapa te ruihhlo, zu bâwiha tâng mekte leh mahni inzuar ṭhinte chungchang han sawi kan tum a ni.

Ngawlveite’n Pathian hnena an lehkhathawn:

“Vawiinah lehkhathawn ziak theia kan la nung hram hram hi kan lawm hle mai. Kan tan chuan biak in thlen a buaithlak em em tawh a, Bible kan chhiar thei lo a, ṭawngṭai turin chakna reng reng kan nei tawh lo bawk. Kan chhungte chu sawi loh, mi zawng zawngin min ten a, min duh tawh lo vek a ni. Kan bâl em em a, ei leh in thianghlim pawh kan ei ngai lo. Kan tei kan tei a, hmun remchang laiah te kan riak ve mai ṭhin. Kum la naupang tê ni hlawm mah ila, kan dam chhung hi a rei dawn lo. Kan duhthlanna kan lo hmang sual ta si a, kan tan inchhir a sâwt tawh bawk si lo. Keini zawng kan chan hi kan phu ve reng a ni, kan thiam lo a ni e. Aw Isu, i awmna aṭang khan min han hre reng ve thin dawn nia.”

Nawhchizuarte’n Pathian hnena an lehkhathawn:

“Dam takin chibai. He kan lehkha hi I lo hmuh hunah khawngaih takin min lo chhiarsak ve hram hram ang che. I duh loh zawng leh huat ber zawng ti ṭhintute kan ni. Kan mihringpuite pawh zah zo lovin kan inzuar a, kan ṭawpin, natna hlauhawm tak tak thehdarhtute pawh kan ni ṭhin. Biak inah kan kal a rem chang tawh lo a, mite’n min hria, hnawksak mai kan ni. Ṭawngṭaite pawh kan tan a harsa, kan pawisa hmuh ṭhinna nen a inpersan; chaw kan nghei mai dawn si a. Bible chhiar turin chakna reng kan nei tawh lo, kan ke aṭanga chhip thleng hian chak lohna chuan min phuar bet tlat a ni. Hremna kan phu ve ngawih ngawih a ni. Kan thiam lo a ni e. Mahse, aw Isu, mual kan liam hma ngei hian i awmna hmun aṭang khan min rawn hre reng dawn nia.”

Lehkhathawn chhanna:

“In lehkhate ka lo hmu a, uluk takin ka lo chhiar a. In nun in ning, sim in duh tih ka lo hria a, ka lawmin ka phûr hle mai. Tunah hian sawrkar leh kohhran buaipuiin in tan chhan chhuahna neih mek a ni. Zu ngawl veite leh KS te lo zam suh u, ka mite an rawn che dawn e. In duhna leh tumna erawh a pawimawh dawn. Hrehawm in tuar ang, mahse, hengte hi nakinah chuan in tan lawmna a la ni zawk dawn a ni. Ka kohhrante’n an ṭawngṭaipui ṭhin che u a, chet lak zel dan tur pawh ngaihtuah a ni ang. Kei chuan mi ṭha leh ṭha lo chungah ang khatin ni ka chhuahtir a, ka tlaktir leh ṭhin. Ka kohhran ṭhalaite hi rawn tirh ka duh ber, anni hi an taksa te a la ṭha a, an chak bawk a. An committee-naah ka lo sawi ang a, hmun hnaivaia awm, chhan chhuah ngai site in ni tih ka lo hrilh ang.”

Eng emaw deuh lai aṭang khan ruihhlo ngai an tam hle a, keini vengah pawh an awm nual mai. An awmna leh enkawlna hmun lamah buaina a awm vang ni tein a hriat theih. An chhui zauna aṭang chuan heng mite hi chhungkaw kehchhia, enkawltu mumal nei lo an ni duh hle an ti. Mi pangngai chhungkua aṭang pawn a awm theih viau mai; sawi tur kan hre hlawmin ka ring. Hmeichhe inzuarte (KS) pawh an tam hlein ka hria. Facebook-a indah, tlema sexy deuh, lock tlat bawk site hi an inzuar a ni duh khawp mai. Hmeichhe inzuar ṭhinte hi an hmel pawh a pangngai ang reng viau ṭhin a, mahse, kan vei lutuk loin ka hria. Zu ngawlveite pawh kan chenpui nawk nawk tlangpui; tihngaihna vak kan hre lo. Kohhran leh sawrkar, tlawmngai pawl ten heng ngawlveite leh KS te hi an bei nasa hle ṭhin a, vawiin thlengin tih theih erawh a tam lutuk lo ṭhin. Kan ṭawngṭainaah erawh chuan taima takin i telh zel ang u.

- Lalchhandama Colney, Ph-9862982321