AMC 4-NA: APRIL PAR THAR TUR

AMC inthlan tur chungchang bihchianna hi kan ziak ta nual a. AMC lo pian chhoh dan aṭanga tun ṭum inthlan tur ward mal te te bihchianna thlengin. Tun ṭumah chuan Party lian pathum candidate ten nomination an file kim ta a. Menifesto an tlangzarh kim ta bawk a, I han thlir leh thuak thuak teh ang.

Chuh tum zawng zawng te:

Tun ṭum AMC-ah hian kil thuma inchuhna tur emaw kan tih laiin, tlai khawhnuah BJP in ward 11 a ding tur an rawn siam ve leh a.

ZPM, MNF leh INC ten ward 19 ah candidate an siam kim vek a. BJP in 11 rawn siam ve lehin chuh tum zawng hi mi 68 an ni ta.

Heng zingah hian hmeichhia 28 an awm. Reserve ward hi 6 niin, Congress leh ZPM te hian hmeichhe tana reserve ward bak general seat-ah Hmeichhia 3 ve ve neiin hmeichhe candidate hi 9 an nei ve ve ta.

MNF in general ward-a hmeichhe ding tur 1 an neih nen hmeichhia 7 an in-candidate-tir dawn. BJP aṭang hian hmeichhia 3 an tel.

BJP lam hi chu ward zawng zawngah pawh an din loh avangin sawrkar tura ngaih an ni lem lo bawk a, anni lam hi chu kan sawi chhunzawm tawh lo mai ang.

Candidate tlangzarhna

AMC-ah kum 10 zet rorel mek MNF-in candidate an puang hmasa ber a. Ni 16.Feb.2026 khan an puang kim nghal vek a. State a rorel lai ZPM in ni 23, March 2026 khan an puang ve thung.

Congress lam hian a hmain ward 13 an lo puang tawh a. A bak hi ZPM puan ni tho March ni 23 ah hian an puang kim.

AMC a rorel lai MNF leh Mizorama sawrkar mek ZPM-te hian Vanapa Hall-ah official a candidate puan hi an nei a. A lan danah ruling party ZPM hi chu an phur deuh emaw ni, Vanapa hall a leng lo khawp an kalkhawm.

Congress lam hian an Party office chung Lal Thanhawla Auditorium-ah March ni 23-a candidate zawng zawng an puan ni hian mipui lam thlalak hmuh tur a tlem viau mai a. Anni hi an opposition rei ta deuha party worker chhuak tam lo pawl an nih pawhin a awm viau e.

Manifesto

ZPM hian candidate an puan ni March ni 23 khan Manifesto hi an tlangzarh nghal a. Copy 2,00,000 lai an siam.

An Manifesto hi bung hrang 3 ah an ṭhen a.

Inrelbawlna lam bungah hian chang (point) 7 an dah. Khawtlang hmasawnna lam bungah hian chang 12 a awm thung a.

Khawpui thianghlimna lam bungah hian chang 12 tho awmin a zavaiin chang (point) 31 zet an ngaipawimawh leh tihturte an dah.

MNF lam hian ni 30 March-ah an Manifesto te hi an tlangzarh a, copy 15,000 an siam.

Bung 7 ah an ṭhen a. Chu'ngte chu: Aizawl hmasawnna leh inrelbawlna ṭha, Aizawl him zawk siam, Aizawl mawi leh nalh siam, Aizawl fai leh hrisel zawk siam, Mipui vantlang kalna kawng nuam siam Mipui vantlang intihhlimna/chhuah vahna hmun siam leh mipui zangkhaina leh awlsam zawkna ngaituah tih te a ni. Hengah hian chang (point) ṭhenkhatah 2 lek te, ṭhenkhatah 7 lai te dahin a zavaiin an Manisfesto hi bung 7 leh chang 41 lai nei a ni. Hei bakah AMC an sawrkar kum 10 chhung an thil tih ṭhat chang (point) 10 leh MNF state sawrkar Pu Denga CM lai aṭanga an thiltih tawh chang 17 zet an tarlang tel.

Congress lam hian a hranpain Manifesto hi an tlangzarh lo a ni maithei. Copy 30,000 siamin Bung 4-ah an ṭhen a. Chu'ngte chu:

Rorelna dik leh ṭha/khawpui thianghlim leh Fai, Khawpui chenna nuam, Khawpui him leh nuam - dan lalna leh AMC corporator chak ti te'n bung an ṭhen a. Hengah hian chang (point) 16 an dah.

Congress Manifesto hi a tawi ber a, MNF hian an siam sei ber thung. Pu Denga CM laia Ramhlun kawng zauhte thlengin an rawn tharthawh a, ṭhahnem an ngai hle mai. Copy hi an siam tlem viau mai bawk a, expenditure lamah an invengthawng nge ni.

A tlangpuiin Manifesto hi a inang tlangpui a, thil danglam bik tak a awm lem lo. Khawpui sawrkar tana tih awm leh hmachhawp awm thei chu an sawi kim tlangpui.

Ran vulh chungchangah veng awmna azira dan siam ṭhat tumna chu party 3 te hian an ziak vek.

In sak phalna pek kawnga dan leh hrai ennawn tur hi an tarlang vek bawk a. Tu party mahin party dang sawi ve loh thil thar ṭha tak leh danglam bik han phochhuah an nei lem lo va.

Drainage system ngaipawimawh thu leh waste management lam te khawpui mawina leh thianghlimna te thlengin a inang tlang hle.

Manifesto hmang chauha thlan tur ni se chu thlan bik tur an awmin a lang lo.

Mayor leh Dy.Mayor contender:

Han zeldin ta zel ila, party pathum te hi vannei thei vekah dah chhin ila, party malin khawpui sawrkarna siam dawn se tu nge an hotu luah awm ang tih lai hi i han sawi mai mai teh ang.

ZPM party hi state a rorel lai an ni bawk a, chak theihna pawh an nei sang turah ngai ila. Ward 10 hi lo la tling ta se tute nge Mayor leh Dy Mayor ah te awm ang le?

Corporator ṭanglai mi 4 zet an ding leh a. Ward no.6 ah Pu Remtluanga (Chanmari West), Ward no.8 Nl. Christina (Armed Veng South), Ward no.16 Pi Maawmi (Bethlehem Vengthlang), Ward no.19 Dr. Malsawmi (Hlimen). Mipa kher an tih pawhin Pu Remtluanga ni lai bakah Ward no.III Pu Faka (Ramhlun North) te hi officer pension leh kohhran upa an ni a. Ward no.13 Pu Vanlalhruaia te hi Dawrpui Vengthar LC Chairman ni lai kohhran leh YMA te inhmang ṭhang. ZPM Gen.Headquarter ah Secretary ni lai mekte an ni bawk a, an awhawm hlawm viau mai.

MNF lam hi Mayor nilai leh Dy.Mayor nilai te an candidate tawh lo va. Corporator ṭanglai 3 ding leh te hi an tlin leh chuan Mayor atan an iaiawm vak tawh lo vang. Ward No.9 corporator ni lai Chhinga veng nu Pi Maawmi te hi general ward aṭang pawh a tling thei kum 10 lai experience nei an ni a, an awm viau thei.

Chutiang bawkin Ward no.7 candidate Pu Maneiha pawh Zemabawk kohhran upa corporator ni lai leh Pu Faka Vaivakawn, Ward no.13 te pawh.

Congress lam hi ward no.19 ah an party Treasurer ni lai Dr.Mala a ding ruau mai a. MLA pawh tum 3 zet lo candidate tawh a ni a. Ward No.16 Pu Matluanga te pawh MLA tum hnih ding tawh. 2023 ah Serchhipa Pu Duhoma han khing tawh te an ni a, anni hi an vanneiha an party an tlin bawk chuan AMC hotu atan an awm hle ang. Corporator 2 neih mek zinga ding nawn leh Ward no.15 Pi Zodingi pawh general ward aṭanga tling thei kum 10 zet corporator ni tawh an nia an awm viau thei bawk awm e.

- Hruaia Kawlni