Kan thihna hi

Thawkkhat lai aṭang khan Mizo mipa kum 50 hnuai lam hi an thi mawlh mawlh mai a. Ṭhenkhat nupui fanau kalsan te an ni a. Kum 50 chin hi chu a zia viau chuan a lang a, kum upa hi an zia zawk niin ka hria. Mizo mipate hian kalsan tur kan nei tih a chiang. Ruih theih thil avang pawh ni lo, blood pressure (thisen) sang, stroke tih te hi a tam hle.

Kan nunphung hi thlak chu a ngai a nih hi. Hetia vanglai tak tak kan liam reng mai chuan hmeichhe ho tan a hamhaihthlak lutuk ang. Kan taksa hi kan hmangaih tur a ni a, zingah ni se, exer la hi hmeichhia an tam zawk emaw tih tur a ni. Mipa chu intichangkang deuh taka indoor vela khawsak kan ching. Kan taksa hi fimkhurpui ila, dam rei te hi tum ve hrim hrim a ṭha. Pathian thu hi dam reina a ni a, mipa lam hi zing ṭawngṭai inkhawm thleng hian kan thatchhia.

Kan dam lai ni a rei lo kan ti a, a dikna chin a awm ngai mai. Mahse, mi invawng hi chu an dam rei deuh lo maw? Zu chhe tak tak kan in suau suau a, kan rui a. Chu chuan taksa hi a lo chiah chhe chak hle a lo nih hi. Tun hma lama zu in ṭhin ho kha chu chhuan pangngai kha an in tlangpui a, an dam rei phian. Tunah chuan zu tlanchhia, a siamnaa thil eng eng emaw an telh tawh te an in ta a; damdawi tlanchhia kan ûm luih luih mai tawh bawk a nih hi.

Mizo mipate heti lam hawi hian harh thar ila, mahni taksa hi i hmangaih ve ang u. Pathian hremna lam pawh a ni lo, kan mâwl em a ni. Thihna te hi a dam tan chuan vanpui a chim hi a ni ngawt mai a. Kan nun danah leh kan thil tihah te fimkhur ila, Mizo mipate hi kan nihna kha i lantir leh ang u.

- VH Rosangzela