E KHAI! HLIM RAWH U, NUI RAWH U

Mizote hi hnam hlim thei tak kan ni a, kan pi leh pute pawh kha, kawla ni chhuak chhiarin, ramhna thawkin an feh ṭhin a, heti chung hian, an hlimin an nui bawk bawk thei zel a ni. Rokunga pawhin, "Turni sa khuangruah sur, thosi karah, Hah takin thawkrim mah ila, Mizo kan ni alawm kan hlim ang chu, Kan hun awlte i hmang ṭha ang". tiin Mizote kan hlim theihzia hi hlain a lo chawi hial a ni. Mahni thawh chhuah ring a, tu thuhnuaiah mah kun loa awm ṭhin an ni a, Kristian an nih hnuah phei kha chuan tisa leh thlarauah an zalenin an hlim em em mai a. Khawvelah hian tumah an awt lo tih mai tur a ni. Heti anga hlim taka nun an hman lai hian kan ramah politic thli chhia a rawn tleh a, kan zalenna kulh rawn chhem chimin, kan hlimna par mawi chu a rawn chhem chhe ta vek mai a. Mizo kan ni a lawm, kan hlim ang chu, tithei reng reng loin kan awm ta a ni.

Kan politician te chuan thilsemin vote an rawn zawng a, thil eng eng emaw mi an tiam bawk a, An duhsak zawngte chuan, thawk loin sum an nei theih a, an hausa thur thur ta mai a, Kristainte tiha mawi pawha kan ngai loh, Dawt leh phuahchawp hmangin sum a lo lak luh theih ta a ni. Kut hnathawh a hlawk lo em em a, a thawk hah hah retheiin, a hah lo lo an hausa emaw tih mai turin kan awm ta a le. Kut hnathawka ei zawng peih a ram kan awm ta lo a ni. Kan thlai tharte lah chu man man taka hralhna tur awm hek lo. Mahni intodelh tum tlat ṭhin Mizote rilru chu a lo hnual zo ta a. Thawk lova neih tum, sem beiseiin mi tam tak, kan dak fan, kan dak fan ta hlawm mai a ni. Hetia thatchhia leh zawmthaw taka Mizo mipuite boralna kawnga kan kal lai hian, ZPM Party-in rorelna fawng an rawn vuan ta a, Tunah chuan boruak a rawn inthlak ta rup mai le.

Mizo mipuite u, Han hawi vel te u, mi pangngai tan chuan, hlima lawm lohna chi a ni lo e, "Zan thim chu kan pel ta, Kan tan khua a var ta, Khawvel rilru hlauhawm a bo, lungngaihna kha, Raltiang tlang mawi taka ni eng lo chhuak angin, Thlamuantu a lo thleng". tih hla kan sak ṭhin ang maiin, He kan zoramah ngei hian, beisei pawh kan beisei ngam tawh loh, a zakthei lo leh a duham leh dawtsawi thiam thiamte dinchhuahna chauh ni tura kan ngaih hial tawhnaah hian, Eiruk tum loten diknain ro an rawn rel ve ta e, Mizote tan hlim leh lawmna ni a lo chhuak ta a nih hi. Chuvangin, Mizo Kristiante "I hlim ang u, Lalpa fakin, Kan Tlantu, kan Pathian fakin, I thinlung ngui tunah lawm rawh, Hei hi chawlhna tur chu a ni, I hlim ang, i lawm ang," tiin i zai mai ang u.

Tun hmaa kan la hriat ngai loh Kut hnathawktute thlai thar sawhthing te, aieng te, hmarchate leh hmunphiahte chu sawrkarin a lei ta chur chur mai le, tunah chuan kan thlai tharte ram danga thawnchhuahna kawng pawh rawn inhawng tain Rel a lo lut ta zel bawk a. Hei chauh pawh hi ni loin, kan thlai tharte ṭangkai zawka kan hman theih nan, khawl hmanga sawngbawl turin sawrkarin ṭan a la ta zel bawk a nih hi, Chuvangin, kut hnathawktute tan, Mizoramah khua a var ta e, a va ropui tak em, Tunah chuan mi taimate chuan thawh tam loh hlauin zing varṭianah ram lamah an liam ta zut zut mai le. A thawk peih leh taima ma dinchhuahna kawng a lo inhawng leh ta, A thlawna sum dawn tuma party office-a inhawr tuau tuau te, party hruaitute intlawn siak luih luihte a bo zo ta a, Kan Pathian thuin "Lalpa chu ring la, thil ṭha ti rawh, He ramah hian awm la, rinawmna um zel rawh," a tih chu kan thupui a ni thei ta e. E khai! Mizote u, Hlim rawh u, nui rawh u.

He dan kalpui a nih hnuah geologist consultant-te hian AMC huam chhunga technical license holder-te’n in sak an dilsakte dilna an dawn hnuah, in hmun laih dil zawng zawngte chu a hmunhma ngeia tlawhin, an report theh luhte chu an lo endik a. A him leh him loh thlenga an finfiah zel a ngaih bawk si avangin an indaih ta lo hle a, technical license holder thlan chhuah aṭangin interview tur koh an ni leh a, kum 2022 November khan geologist consultant pakhat lak belh leh a ni. AMC area zawng chu geologist consultant pathumin chauhin tun thlengin an la vil tihna a nih chu.

SDSM Regulations ṭobul leh nihphung ṭhenkhat kan tarlang ta a. Kan khawpuia in sak dan kaihhnawiha party hrang hrangte’n an manifesto lama an dah dan te leh mimal anga hmuh dante han sawi zui ila. Television lama party hrang hrangin an manifesto an sawifiahna leh sawi zauna te ngaithlak tel a ni bawk. A hmasa berah chuan India National Congress (INC) manifesto-ah chuan hetiang hian kan hmu:

(1) AMC huam chhunga building sak phal lohna hmun, Green Zone leh No Development Zone-a puan tawhte nasa zawka humhalh a ni ang. Heng lai hmuna building sak tawh leh sak mek te pawh an phalna neihte ennawn a ni ang a. Phalna nei lo leh phalna ang ni lova in sak (construction) chungchangah dan khawng taka lekkawh a ni ang.

(2) In sak phalna pek dan hman lai hi ennawn a ni ang a. Tun aia chak leh rang zawkin hmun hima in sa thei tih hriat chiante tan in sak phalna pek a ni tawh ang.

A chunga mite hi kan mamawh leh tihhlawhtlin theih atana ṭha tak a ni. Chak leh ṭha zawka hmalak a nih theih nan, dan lova kut lo thlak tawhte hremna dan siam leh endik kawnga tha tih chak a ṭul dawn a. Party thil tum tihlawhtling thei tur hian thawktu lak belh pawh a ṭul ngei ang. Technical license holder-te tih tur leh mawhphurhna pawh inhrilh nawn pawh a ngai ang. In sak dan endiktu (enforcement) ṭha hi dan hlawhtlin theih nan chuan a pawimawh khawp mai. AMC-ah hian dan kengkawh kawnga viltu tur leh a ṭul anga hma la thei tur hi MPS officer leh a naute (police) eng emaw zat te hi awm tel ve se chu an ṭangkai viau a rinawm.

A pahnihnaah chuan, Mizo National Front (MNF) lam thil tum hi han thlir leh ila.

(1) In sak phalna (building permission) leh lei laih phalna mumal zawk leh rang zawka pek chhuah a nih theih nan hmalak a ni ang. Building permission pek tawh, in sa zo mai thei loten awlsam zawka permission an renew theihna turin ruahmanna siam a ni ang.

(2) Sum tlem zawk chawia 'Soil Test' tih theihna turin hmalak a ni ang; tin, mipuite awlsam zawk nan AMC-ah Soil Testing Laboratory din tura hmalak a ni ang.

(3) In/building hlui ṭhiah phalna rang zawka pek chhuah a nih theih nan ruahmanna siam a ni ang.

(4) Aizawl khawpuia chengte tan leivung paihna hmun (dumping area) siam belh a ni ang a, leivung paih dan mumal zawk siam leh hman a ni ang (Hei hi AMC hmalakna kal mek a ni a, a hmun turte pawh zawn mek a ni).

AMC lama sorkar zo chiah an ni bawk a, hmalak mekna thlengin an rawn tarlang tel a. Mipui min nghawng ber chu phalna pek chhuah tlai ṭhin hi a ni a, thawktu lak belh ṭul thu pawh hre chiang tak tur an ni. In sakna tur hmuna ‘soil test’ chungchang tarlan tak erawh hi chu AMC tan phurrit a ni thei; laboratory tur hmunhma buatsaih, hmanrua lei leh a khawihtu tur rawih a ngai dawn. Tuna soil test theihna hmun hrang hrang–Geology & Mining Lab. te, Central PWD Lab. te, Dept. of Civil Engineering leh Dept. of Geology, MZU te, Dept. of Geology- PUC leh Zirtiri College te, leh Aihniar Lab. (College Veng) te a awm mek a. A tlangpuiin, soil test tur dah aṭanga result an pek chhuah inkar hi a rei lo a, ni 3/5 vel chauh a ni ṭhin AMC-ah kan neih belh theih erawh chuan mi tam berte’n kan ban phak, rate tlawm zawk leh chak zawk pawh kan neih phah thei thung. Laboratory tam leh changtlun zawk neih theih chu hmasawnna kawng khat a ni ngei ang.

Permission renew leh in hlui ṭhiah phalna hi chu, online portal hman a nih avangin, hetiang tih ngaite’n anmahni dilsak theitu–architect/engineer-te hi ruai hma thei ta se, a kal chak ngei ang. Mi tam zawkte’n kan hriat fuh loh avangin kan lo tlai phah ṭhin. Tuna kalphung mek aia awlsam leh ṭha zawk pawh an ruahman tel thei ngei ang.

Zoram People’s Movement (ZPM) hian kan sawi mek chungchangah hian manifesto-ah pakhat an rawn dah a, chu chu:

(1) AMC huam chhunga in sak buaipui chhung rei lutuk tihziaawm nan Building Regulations 2007 leh Site Development & Slope Modification (SD&SM) Regulations, 2017 te en nawnin, a ṭul angin siam ṭhat a ni ang.

Ka’n han ûm zui duh mek laiah chuan pakhat chauh hi an dah nâ a, tihhlawhtlin theih chuan awmzia a nei ngei ang. A chunga tarlan tawh angin, heng thil tum tihhlawhtling tur chuan SDSM hnuaia thawktu lak belh a ngai dawn. Han sawi belh ta hret ila, tuna geologist consultant pathum chauh hi chu dilna a luh tam dante thlir chuan a tlem deuh, mi panga emaw tal, a awmsa ti chak tura lak belh a ṭul. Geologist consultant-te hi SDSM dana ki pawimawh tak an ni si a, an tha tihchak nan an dinhmun siam ṭhat pawh a ngai.

Building Regulations ennawn hi ṭulna a awm mai thei a, kum 2025 November thlaa Seismic Zone ennawnah, Seismic Zone VI-ah kan awm ta a. Hemi in a keng tel, building sak dan turte hi kan zawm dawn a nih chuan, zone factor (0.36) chu danglam lo mah se, eng emaw lai chu siam ṭhat lai tur chu a awm ngei dawn. SDSM bik pawh hi kan hman aṭangin official notification hmanga tihchak zeuh zeuh ni mah se, amendment a la ni lo. Chutihlaiin, kum 2/3 liam ta aṭang khan regulations hi ennawn (amend) a nih theih nan rawtna hrang hrang, pawl anga rawtna te bakah committee dinin chhawp chhuah a ni tawh bawk. Manifesto-ah dah a nih ang hian thil ṭul tak a ni.

Vantlang in lian leh hmun pawimawh tur ang, building pawimawh ruhrel din dan tur ruangam lo thlira lo ennawntu structural engineer expert-te awm khawmna, Structural Review Board (SRB) chu March ni 5, 2025 khan siam a ni a, a ṭangkai hle. SRB hian building pawimawh (biak in, hall, office, school, hospital, etc) sak dilnate chu Structural Design Basis Report (SDBR) hmanga thehluh a ngaih tak avangin, he report hi an lo thlir ṭhin. Heng ang vantlang in pawimawh ni si, phalna chhuak har kan tih tam tak hi SDBR felfai tawk lo, dik lo leh siam ṭhat ngai te a ni fo. Hetiang ang sak a nih dawn chuan architect leh structural engineer te, civil engineer tawnhriat ngah tawh rawih a finthlak.

Kan party lian pathumte manifesto han thlir hian, AMC-in in sak chungchang hi tihchak a ni dawn tih a hmuh theih a, a lawmawm tak zet a ni. An thil tumte han thlirin, heng kan han sawi chhuah bak thil tam tarlan a ni tel ṭheuhte hi a lawmawm hle. Mi tam tak tan chuan AMC office hi pan leh dawr a harsa a, online hmangin eng emaw zat a tih theih theih ta bawk. Kum 2018-a Online Building Plan Approval System (OBPAS) hman anih hnu phei kha chuan architect te, structural engineer te leh civil engineer-te tan chuan building dilna theh luh te, dilna thlen chin leh siam that ngai lai thlengin online-in a tih theih vek tawh. SDSM bik hi OBPAS anga tih ve theih a nih hunah chuan dilna theh luh leh siam that ngai lai siam ṭhat te, kan dilnain a thlen chin bakah, phalna hmuh dan thlengin a hriat zung zung theih tawh ang. Tu pawhin sorkarna chang se, online hmanga tih theih tura hmalakna awm mek hi tihhlawhtlin ngei ni se la, kan manifesto-te hi a hlawhtling nghal thei ang.

Mipui hian technical license holder-te hi kan mi chhawr an ni tih kan hriat nawn fo a ṭul; hriat chian loh leh, hriat thiam loh kan neih pawhin zualkoa phun nghal mai lovin, kan zawh fiah fo a ngai. AMC office lam thiam loh nia kan ngaih tam tak hi chu dilna lama siam ṭhat ngai lai, lo hriat loh palh te, tih dik loh awm te, theh lut tlai te leh phalna hmuh tawh si inhrilh hriat ni lo te a ni ṭhin. In sak kan dilna kawnga kan sum senso tam ber pawh hi AMC lama lut ni lovin, kan mi rawihte hnena kan pek a ni bawk. Technical license holder-te nen hian kan inbiak pawh tawn reng a ngai.

Khawpui a ṭhang zel a, kan himna, kan ṭhatna tura sorkar hmalakna a ni tih hriain dan ang taka hma kan lak a, kan insenso ve pawh a ṭul ta. Mipuite’n thu kan awih a, dan zawm pawh kan tum hle, hmasawnna tur erawh kan nei. Syria ram lirnghing kha kan la hre reng awm e. Building regulations ṭha tak an nei a, an lo zawm ṭha leh si lo; lirpui a han nghing hnu chuan an thil tih dik loh pawizia an hria, mi tam tak an thi a, an in leh lovin a tuar bawk. Ram dang, khawpui dangte tawrhna hi kan inzirna tur kan darthlalang ni se.

Kan hma hun kan hre lo, leimin leh lirnghing avanga chhiatrupna tuar thei reng kan nih tih inhria ila, kan technical license holder-te thurawn kan ngaichang ang a, phalna kan hmuh ang takin lei kan lai ang a, in kan sa dawn nia. Hmanhmawh lutuk leh dilna min hmuhsaktute thu awih loh hi a hnu lama buaina leh harsatna min thlentu a ni fo. Lirnghing laka himna chu in sak dan dik leh ṭha hi a ni. Kan biak in, puipunna leh infiamna hall, sikul, office, chenna in te hi mithiamte duan ang takin sa ila, kan lo sengso ta deuh a nih pawhin kan thla a muang ang; kan hmangaih berte himna nen, kan inchhir hauh lo ang. Mipui ṭha, dan zâwma sorkar thawhpuitu nih i tum zel ang u.

- Hausanga Hauzel