MIZORAM UNIVERSAL HEALTHCARE SCHEME (MUHCS) LEH KEIMAH

Mizoram healthcare scheme thar MUHCS hi la hrechiang lo kan la awm nual avang leh, phaia zuk hmangtu ngei ka nih avang hian, hrechiang duha min zawttu an tam viau mai a, hrechiang duh leh a mamawhte tan kan rawn thailang ve a nge.

Tawi kim siin a pawimawh lai sawi tum ta ila. Lung natna nei ka nih avang hian phaia refer ngai sa ka ni a, amaherawh chu sum harsatna leh eng eng emaw avangin kum 2018 atang tawh khan refer dil lovin Mizoramah ka inenkawl a ngai a.

Mizoram sorkar tharin healthcare scheme thar (cashless) an duang chhuak tih ka hriatin ka ngaihven hle a, a booklet te dilin ka zirchiang a, tha ka ti hle mai a. Cashless hmang hian sum seng tam lovin ka inenkawl thei dawn tih ka hriatin, civil beneficiaries ah ka inziak lut ve ta a ni.

Kolkata Birla Hospital -ah ka refer dilna chu pawmin refer ka ni a, (refer dil dan hi dil dan pangai ang a ni) tichuan MUHCS refer form a ka hming chuanna chu kengin kan chhuk thla ve ta a ni.

He form hi appointment te kan lak hnuin doctor kan hmuh a, reception counter ah kan kalpui leh hnuin awlsam tein admit ka ni a. Private ward zan khata room cheng 4,500 manah min zai hma leh zai hnu karkhat chhung ka awm a. Hetianga room nuam leh changtlung, khum te lah chu japan siam, electronic automatic control vek, nursing care tha bawk si, Bill chawi tur lam enghelh nei miah lova thlamuang taka mut chu mut a tui duh khawp mai. Kan Sorkar hian engtinnge thawhpuia an zuk siam theih zawk aw ka ti hial.

Billing leh discharge ah lut nghal mai ang. Ka chhuah a lo huna counter ah discharge lehkha min kalpuitu ten an va la a, "KA AIAWH LAL HMAAH A DING, KA HMING A KUTAH A CHUANG E" tih ang mai khan, MUHCS refer lehkhaa ka hming chuang kalh avang khan, sum cheng khatmah sen ngai lo leh sawi buai leh chuan tur awm miah lovin, ka chuanna tur motor thlengin, wheelchair-in dim taka min nawr chhuakin, kan chhuak fel chu a ni der mai. Cashless nge nge a va thawventhlak em.

Keini mi harsate tan hian he Healthcare scheme hlut zia hi ka chiang khawp mai a. Ka lunga thisen zam pahnih hi 100% in a lo in-block tawh a, pakhat hi 80% lai a lo in-block hman tawh bawk a, mahni sum neih hun nghak ta ila, a chhe ber ka thleng ang nge thleng lo ang tih hi ka ngaihtuahna luah fo tu a la ni.

Hetiang anga scheme tha kan sawrkarin a duang chhuak hi, a tangkai thei ang berin chhawr i tum theuh ang u.

Health Minister leh Chief Minister te in thawhrimna Lalpan malsawm zel rawh se.

Note: Discharge tawh hnu hian, in checkup leh hma thla hnih vel ei tur damdawi, mahni pawisaa lei a ngai. Hei hi tam tham ni lo mah se discharge hma hian bill ah telh ni thei se, a la lawmawm lehzual ngei ang. Tin, Damlo ten house ah room leh khum te kan chang lo nasa khawp mai a, MNF sorkarin Ballygunge Mizoram House an lo hralh tak kha neih let leh dan a la awm thei mial em le? A nih loh pawhin a dang neih leh dan a la awm thei em? damlo refer hi MUHCS avang hian kan pun belh zel a rinawm si a.

- J. Lalthlengliana (Tetea, J&J)