Pensioner-te tana MUHCS 2.0: A purpose dik tak leh hlawkna

Sawrkarin Pensioner-te tana Fixed Medical Allowance (FMA) thla tina ₹ 1,000 a pek ṭhin hi, an chhungte tana chhawm luh tur ni lovin, pensioner-te hriselna leh inenkawlna tana duhsakna a ni. Tunah MUHCS 2.0 hian he FMA ₹ 1,000 chauh hmang hian pensioner leh an kawppui (spouse) te thlenga huam inenkawlna ṭha tak subscribe theihna kawng a rawn hawng ta a. Hei hian Medical Allowance an dawn ṭhin kha a tum (purpose) dik tak—hriselna atana hman a nihna a rawn nemnghet a ni. He scheme-a hlawkna awmte chu thlir thuak pawhin a chiang hle.

Category A:

Thla tin ₹ 1,000 thawhin, kum khatah ₹ 12,00,000 (cheng nuai 12) thleng a thlawna inenkawlna an dawng thei a, damdawi inah private cabin thlengin an hman phalsak an ni.

Category B:

Thla tin ₹ 500 thawhin, kum khatah ₹ 5,00,000 (cheng nuai 5) thleng inenkawlna senso tum sak an ni a, semi-private ward leh damlo zin veivahna (travel expense) thlengin an hlawkpui thei bawk.

Member-te sum thawh aṭanga chhutin sawrkar senso hi a sang em em a. April 2025 aṭanga February 2026 inkar khan pensioner-te sum thawh khawm zawng zawng chu ₹ 9.33 crore chauh a nih laiin, an inenkawlna senso erawh ₹ 26.84 crore zet a tling tawh a ni. Hetiang a nih lai hian, pensioner mi 37,000 vel zinga mi 10,400 chauhin he scheme an zawm hi thil pawi tak a ni a. Finance Secretary pawhin pensioner-te’n an duh lo a nih chuan an puala scheme siam loh mai pawh a rel hial thu a sawi kha a a awm reng a ni. Chuvangin, duhsakna nasa tak a awm lai hian, mahni hriselna leh hmalam hun thlira duhthlanna dik siam hi a hun tawh hle.

Er. Ruata Sailo thusawi hian thu i han titawp teh ang, "Kei chuan pensioners tan MUHCS 2.0 hi a ṭha ka ti a, ka zawm mai dawn a ni. Duh lo chuan zawm loh mai tur a ni a; mahse, pensioner-te tana ruahmanna ṭha tak siam hi sût leh a ni ang tih ka hlau viau zawk," tiin.

- T hangtea Thawmte