K. MALSAWMA – CHALKHAW MAWITU AWM TA LO E (Nghilh har kan la ti ang)

1. Thupui dah thiam a harsa, sawi dan thiam hlei hlei a harsa zual. A chhip aṭangin i chhukpui mai ang.

2. A ropuiin a chhuanawm. Pian leh murnaah, ṭhian nihnaah leh a hnathawhah, khawtlang leh ram leh hnam thilah, kum lama upa MUP leh kohhranah, sawi sen a ni lo. Sawi uar lutuk a awm lo ang!

3. A thlah liam zanah khan MCS batch hmasa bera a luh rualpui, amah anga mi ṭha puitling Pu H. Liansailova, IAS (Retd) nen kan inbia a, sawi tur kan van ngah dun teh reng em! Durtlang Damdawi-inah (ICU) be thei loin a han kan hman. A chenna in Chaltlangah tlaivarpui zan khan a rawn ṭhutpui bawk. Delhi-ah an training lai, Indian Institute of Public Administration (IIPA) hostel aṭanga an inkawp dun dan chuan anni ṭhian dun mizia leh nun kawng a hril thui vawng vawng hle mai. Puja châwl hawng ve thei lo thingpui in khilai – Daryaganj doctor title nei sei an rawn danzia chu le. Zunthlum enkawl dan ngei chu! Mi taima, nun uluk, invawng fel a nih hlen phah, tlang hriat thamin.

4. ‘Chalkhawpui mawitu’ kan tihna chhan langsar ber pawh an zing kara kal del del kawngpui dungah, muang changa 4 te, a aia tam chang pawh awm fo kha a ni. Vawi hnih khat vel chauh kan ina thingpui inah ka sawm lut. Pu Lalthangfala Sailo leh Pu Vanlalduha Sailo pa pui 2 te khan mual an liam hmasa tawh. An member nghet Pu HD Pachhunga’n min la dampui. Hming kan lam pali (4) te hi zaidam, kawm nuam, hlim thei, nêlawm an ni vek. Inhnaih te tea cheng ho, keini Pu P. Rohmingthanga, IAS (Retd) leh kei IPS (Retd) te hi an zingah kan tel phak lo!

5. Pu Fala leh Pu Sawma te hi MAL leh MUP life time president ni mai tur, dan thar kum (term) bitukin a dang chat ta a ni. Anni pahnih bawk hi Central sorkar chawimawina lian Padma Shri (Pu Fala), Lifetime Achievement Award (Pu Sawma) dawngtu an ni. Kan khua chauh a ni lo, Mizo leh Mizoram an mawi!!

6. Pu Lalthangfala Sailo, ka ṭhian ropui leh chhuanawm tia chanchinbu-ah ziaka ka thlah hnuah Pu K. Malsawma, ka ṭhian mi ropui leh chhuanawm thlahna thu ka ziak leh thei hi – engtia lo awm nge? Amah ka ṭhian a ni si! Champhai Vengsangah an in leh ka awmna in a inhnaih a, Vawmbal tuikhur kan chawi tlang ṭhin. A kiang kumkhal (umkhal) hmin tlate kan chhar ho a, kan eiho ṭhin. Govt. Mizo High School, Aizawlah kum 4 vel inpawl khat, section khatah kan zir a, Matric kan pass ho. Upper Hostel, MacDonald Hill-ah kum 3 kan awm ho bawk. Heta kan pawlpui mi 6, nupui/puzawn te veng, Chaltlanga inbengbel kan ni leh ta zel. Pu C. Rohluta, Pu K. Malsawma, Pu VL Rema, Pu P. Rohmingthanga, Pu Lalthangfala Sailo leh kei F. Lalremsiama. Kan pawlpui tluan, nupa ni ta Pu C. Dunglena leh Pi Thanchami te erawh anmahni thlan, Verdant Ridge of Laipuitlang (Chaltlangah tho) an rawn inbengbel bawk. Boruak ṭha leh khaw nuam kan luah ho. Kan re-union thlengtu leh huaihawttu berte nen kan kim ta lo!!

7. A hmawr bawk nan kohhrana a rawngbawlna kan sawi hmaih thei lo ang. A awmna apiangah kohhran banpuiah a ṭang zel. Ṭum 3 zet kohhran upa atan thlan a ni. Tleirawl hawklak laiin keini 2 pastor fapa ve ve nun nawi kan inṭawm ve zeuh.

8. Tichuan, rawngbawlna ropui leh hlawhtling a lantirna, sorkar hna, a tuina ber Social Welfare Director-ah leh a pension hnu thleng pawha a dampui talent MUP-ah upa health care huangah Civil Hospital-a upate private ward pathum phuisui, Geriatric Ward ṭangkai em em hi ama hruaina zara lo awm a ni. Sorkar thilphalna (bounty) kan lo hmuh tak hi! A hlu zual leh langsar ber a ni awm e. A hming chawi hian eng emaw sorkarin siamsak a phu hle lo maw?

9. Chu chu ka ngen ve leh tawp mai a ni e. Thuneitute’n engtin ngai ang maw?

- F. Lalremsiama, Chaltlang, Ph : 8415994340