Ration card hi
Hman deuh Congress sawrkar term 2-na (2013-2018)-ah khan Aizawl Dawrpui pa tho kha Supply Minister a ni a. 'Tlema rethei lutuk lo deuhte hi chuan ration buhfaite hi la lo ngam ila, sawrkar kan chhawk zangkhai thei ang,' tih lam hawi khan a sawi a. Kei pawh ration card ka surrender ve daih a. Awmtheih vang ni lovin, kan chhungkua kan tlem a, buhfai thlei hman pawh kan awm lo va, Arham bag khat kha thla khat kan tla tho bawk nen, ration buhfai kan la ngai lo. Sawrkar hna thawk lovin keini chhung tlem deuh chuan buhfai leh chini tih vel retailer-ah la miah lovin ṭhangkhat lian chu kan khawsa ve ta.
Tun session-ah Supply Minister-in a department chan demand sawi hunah khan heti lam hawi deuh khan card var nei sawrkar hnathawkte buhfai kg 1 Rs 15-in an leitir thu Union Minister bulah kum 2024 vela a sawi ṭuma Central sawrkarin min hmuh dan a sawite ka ngaithla ve a. Card var neite’n kg 1 Rs 30-a an lei hnuah sawrkarin sum kum khatah cheng nuai 6,311 lai a hum theih tur hi a hlu hle. Tlema khawsak harsa lo, sawrkar hnathawkah pawh group B chin te, sumdawng hausa deuh leh ruling party hruaitu lawkte hi chuan ration card hi nei lo ngam ila, sawrkar kan pui viau a ni mai.
Kuhva fûn khat Rs 50 a ni a, ni khata fun hnih, Rs 100 man ei chhungkua kan tam viau ang. Kuhva 100 man ni tin ei chhungkua hian thla khatah Rs 3,000 lai kuhva mai maiah kan seng. Buhfai ṭha pangngai, Arham tih vel hi kg 25 bag Rs 1,200 man vel a ni a, bag hnih hi kan kuhva thla khat ei man lek a nia, a na lo hle.
Ration card surrender thei tur hian sawrkarin tih ve tur a nei. Identification proof nan leh sawrkar document pawimawhah a hmang tlat a. Ration card aiah voter ID te, Aadhaar card te, residential certificate te, VC lel LC ten an hriatpuinate hi hmang ila, mi tam tak ration card mamawhna hi a bo ang. Tlema awm thei deuh hian ration card neih loh hi intihhmuh ila, sawrkar kan pui a ni mai. A thlawn emaw, a man tlawm uchuaka thil neih hi tum lutuk lo ila. Chhung rual deuh tan pawh kohhran hmeichhiain buhfaiṭham an hralh lei phei chuan dawra buhfai lei bawkin ration buhfai lak loh hian a awm theih viau a ni.
Tichuan, MUHCS-ah in register ka tum a, ration card neih a ngai tlat. Hengte hi alternative siam ila, a nih loh chuan ṭul vak lovah ration card siamtir leh nge nge kan ngai dawn tihna em ni. Ration card hi family declaration atana hman a ni ve tlat a, MUCHS hi family anga inziah luh a ni. Hei vang hian ration card hi thil dangah pawh document atana hmanna a lo awm ve zêl avangin; card eng (BPL), card pawl (AAY) leh card var (APL) a tam zawk sorkar hnathawk, tih lovah hian document ngawr ngawra hmang duhte tan khan ‘Not Entitled for Ration (NER) Card’ a neih theih ta.
NER card chu ration buhfai la lo (APL card hmang) sorkar hnathawkte chuan ration card chu document pawimawh tak (address proof, etc.) atana an hman theih nan NER card an dil thei a ni. Hetiang card hian ration buhfai a huam lo a, mahni ration card hman lai NER Card-a thlak duhte tan FCSCA official website-ah online-in a dil theih a ni.
- Kj Jona