Langsar taka thilpek pek

Khawvela kan awm chhung leh cham chhungah hian thilpek dawngtu nge hlim zawk ang a, a petu tih hi patla-ah khaiin buk ta ila, eng zawk nge buk rit zawk ang, tihah hian thutlukna siam a har ngawtin a rinawm. A dawngtu tan hlimna leh lawmna nasa tak a nih rualin, mite tana thilpek petu hlimna leh lawmna pawh hi a nasa ve tho si a. Keima mimal ngaihdan leh rin danah chuan, mite tana ui hauh lo leh engmah a let leh lam pawh beisei hauh lova thilpek petu lamah a buk a rit zawkin ka ring a. Khawi lamah nge a buk a rit zawk i rin ve le? Chutihrual erawh chuan, a dawngtu leh hmutu dinhmun atang erawh chuan, a dawngtu lamah a buk a rit zawk ngei thung ang. Inhnialna tawp thei lo tur chi thil a ni.

A petu leh a dawngtuah, a eng emaw zawk zawkah a buk lo rit zawk pawh chu ni se, a pawimawh lai ber erawh chu mi dangte tana luan chhuah leh ṭanpuina pek hi a ni mai a. Chutianga mi dangte tana luan chhuah leh thilpek petu nih chu thil awlai leh awlsam tak a la ni lo zui lehnghal a; mi thilphal, mi rilru ṭha leh ngil nih a la ngai cheu mai.

Youtube, WhatsApp, Facebook, etc. ah te hnam dang chu sawi loh, kan Mizopui ngeite mi dangte tana an luan chhuahna leh thilpek an pekna te mai bakah, mi harsa zawk leh ṭanpui ngaite an chhawmdawl a, an pui lai video hmuh tur tam tak a awm chho ta fo mai han hmuh hian, mi ṭhenkhatte thilphalzia a lang chiang hle ṭhin hian a hriat a, a lawmawm ngawt mai. Sem darh chu pun lehzualna a ni a, mamawh tawka liam kawmpui chu tlâkranna a ni (Thufingte 11:24) tih thu hi kan nunpui chho ta riau ni hian a lang a, thil lawmawm tak a ni.

Chutianga mite’n an neih chuang liam pawh ni hauh lova mi dangte tana thil ṭha an tihna an pho lanna video leh thlalakte chu mi ṭhenkhatte erawh chuan an îtsîk emaw, an er emaw tih mai turin, "An thil ṭha tih leh mite an ṭanpui lai mi dangte hmuh tur atana pho lan kher te chu a, intihlansarh leh intihlar duh vang, chuti khati..." tiin a petu chu sawi loh, a dawngtu tan pawha zahna tur leh inthlahruna, mit men ngam lohna tur khawpa an lo sawiselna emaw, an lo sawi hnawmna video leh thuziak internet media lama hmuh tur a awm leh fo ṭhin erawh hi a mak tih loh rual a ni lo.

Entirna pakhat lek han sawi ta ila. A ni leh thla ka chiang ta lo, ZPM party-in vanduaina avanga thihna tawk chhungte hnena râlna sum, bank cheque an hlan lai video/picture internet media lama an pho chhuah khan, fakna aiin sawiselna a tawk nasa ang reng a. An sawiselna chhan ber lah kha, ‘Khitia han hlan deuh kher’ tih kha a ni deuh mai a, a ho ang reng asin. Thil ṭha tih a har teh reng nen, mite thil ṭha tih kan han sawisel ṭhin hi chu a zialo deuh ni chuan a lang.

Miin thil ṭha a ti a, mi dangte tan a luang chhuak a, chu a thil ṭha tih chu mite hmuh tur atan pho chhuah a duh a nih chuan, eng nge a pawina awm a, a sualna awm, tih hi ka mimal ngaihdan a ni fo. A dawngtuin lawm taka a dawn theih a, a hlim phawt chuan a tawk a ni mai lo'm ni? Lansarh duh vang emaw, lar duh vang emawin tu emaw hi mi dang tan luang chhuakin pen chhuak pawh ni se, han sawiselna tur a awm chuang reng reng lo. A thil tih kha tute emaw tan lawmna, hlimna, an damna, an puarna, silhfen hak tur an neih phahna, chenna turin an neih phah theihna a ni thei tlat. Chu tluka hlu chu eng nge awm chuang – a dawngtu tan. A dawngtu tan a hlut phawt chuan a petu rilru leh a inpho chhuah duh dan chu eng pawh ni se, han sel chi niin a lang lo.

Mi dang tana luang chhuak tur leh petu ni tur hian sum leh pai chu sawi loh, tha leh zung pawh tam tak sen ral a ngai a, chutah mahni ngei kal chhuah a ṭul chang a awm bawk. Chutiang a nih avang chuan tute emawin an thil ṭha tih lai mi dangte hmuh theih tura an pho chhuak ṭhin hi selna tur a awm reng reng lo va, fak a, inkawhhmuh tur zawk kan ni. Tin, i thil ṭha tih leh kan thil ṭha tih mite’n an lo hmuh avangin thil ṭha an tih phah ve thei a, mi dang tana luang chhuak ngai lo kha mi dang tan a luan chhuah phah ve thei a, mi dang la ṭanpui ngai lo khan tute emaw a ṭanpui phah ve thei asin. Fing ber leh fel ber ni awm ziazanga tute emaw an thil ṭha tih turah a tih dan turah thurawn lo pek chiam a, an thil ṭha tih an pho chhuah lo selsak chiam hi nang leh keia tih tur a ni lo piah lamah, a rilru hrisel lohthlak thil em mai.

Dik taka sawi chuan, internet media-a hetianga mite’n an thil ṭha tih an pho chhuah lo seltu tam tak hi chu mi dang tan pawha la luang chhuak ve lem lo, mi dangte pawh la ṭanpui ngai lem lo an ni duh phian a, an lo luang chhuak a, mite an lo ṭanpui ve tawh a nih paw'n chuti teh luaa sawi tur nei lem lo an ni châwk. Mi dang tana inpe tam leh inseng ral tam apiang hi mite thil ṭha tih fakmawi thiam leh chawimawi thiam an ni duh fo. Bêl ruak apiang a ri a ring, an tih ang deuhin, a sawisel leh sel lama aw ring apiang hi mi dang, a bikin ṭanpui ngaite tana inpe tlem, inseng tlem, a ṭhente phei chu tu mah la ṭanpui ngai lo, tu mah la pui ngai lo an ni duh châwk.

Thil ṭha lo leh sual ni lovin, thil ṭha tih hi kan inkawhhmuh a, kan inzirtir nasat ngai thil a ni a. Chu thil kan inzirtirna tur atan leh kan inkawhhmuhna tur atana hmanraw ṭha ber pawl leh duhawm ber pawl chu tunlaiah chuan internet media leh social media hi a ni ti ila kan tisual lutuk lo ang. Chuvangin, tute emawin an thil ṭha tih mi dangte hmuh theih tur leh en theih tur atana internet leh social media-a an pho chhuah hi, 'Lansarh duh vang, chuti khati' tiin lo sawi hnawmin lo sel ṭhin lo ila, a bikin, youtuber tam takte hian. Chu ai chuan lo fak zawk hlauh ṭhin ila a va duhawm em.

Kan nupui pasal leh kan fate chu kan in chhungah thu ṭha kan hrilh thei a, thil ṭha tih tur kan hrilh thei. Mahse, kan chhungkuaa tel ve hauh lo tute emaw thu ṭha va hrilh a, thil ṭha tih tur va hrilh hi har tak a ni. Chuvang chuan, mi dangte’n thil ṭha tih ve duhna thinlung, thil dik tih ve duhna thinlung an put a, an neih theihna tur atan chuan i thil ṭha tih, kan thil ṭha tih mi dangte hmuh theih tur atana internet leh social media-a pho chhuah hi a kawng awlsam ber leh ṭha ber a ni ti ila kan tisualin a rinawm loh. Chuvang chuan, tu emawin, tu party emawin, eng tlawmngai pawl emawin an thil ṭha tih mi dangte en theih tur leh hmuh theih tur atan an pho chhuah ṭhin hi lo sawisel mai lovin, i lo fak fo zawk ṭhin ang u.

Miin thil ṭha ti se tih kan duh a, an han ti ta cheng a, an tih kan rilrem zawng leh duh dan, ngaihdan a nih loh vang maia mi ṭhenkhatte’n sawisel leh dem kan ching leh ṭhin hi chu a rilru hrisel lo zia tlat.

Tute emaw tan, khawtlang tan, ram leh hnam tan thil ṭha a nih a, thil lawmawm lam a nih phawt chuan, eng rilru pu paw'n tu emaw hian thil ṭha a tih phawt chuan chu aia hlu leh ropui chu a dawngtu tan, khawtlang tan, ram leh hnam tan thil dang a awm chuang lo. Chuvang chuan, 'Lansarh duh vang, chuti khati' tia sel ai chuan i fak mai ṭhin zawk ang u.

Hawh u, thil ṭha a nih phawt chuan, lansarh duh vang paw'n mi dang tan luang chhuak zel ila, ṭanpui ngai ṭanpui zel ang u; a dawngtu tan a hlutna a nêp chuang ngai si lo va. Lansarh duh vang pawha mi dang tana inpe phal lo, uikawm an tam em mai. Mi thil ṭha tih lo sawisel ṭhin ho hi mi dang tana luang chhuak ngai lo an ni châwk a nia.

- Nawlchunga Chinjah, Meisatla, Siaha