MOTORCYCLE TOURISM

Mizoram hi tlang ram, khaw tin hi kawngpui tha takin a chhun tlang that loh a ni hlawm avang hian lirthei ke pali neih chi aiin ke hnih nei chi nena zin veivahna rem a nih zawk avang hian motorcycle tourism hi thil pawimawh tak a ni.

Motorcycle hian lirthei ke pahnih nei, engine nei tawh phawt chu a huam thei ang a, chumi hmanga tourism tihphuisui leh tihchangtlun chu kan ram tlang ram, ram mawi tak, thlir nuam em em tan hian a pawimawh hle mai.

Tourist hîp tur hian a hmun hi pawimawh ber a. Kan ram hian potential a nei tha kan ti thin a, hmân aṭang tawhin vawiin thleng hian a potential chu a ngai reng. Mahse, kawnghmang nei a kan kalpui loh avang hian tourism lamah kan la sang tawk lo hle a, awmze nei a kalpui erawh a hun hle.

Motorcycle tourist-te hian zin chhan a neih zingah leh motivate-tu ber zingah chuan a ram hmelhmang hriat châkna leh mawina hian a hîp ber a. A chhan dang lian lehzual deuhte chu–adventure te, hmun hlui tlawh châkna te, pipu sûlhnu leh culture hriat châkna te, ṭhiante tlawh te hi tourist-te hîp chhan lian zual deuh deuhte a ni. Heng bakah hian chhan dang la awm leh theite chu–chhungte tlawh te, thil thar hriat belh duh vang te, ṭhian siam duh vang te, intihthawvena khawpui traffic tâwt atanga kal chhuah hrim hrim (escapism) te leh chhan hrang hrang vang te a awm thei ang. Chutiang chhan hrang hrangte hmun khata kan lak khawm a, kan hip khawm theih nan event eng emaw remchang kan buatsaih hian remchanna zawngin an kal ta thin a ni.

Motorcycle tourist-te hi Mizoram chhung mi domestic tourist atanga bul ṭanin, ram dang leh ram pawn thlenga lo dawngsawng zel thei tura hmalak a pawimawh a. Tourist-te hian sum leh pai an rawn keng tlangpui a, sum theh chhuak thei tura zin veivak an nih avang hian an sum theh chhuah dawn thlêng tur siam thiam a pawimawh ta em em a ni.

Motorcycle rider-te hi tourism tihmasawntute an ni; a chhan chu, rider-te hi mi chi hrang hrang, eizawna hrang hrang, corporate executive, businessmen, technologist, enterpreneur, defence personnel, state leh central-a sorkar hna thawkte an ni hlawm a. Chungah chuan blogger, youtuber leh social media tam tak khawi vek an ni hlawm. FB, IG, etc ah friendlist/follower sang têl an nei deuh vek a. Entir nan han sawi ta ila, March 4-6 2026 hian Champhai Buffalo Motorcyle Club huaihawtin Zopuiphul, Samthangah Mizoram a Royal Enfield kutpui lian ber Mizoram Enfield Kûtpui (MEK) an thleng a, mi 500 chuangin an chhim a. State pawn aṭanga lo kalte hian an lo kalna hmun tin leh khaw tin an tlawhna apianga an thlalakte social media-a an pho chhuah khan mi nuai 10-20 velin an en ṭhin ang an ni. Chu lo liama tourism tihmasawntu an awm thei lo ang.

Nunphung hriat duh vang leh hmun hlui tlawh leh pi leh pu sûlhnu hmuh châkna eco-tourism te, tawnhriat neih tuma zin adventure tourism te hi motorcycle tourist rider-te hîpna ber leh thlir berte a ni kan ti thei ang.

Rider-te hi mimal (solo rider)-a zin an awm lain, kawppuite nena zin an awm bawk a. Riahna hmun remchang laia puan in kaiha riak an awm lain, ṭhenkhat homestay, farmstay, paying guest, hotel, etc. a thleng an awm bawk ṭhin a, insengso loin an kal ngai lo. Event eng emaw a awm khan, chu chu an focus a, an tinzawn bik ṭhin.

Kan ramah hian two wheeler awm zat hi lirthei zawng zawng registration atangin 70% aia tam a ni a. December ni 31, 2025 thlenga Mizorama lirthei register zat 3,45,914 zingah hian ke hnih (two wheeler) nei chi chu 2,46,865 a ni a. Heti khawpa two wheeler tam ta hi thuneitute hian kum tawp lamah emaw, Chapchar Kut hnaiah emaw hian Mizoram Bike Week emaw hi siam ta se; scooty, Honda, Bullet, Yamaha, etc theuhte pawl leh club ten thil ṭha tia charity leh thil dang an ti ṭhin kha Mizoram Bike Week chhung hian nei thin ta se. Chutiang huna hun hmang tura lo tel tum leh rawn hmu duh hrim hrim tourist hi kan hip lehzual ngawtin a rinawm.

A chunga kan sawi tak atang hian adventure tourism leh eco-tourism tihmasawn nan leh a lo changtlun theih nan motorcycle tourism hi a lo pawimawh hle mai.

- Crossa Kosbek