CHAWIMAWI HLAWH LO LAL ISUA CHU CHAWIMAWIIN A AWM

“Hosana! Lalpa hminga lo kal chu fakin awm rawh se. Ram lo thleng tur, kan pa Davida ram chu chawimawiin awm rawh se. Chungnung berah khian Hosana!”( Marka 11:9-10)

Lal Isua kha a damchhung hun kha rawng a bawl hma khan mi satliah leh mi pangngai ve mai nia mi te hmuh a ni. Rawngbawla a chhuah hma chanchin Bible hian a tarlang lem lo va, a tarlan awmchhun chu thingrem siamtu fapa a nihna leh a pa a pui ṭhin tih kha a ni deuh mai. Kum 30 a lo tlin chuan a hna thawh tur leh he khawvela a lo kal chhan hlen tur tirhchhuah a ni ta a. Rawng a bawl ṭan a, thu ṭha leh mak tak tak a han chhakchhuak a, thil mak a tih ṭan pawh khan lawm a hlawh lo va; mite mak tih a hlawh a ni. Ama khua ngei Nazareth phei chuan an lawm lovin, an chawimawi lo lehzual tih kan hmu a. Ama chhungte ngei pawhin an ring lo va, an awih lo a ni. Ka rin dan tak phei chuan mi te khan an ṭawng el nasain a hnung lamah chil an chhakkhum hial ṭhinin ka ring. Nuihzat deuh pawhin an chhaih ṭhin ngei bawk ang.

A nun kha a khawhar hle bawk ang a, rilru rum vawng vawng chang leh ṭah deuh zawih zawih chang pawh a neih ngei ka ring. Pathian fapa inchhal a, Abrahama awm hma pawha awm tawh nia a han insawi phei kha chuan an deuhsawh dan tur leh, khawtlang pawhin mi pangngai lo leh â deuh roh ang te pawhin an chhuah maithei a ni. Synagogue-a thu a sawi hmasak ber ṭum phei kha chuan mipui khan thah hial an tum a nih kha. Chutiang khawpa hmuhsit leh endawng tuarin bul a rawn ṭan a ni a. Pathian fapa a ni a, Pathianin a ṭanpui reng alawm kan ti maithei; mahse, Pathian fapa a nihna kha a hun téah lo chuan Pathian pawhin a lantir lem lo. Mihring anga lo piang leh seilian a nihna kha lantir a tum ber a ni. Chutih laiin puithiamte khan a rawngbawl dan danglam tak leh huaisen taka anmahni a sawisel ṭhin chu an ngaithei hauh lo mai a. Amah man dan tur leh puhchhiat dan tur zawngin mite an fuihpawrh a, a chetchhiatna an cháng ràn bawk.

Isua rawngbawl chhung hun hrehawm dan tur kha ka ngaihtuah ṭhin; tu ma'n an lawm lo tih theih a ni a. Ama chhungte ngei pawhin an zahpui a, in lamah phei chuan an zilh fo ta ve ang. Khati khawpa lawm hlawh lo leh hmuhsit a nih pawh khan chhel takin a tuar a, Pa a hnaih tlat a, a ṭawngṭai reng a, huaisen takin a tih tur chu a ti mai a ni. Keini mihringte hi han inen chiang ta ila; lawm hlawh lova rawngbawl chu kan duh miah lo tluk a ni. Kan thusawite miin min fak deuh loh phei chuan kan hnual mai. Miin min sawisel deuh phei chuan kan khing uaih uaih reng mai a nih hi. Miin min lawma min chawimawi deuhna lovah phei chuan rawngbawl pawh hi kan duh vak mang lo. Rawngbawlnaah emaw, pawl hovah ni se a dinhmun ṭha deuh kan chan loh phei chuan kan lungawi lo va, kan hnual mai ṭhin. Chawimawi hmasak hi kan duh a, min chawimawi lotu deuh phei chu kan hmu tuihnai lo nghal deuh mai ṭhin.

Keini aia kan ṭhiante miten an lawm deuh leh an chawimawi deuh phei chuan kan na nghal deuh mai. Isua chuan, “Tu pawhin ka rawng a bawl chuan ani chu Pain a chawimawi ang,” (Johana.12:26) a ti a. Chawimawi hlawh tum ringawta rawngbawl erawh a tlo ngai lo. Hmuhsitna leh cheksawlna nena rawngbawlin, a tihtur a hlen dawn hnaiah Pathian chuan a chawimawi ta. Tu m'a khap theih loh khawpa mipuite rilru chu danglamin Jerusalem-ah chuan mi zawng zawng chawimawiin a awm ta a. Mite chuan an puan hialte a kalna tura phahin, Lal ang hiala chawimawi a hlawh ta mai a ni. Lal a nihna chu a hun takah tihlanin a awm a, Hosana Lalpa hming lo kal chu chawimawiin awm rawh se. Chungnung berah khian Hosana tiin mipui chu an aurual ta ṭhup ṭhup mai a ni. Juda mipuite khan Rome laka anmahni chhanchhuak tur niin an ngai a ni maithei a, duh ni se chuan mipuite kha a hruai kawi vek thei ngei ang.

Mipuite khan eng rilru pawh lo puin lo chawimawi pawh ni se la, Pathianin a tum ber chu chawimawi kha a ni. Lal a nihzia leh, roreltu a nihzia kha tihlanin a awm a, Rome sipai ho leh puithiamte pawh khan tihngaihna hre lovin an thlir ringawt a ni ngei ang. Kha'ng hunlaia au ring ring leh Lal a nih thu puangtute kha, krawsa khengbet tura a au ring ring pawh an ni leh maithei. A ropuina leh a nawmna thlahlel ringawta chawimawi a, a retheihna leh tuarna lo thlen huna phatsan leh ṭhin kan ni em? Isua hi kan thinlung taka Lalah I puang ang u. Mangan hun chiaha Pathian au va, nawmsakna huna phatsan leh si nun hi I kalsan ngam ang. Engtik lai pawhin, tuarna leh hmuhsitna karah pawh, ringlotute hual velna karah hian Isua hi kan nunah Lal ber rawh se. Kan rawngbawlna leh ama hminga kan thiltihte mite’n hriatthiam loh chang awm mah se, a hun takah chuan Lalpa'n min chawimawi dawn a ni.

Isua lalna nunah hi chuan mi dangte itsikna te, relchhiat duhnate a bova; mahni lam indah ṭhaa mi dangte tana malsawmna ni tura inpekna nun a ni. A lalna chang pha si lova ringtu nun neih hi a hlauhawm ber. Mahni lansarh duhnaah hi chuan Isua’n lalna a chang thei ngai lo. Isua lal ber lohna chhungkua pawh a tirin vul viau ṭhin mah se, a tawpah lungngaihna leh chhiatna a ni ṭhin. Kan thiamna leh finna, hausaknate hian kan nunah Isua lalna tur hi dal lo se la; "Isua hi Lal ber a ni, chungnung berah khian Hosana Lalpa hminga lo kal chu chawimawiin awm rawh se,” tiin kan ka mai ni lovin I au chhuak ang u.

- Reuben Lalnunthara Hnamte