Law of Nature hi nagative capability hmanga vuak ṭhiah theih a ni

Kan ṭawng tu huat thu ni suh. Thu leh hla hi a zira zir ve lote chuan an thlir fuh lo fo mai a. Thu leh hlaa dan lo awm ve te leh literary theory lo awm tawh te an hriat ve ṭhin loh avangin, thu leh hla teh nan hian khuarel dan te, ṭawng dik leh dik lo fet taka tehna dan te leh Science leh Mathematics dan te thlengin bukna kan lo khai ve ṭhin avangin, kan thu leh hla tam tak chuan chung chu a paltlang zo lo fo. Mi ṭhenkhat phei chuan ngaihtuahna zim tak nen mihring takin kan lo la buk ve ṭhin bawk a.

Mahse, han ngaihtuah chian chuan thu leh hla buk nana hmanrua kan lo hman ṭhin hi a dikhlel ve ṭhin tho avangin, kan teh chhuah tlin loh te pawh chu an tling lo tak tak tihna a ni bik lo a tih ve theih tho si. Subject hrang daih aṭanga tehna lo siam ṭhin hi chu thil nih dan tur a ni chiah lo deuh ni chuan a lang. Mathematics te hi Literature aṭangin lo buk ve ṭhin ta ila, kan buk chhuak dik lo fo dawn tihna a ni. Thu leh hla chu hetiang zawng hian bukna lo khaisak ṭhin ta ila, zalenna ram a nihzia pawh a chiang zawk fo awm a nia.

English hla phuah thiam hmingthang John Keats khan, ‘Negative Capability’ chu tihian a lo sawi fiah tawh a:

“Thu leh hlaah chuan, thil mumal lo (uncertainty), thil mak (mystery), leh rinhlelhawm (doubt) te hi a dikna chiah (logical answer) zawn chhuah vat vat tuma lo phet buai chiam ai chuan lungawi takin lo pawm mai ila, a hahdamthlak mai e. Hla phuah mi chuan an hriat chian loh thil pawh an pawm theiin, an hriat vek loh pawh an pawm mai ṭhin,” a ti. (It means being comfortable with uncertainty, mystery, and doubt without trying to find quick logical answers. Keats believed that great poets can accept things they do not fully understand)

He theory thukphum ni bawk chu: (Thu leh hla hi hringnun darthlalang an ti ṭhin tih lo hre hmasa ila)

1. Thil chiang lo pawm (Embracing Ambiguity)

He hringnuna thil mak leh chiang lo te hi, ngaihtuahna ni lo tharum hmanga a dikna zawn chiam ai chuan a mawina leh duhawmna kha lo pawm zawk mai tur (accept that some things in life are mysterious or unclear. Instead of forcing clear answers, enjoy the beauty of the unknown)

2. Engkim hian sawi fiah a mamawh lem lo (Rejection of Rationalization)

He hringnuna thil thleng ṭhin engkim mai hi, kan chhia leh ṭha hriatna hmanga sawi fiahna vek a ngai lem lo. Engkim mai sawi fiah fel fai tum lutuk hian kan ngaihtuahna, suangtuahna leh thil ngaihtuah chhuah dan thar kan neih tur khan, chin a neihtir theiin, min tihtawpsak thei a ni (Do not over-analyze everything with logic. Too much explanation can limit imagination and creativity)

3. Rilru zau neih a ngai (Open-Mindedness)

Kan hriat fiah loh leh thil hriat ṭhan loh thilah te hian kan rilru ngaihtuahna leh suang-tuahna te hi zau taka kan neih a ngai (Keep your mind open to many different thoughts and ideas — even strange or unusual ones)

4. Mahni Inhlohna (Loss of Self)

Hla phuahtu chuan thil eng emawa a suangtuahna a sen tak tak chuan mahni nihna inhlohin a suangtuahna khawvelah chuan a cheng ṭhin (A poet can forget their own identity and fully imagine being something else)

Kan thu leh hla thiam te khan khuarel dan kalhin hla thu te an lo chhep tawh ṭhin a. Chung thil kan lo hmuh ṭum chuan mi tam tak chuan, kha hla mawina ai khan a dik loh dan sawi chu kan chaw tui ber emaw tih tur a lo ni ta ṭhin. Dan khawng deuh hmangin, “A theih loh hrim hrim, he hla phuahtu hian a hre fuh lo a ni . . . chuti khati kan lo ti mai ṭhin a . . .” a chunga negative capability kan tih ang khi kan ngaihtuah thlen ve ṭhin loh vang a ni ber awm e.

Lalsangzuali Sailo hla ‘Vau Thla’ hla chang 2-naah khan, vâu thla mawina belh chhah thei turin, an awm hun hma hretah ngirtling leh lelte kiu hmangin vâu thla êng mâwi a rawn awihtir ta daih a nih kha:

Siknipui tuar hnu thing lenbuang zawng pawh,

Chawr tin duatin hnah nem chhuah hring nghial e;

Zai tin rem thiam lelthang ngirtling chenin

Vâu thla ni eng an awi bang lo.

Kan hla phuahtute hian an hla chei mawi nan, hla phuahtute zalênna hi an hmang thiam ṭhin teh asin. Chu chuan tu pawi mah a sawi ngai lo va. Heng hunah hian dân khauh tak lo vilika, thu leh hla hi mathematics leh logic hmanga lo teh chhuah tum ve phet leh, khuarel dân (law of nature) laka a dik loh dân lo paupui ve vak ai chuan; lo pawmsak mai hi a hahdam ber mai. Negative capability (ring lo chung pawha lo pawmna/awihna) hi literature ziarang pakhat a nih chhung chuan, thu leh hla hi a thiang a zau tawk hle tih a chiang si.

Patea hlaah khan ‘Bethlehem tlang thlengin a vultir bung mai’ a nih kha. Khawvel piankenin dan dik sa a ken vaw ṭhiatin ‘tuifinriat a liamtir a’, chumai a la ni lo ‘lawng chawlhna tlang thianghlim’ te min la hmuhtir tak deuh deuh a nih kha. Heng hunah hian khuarel dân leh thil dik sa hmanga bukna lo khai ai chuan, thu leh hla hi mawinain a thuam ṭhin dan hi hre ta zawk ila, a bawplawka thil lak te pawh a tlem deuh ngei ang.

Tin, Patea thu hman dan hi TS Eliot-an ‘Objective Correlative’ a tih ang kha a ni bawk awm e. Objective correlative awmzia chu, “Mihring ṭawng leh thumal, an rilru leh ngaihtuahna hlawm phawk leh aiawh zo hman tur an hmuh theih loh chuan hmanraw thar an nei ṭhin a. Rokunga'n mi la sawi ngai loh dan anga Mizoram mawizia sawina 'Chhawrpial run i ang e' a tihte pawh kha hetiang ang hi a ni kan ti thei ang” (Siamkima). Vankhaman Zoram hi ‘Rimawi Ram’ a tia a sawi te thleng pawh khan a huam thei ang chu.

- Rohmingthanga Ralte, Assistant Professor, Dept.of Mizo, Govt. Hrangbana College