SAVE THE DATE- A HMAN DAN LEH A AWMZIA
Innei tur an awmin Whatsapp lamah 'Save the Date' tih hi kan dawng tam ta hle a, a changkang hle bawk. Chutihrual chuan Mizoin a mizo pui, zo ṭawng ngeia a sawmna ṭawngkam mawi leh fiah, 'Inneih Sawmna' tih hi changkang lo leh hluihlawn thil angah min ngaihtir ang a, thumal pathum lek, 'Save the Date' hian Mizo hi Mizoramah mi mawlah min chhuahin min hruai bo palh ang tih a hlauhawm.
'Save the Date' tih awmzia chu, "Thil pawimawh tak tih tur a awm dawn avangin khawngaihin he ni hi i calender-ah lo dah awl ta che" (Please keep this date free in your calendar, as something important will take place) tihna a ni. Hei hi inneihna chauh ni lovin, eng champha emaw (Anniversaries), piancham lawmna, chhungkaw inhmuh khawm leh Juda ten mipa naupang sakhaw dana kum 13 a tlin lawmna (Bar Mitzvah) atan te pawh hman a ni ṭhin.
Inneihna bikah chuan 'Save the Date' hi ruahman fel tawh inneihna lo awm tur chu a hlimawm zawnga mi dang hriattir lawkna a ni. Lehkhaah chuan innei turte hming, Mo tur hming ziak hmasain, inneih ni tur leh a hmun tur an ziak ṭhin a. Inneihna lian thamah chuan a hma thla 4-6 velah, a ṭhenah chuan thla 9-12 hmaah pawh an thawn chhuak ṭhin. A chhan chu list A, tel tura an duhten inneih hun atan ruahmanna an lo siam lawk theih nan a ni. Inneihna té deuhah chuan kar 6–8 hma lamah an thawn chhuak tlangpui bawk. 'Save the Date' hi sawmna a nih loh avangin thawn chhuah a nih hnuah mumal taka sawmna lehkha (Invitation card) in a um zui leh ngei ngei tur a ni.
'Save the Date' hi lehkha them khera thawnchhuah ngai thil a ni lo va, Whatsapp bakah Email hmang pawha thawn mai theih a ni. Innei turte thlalak tarlan hi chin dan tlangpui a nih rualin thil lem eng emaw, mahni thlalak pawh nise, a dawngtuten a hlimawm zawnga an hriat reng theih tur thil dah hi chindan tlangpui a ni.
'Save the Date' thu thawn kan dawn avangin inneihnaah chuan sawm ngei ngei tur kan ni tihna a ni lo va, sawm tum hming ziah tlar zingah kan tel ve tihna chauh a ni. A hmunhma avangte, harsatna dang avangin innei turten mi tlem zawk sawm ṭul an tih chuan chhawk ṭhen zinga tel thei reng kan la ni. Tel ngei tura min duh tak tak leh tak tak loh chu sawmna lehkha pangngai kan dawn zui leh zui lohah a innghat a ni.
Save the Date thu thawn kan dawnin WhatsApp Status emaw, Social Media dangah pawh min thawntu phalna la hmasa lova tarlan mai hi chin dan mawi lo tak a ni. Mimal thil sawi chhuahna (Personal announce-ment) a ni a, innei turten an lo tarlang hmasa tawh a nih loh chuan an hming, a hun leh a hmun ziah lan a nih avangin a zahawm hle a ni. He 'Save the Date' lehkha them te reuh hi phungthlukna leh nunphung dikin a zui zawh leh si loh chuan, changkang zeta min timawl leh vahtu mai mai a ni leh lek dawn chu a nih hi a!
"Inneih Sawmna" tih mai hi a fiahin a changkang a, a va Mizo si em!
- Johntea Nu