KOHHRAN HI I BÊL TLAT ANG U

Kan mithiam hmasate khan lalna leh thuneihna an duh luat vangin dâwtin politic an lo khel a. Hnam dang, kan Kristianna pawh min ṭawmpui thei lo Tuikuk, Chakma te vote itin, khua leh tuiah an lo seng lut a, a pawi zo tawh a, siam ṭhat leh paih theih an ni tawh lo va, an lak aṭangin nunna hlu tak kan chan ta fo mai a nih hi. Chung mite vek chuan, he kan ram neih chhun ei ral vek pawh an pawisa lo va, mi dangte hna thawh ṭhat fak thei lovin, mahni party hming chher tum reng rengin an hun pum an hmng ral a, tun thlengin politic lakah kohhran chuan inrawlh a ralṭi zo ta a nih hi.

A chhan bul tak chu, kohhran mi, Pathian mi dik tak ni lo te, kohhran upa aṭangin kan ram politic an vei a, ‘E kohhran upa a ni a, ani zawng a ṭha ang,’ tiin, party MLA candidate-ah kan dahin, kan vote tling ta cheng a, Pathianin eng hna thawk tûrin nge MLA-ah a hlai kai tih hai derin, hamṭhatna leh MLA fund a tam thei ang ber mahni ipteah an khung a, a him chin aṭangin him lo chinah an lut zel a. He thinglung, tawk chin lem nei lo, duhâmna chuan a aia tam neih duhnain a nawr lut zel a, thil dik lo chu dawta ziah mam a ṭul si a, an ziak a, an ziak zel a. Dawt bawkin ṭan chhan an siam a, chu rahbi chu, alo tawlh leh ṭhin si a. Kohhran upa pawh hi engmah an ni lo, tih ṭawngkam hi a lo pian chhuah phah ta a nih hi.

AMC Election kan hma chhawn leh mekah pawh hian, AMC Area mite u, hei hi lo hre rawh u, Party ruih chilhna hian, in chhirna bak min thlen lo a nia, Israel fate chu, Pathian Thu tiamfate an ni a, a tiamtu a rinawma, Kanan ram a hruai thleng a nih kha, AMC, MLA Candidate-te erawh zawng, Khawlohnaa din, Bawh chhiatna fahrinte an ni a, Thu tiam zuah zuah ṭhinte hian an thu tiamah an ding ngai lo, tih chu, kan ram lo hruai tawhtute a ṭangin kan hre fiah hle tawh lawm ni? An thu tiam min hruai thlengtu sorkhar ala piân loh hi. Keini zawng Mizo kan ni a, Thu tiamfate kan ni lo ve, Mifing an pung zel a, Mirinawm an kiam zel a, mifel an lar a, Mithiam an tawmim a, Mi dik lo an fuan khawma, midikte nek chepin an awm thung, hei hi Kristian rama Thing nget ang mai a, min ei chhe mektu hri lêng mek chu a ni.

Pathianin Kan nun min khalh ngil turin kohhran min pe a, Kohhran bel tlatte nun hi a famkim bik lo va, an fel vek bik lo ve, mahse, Kohhran bel lote zing aṭang bawk hian a ni, Ruihhlo, Ei rukna, in rawkna, ngawlhveina an lo chhuah ṭhin ni. Inti thlarau mi, Inti zawlnei ṭhenkhat Inkhawm duh miah lo te hi eng rau nge an chân bik kei mi mawl hian ka hre phak lo va, hriat lah ka tum hek lo, an bula awm nuamti hi an awm ka ring lo, Hmeichhe pasal nei fuh lote ṭawngkam ka hre fo, chu chu hei hi a ni, Pasal zuin mi leh Kohhran ngaipawi mawhlo neih ai chuan, mahnia khawsaka boiler ar vulh a hlawk zawka a nuam zawk anti ṭhin. Mizo mipate u, Kohhran hi i bel tlat ang u hmiang! Eng ni lo mah i la e, kan neih leh chan tawka liama kan lawmna hi a ropui a sin, Mizo Nula ten Pasal tûr an vai zo ta. Mizo Tlangval Kohhran bel lova, kawngpui dung bel kan tam ta lutuk hian, kan Nulate hrilh a hai zova, Hnam dang pasal neite lah Mizo an nihna hlih sak an ni dawn bawk si a, Zonun zia leh Kohhran zia hi ava in chawih si em, Politict pawh dawt tel lo ni se la, kan hausakna pawh dik tak ni zel se la, teh dawl hausakna, eiru ngam lo, Pathian ṭih tak chung siin, Kan ram leh Kohhran tân kan dam chhung nite i chhiar bek bek zel ang u. Nang leh kei hi kan dam hlen dawn bik lova, He Leia hian ropui taka chhinchhiah tûr hming leh chanchin kan nei lo, ni mahsela, nitin kan nuna, phek tin kan ziah mekte hi maw, Thihna kut vawt chuan, min vuan tûrin kan lama Ban a phar reng a sin, min vawn fuh ni alo la thleng ang a, chu tih huna chuan, kan ruangniah kan damlai chanchin hi, ha hipin anla rawn sawi dawn a, Ka Contract hna thawh dante, Ka in sak leh ka hlawh zatte hi anla khaikhin ang a, Ka hlawh phu loh ka huan ram leh In ropui takte hian, hming chhe takin thlana vuiliam kan ni palh a nge, Kan nun hi i fimkhurpui hle teh ang u. India ram Kohhran hruaitu pakhat chuan, Mizo Kohhran a din chhûng chu, zai hi a reh tawh lo vang a, Mizo Kristiante an zai chhûng chuan Kohhran hi a nung reng dawn a ni. A lo tih angin, Pathian fakin Biakinah Kohhran hi i bel tlat ang u.

- Zothansanga, Chhiahtlang Kawnveng, 9612333536