MIZORAM BUILDING & OTHER CONSTRUCTION WORKERS' WELFARE BOARD MEMBER-AH INZIAK LUT ZEL TEH U KHAI
Mizoram Building & Other Construction Workers' Welfare Board Member (MBO tiin kan sawi tawh ang)-ah hian lo inziak lut vek turin ka sawm a che u. A bik takin thingtlang tangin member ni thei ni si lo kan la tam tih chiang takin a lang. Nikum leh kumina budget session neih laia he MBO hnuaia sum tam lutuk chungchang sawi chhuah a nih khan Minister chhanna chu, "A hmang tangkai tu tur member tlem vang a ni" tih a ni. Hamthatna dawng thei tur ni si, member nih loh vanga dawng lo kan tam tih a lang chiang hle.
Member-te’n hamthatna an dawn theih, nau neih te, damdawi in awm te, an fate zirlai ṭanpuinate leh a dang dangte hi lo en ila:
1) NAU NEIH: Member hmeichhiate chu member an nih atanga nau an neihin Rs 10,000 an dawng thei. Fa pahnih an neih thleng a dawn theih.
2) PENSION: Member chu kum 60 a tlin hnuah pension tlatin Rs 1,000 a dawng ang. Pension la tur chuan kum thum chhung tal member a nih a ngai thung. Member pension la a boral chuan a nupui/pasal la dam hnenah 50% pension hi pek chhunzawm theih a ni.
3) RUALBANLO: Member chu kum 60 a tlin hmaa hliam emaw natna vang emaw a hnathawk thei tawh lo (disable certificate) nei a nih chuan pension thla tin Rs 1,000 a dawng ang a, a dinhmun a zirin Rs 1,00,000 thlenga tanpuina pek theih a ni.
4) THIH: Member chu a hanthawhna hmuna chetsual vanga boral a nih chuan Rs 3,00,000 thleng pek theih a ni. Chhan dang vanga bral an nih chuan Rs 1,00,000 pek theih an ni. Thla tin Rs 10 an lo dah tawh tlingkhawm kha pek let leh tur a ni bawk.
5) INVUINA: Member boralte chu an vuina senso Rs 5,000 pek theih an ni.
6) NUPUI/PASAL NEIH: Member kum khat tal lo ni tawhin nupui/pasal a neih chuan Rs 10,000 lawmpuina pek theih a ni. Member kum thum tal lo ni tawh fate pahnih tan nupui/pasal an neihin Rs 10,000 lawmpuina pek theih an ni.
7) DAM LOH: Member chu damdawi ina awm ngaia a dam loh chuan a luh ni atanga chhiarin ni tin Rs 1,000 zel a dawng thei ang. Rs 50,000 a pel tur a ni lo. Natna khirh bik a vei a nih chuan enkawlna senso Rs 1,00,000 pek theih a ni a, hei hian dam loh vanga hamthatna a dawn tur a dal chuang lo ang.
8) ZIRLAI: Member fate pahnih tan kum tin zirna senso hetiang hian pek theih a ni:
a) KG I atanga pawl 8–Rs 4,000
b) Pawl 8 atanga pawl 12–Rs 5,000
c) UG/Diploma/ITI/Politechnic – Rs 6,000
d) PG/Scholars/Researchers – Rs 20,000
9) ZIRLAI TI ṬHA: Member fate board exam-a top-10 an tlin chuan an fate pahnih thleng Rs 50,000 lawmpuina pek theih an ni. Distinction an pass chuan Rs 20,000 pek theih an ni bawk.
MBO member ni tur hian a pawl hmingin a sawi ang deuh khian in sak, lung lak, kawng laih, mistiri leh helper, thir deng thlengin a huam a. A bik takin mipa tan member nih a awlsam a. Member ni thei chin chu member ni vek turin ka duhsak em em che u a, member ni thei lo pui erawh nih tum lo thung ila.
Member ni tur hian sum sen ve erawh a ngai thung a. Member-te hian thla tin Rs 10 an pek ve a ngai a. A kum khatnaah registration ree Rs 25 chawi a ngai bawk. Member ni tur chuan kum khat fee Rs 120 leh registration fee Rs 25 pek lawk a ngai. Duh chuan kum 2/3/5 thlengin pawisa a pek lawk theih bawk. Kum khata atana pete chuan kum tin renew a ngai a, renew a nih loh chuan a chunga hamthatna kan sawi tam tak hi a dawn theih chuang loh.
Thingtlang mite engtin nge member kan nih ve theih ang, tih zawhna chu awlsam takin a chhan mai theih. In khuaa mi rintlak, office dawr kawnga rintlak, form fillup dan kawnghmang pawh hria (a tlangpuiin khaw tinin CSC kan nei a, chung CSC te chuan lo buaipui thei se a duhawm viau) te chu in khaw tana MBO agent-ah an ṭang ang a, anni kaltlang khan tul leh pawimawh hu in tifel zel ang. Mahse, agent-te khan buaipui man erawh an neih ve a ngai thung.
MBO hi India sawrkarin sawrkar hnathawk lo, mahni thiamna leh theihna kawng hrang hranga eizawngte tana hamthatna a siam a ni a. Mizoramah hian MBO hian chanchin ngaihnawm lo, sawi zui tlak loh a lo nei zauh zauh tawh a. He MBO enkawltu LESDE department-a thawkte hi an tangin an fimkhur tawh hle a, dik lo tak leh danin a phal lohva member an awm an hlau hle. Hetiang kawngah erawh chuan tupawh fimkhur tlang ila, dik tak leh felfai taka kan tih hian keimahni tan zel a ni.
Khaw hrang hranga MBO member ni thei, la ni ve si lo ten hamthatna an dawn theih reng dawng lova an awm hi ka uipui em em a. Kei hi kan khuaah hian agent-in ka awm a, kan khaw mi leh sate’n hamthatna an dawng a, an bank account-a pawisa a lo lut tih ka hriat hian ka lawmpui a, ka hlim em em thin. In khuain in lo la ti ve lo a nih chuan MBO-ah hian member lo ni ve lul teh u. Hre chiang duh in awm a nih chuan phone number ka dahah pawh hian min rawn zawt mai dawn nia; theih ang angin ka lo pui dawn che u nia.
- Madawnga Khiangte, Rulchawm, Ph–9862360110