Bawngkawn Brigade Ground
Tunlaia politics thu inchuh lian ber pakhat chu Aizawl Municipal Corporation hnuaia siam Bawngkawn Brigade-a AMC Playground hi a ni awm e. He Playground siam dana thil rinhlelhawm leh an insawifiahna hrang hrang en hian, Mizorama sual ngam pat tawh zia a lo lang kan ti lo thei lova, cheng nuai 500 man a kut thlakna hmel mipuiin an hmuh loh avanga an rinhlelhna thinlung hneh tur chuan, insawifiah nawn awn awn aiin a hnathawh hmel en hi a dik zawk a ni.
Cheng nuai 900 chuang pawisa hrensak tawh hnua thiam chan lehna atana unaute pawisa kawl tih te pawh kha sawifiahna leh rorelna dan hmaah, a fel thlup a nih pawhin mipui thinlungah a fel thei lo a nih ber mai hi. Mipui thinlung hneh hmasak hi Mizo Politician te hian an thiam lo ni lovin an tum lo niin ka hria a, mipui hi min ngai mawl leh lutuk a, thiam chan tum chuan mipui thinlunga thiam chan hi a pawimawh hmasa ber a ni.
AMC inthlang tur hi chu a duh duh lo tling mai mai se, AMC awm hma Aizawl kha kei chuan nuam ka ti zawk hrim hrim a, AMC hian thil khirh khan bak a thlen tak takin ka hre ve lo va, AMC hnuaia an hnathawh kuttlinglova sum siamna ni ngeia lang hi an chin chhuah hlan AMC result aiin ka nghakhlel zawk kei hi chuan.
Bawngkawn Brigade Ground hi Aizawla playground hlun ber pawl a nih chu Aizawl mite chuan kan chiang tlâng ang a, veng ṭhenawm pawhin naupan laia kan pan ve ṭhin sipai awmna field, tun hma phei kha chuan fal nalha awm hla kan tih em em ṭhin a ni a, 1990's tir lam thleng kha chuan Sports Complex lian tak dinna atana itawm fahran mai niin a bul velah dipdaltu pawh a awm lo.
A hre deuhte sawi danin Sipai an chhuah hnu a ram chinfel kha "Risk Mual" dik tak LSC inthuah tamna a ni. Chumi bula Playground chu nuai 500 chuang senga hmuh tham loh infrastructure an dinna a lo ni leh zel. AMC-ah hian tute pawh tling se, Bawngkawn Brigade-a AMC Playground saknaa mawhphurtu hi Aizawl mipui hian hriat kan duh a, thil dik lo a ni tih chu hai lan pawh ngai lovin a lang fiah sa tawh zawk a ni si. AMC Playgound tih hming hrim hrim pawh hi kan lo la hre ngai hauh lo va, Bawngkawn Brigade Field kan tih ṭhin kha tunlai ṭawnga sum mukbang an awm ngei a nih hmel avangin chhui chian hrim hrim thil ṭul tak a ni.
- Mahruaia, Ramhlun North