AMC Bihchianna
State dang khawpui angin Mizoram khawpui ber Aizawl pawh mahni inrelbawl turin khawpui sawrkar Municipal chu kum 15 kal ta khan kan nei tan a, AMC inthlan hmasa ber kha November ni 10, 2010 ah kan nei a nih kha.
AMC ward then dan tlangpui:
Municipal ward te hi 19 lai kan neih vang leh number a then an nih vang hian mahni ward bak chu veng dang ward number leh a huamchin inhriatsak hi a har angreng a. A tlangpuiin, MLA bial khat hi ward hnihah an then a, hmun thenkhat laiah erawh chuan MLA bial khat ni lo pawh Ward khata awmkhawmna a awm zauh zauh.
Ward hrang hrang hi an huam chhung veng pahnih/khat zel nen han tarlang hmasa ila, (a huam chhung veng zawng zawng erawh hmun a luah tam dawn vangin tarlang vek lo mai ila)
Ward no.1 (Durtlang, Zuangtui, etc)
Ward no.2 (Chaltlang, Bawngkawn)
Ward no.3 (Ramhlun, Laipuitlang, etc)
Ward no.4 (Ramhlun S, Ramthar)
Ward no.5 (Chanmari, Electric)
Ward no.6 (Chanmari W, Hunthar)
Ward no.7 (Zemabawk, Falkland)
Ward no.8 (Armed Veng, Chite)
Ward no.9 (Dawrpui, Saron)
Ward no.10 (Chawnpui, Zotlang)
Ward no.11 (Lungmual, Tanhril)
Ward no.12 (Tuikual, Dinthar)
Wardno.13 (Vaivakawn,Kanan)
Ward no.14 (Khatla, Mission Vengthlang)
Ward no.15 (Bungkawn, Maubawk)
Ward no.16 (College Veng, Bethlehem)
Ward no.17 (Venghlui, Republic)
Ward no.18 (Mission Veng, Salem, Thakthing)
Ward no.19 (Kulikawn, Tlangnuam)
AMC hmasa ber
AMC hmasa berah khan khatih laia state a rorellai MLA 32 nei, kum 2 chauh la sawrkar Congress party leh MLA pahnih nei ZNP te kha an tangdun a, Ward 5 ve ve lain; MNF in 5, MPC in 4 an la a.
Congress leh ZNP tangdun khan sawrkarna an siam a, Municipal Council Chairman hmasa berah Pu CT Zakhuma, Congress kha dah a ni a. A bultanna a ni bawk a, sawrkar leh Chairman pawh an inthlak dawn zak zak a nih kha.
Hmeichhe tana reserve seat reserve hi Ward zawng zawng hmun thuma thena hmun khat (one-third) tur a ni a, chu chu ward 6 zel dah a ni. A hmasa berah khan ward no. 2, 4, 6, 11, 12 leh 17 te kha hmeichhe tana dah an ni a. Congress, MNF leh ZNP te khan seat 2 theuh an la.
AMC vawihnihna
AMC vawihnihna kha November ni 26, 2015 ah thlan a ni a. Congress leh MPC te an thawk ho ve thung a. MNF in party malin Ward 11 lain sawrkarna an siam a. Congress in seat 7 an la a, MPC in seat 1.
AMC vawihnihnaa hmeichhe ward reserve te chu ward no. 1, 7, 9, 13, 15 leh 18 te an ni. Congress party in hmeichhe ward 6 awmah 5 an la a; MNF in ward no. 9 ah Pi Lalawmpuii an nei thung.
December ni 10 ah AMC sawrkar lakluh niin Pu PC Lalhmingnawia, MNF, Ward no. 8 atanga tling chu AMC Mayor hmasa ber atan lakluh a ni.
Kum 2015 khan Aizawl khawpui chu mihring cheng nuai 3 aia tam a nih tawh avangin Aizawl Municipal Council chu Corporation ah hlankai a ni a, AMC Chairman pawh Mayor tia thlakin, Vice Chairman pawh Dy. Mayor ni tawhin sawrkar lam atanga enkawltu officer- Chief Executive Officer tih pawh Municipal Commissioner tih a lo ni ta a. Kum 2022 October ah AMC rorelna sang berin Councillor tih hming pawh Corporator tiin a thlak leh ta a ni.
AMC vawi thumna
AMC vawihnihna kha 2020 December ah term tawp mahse Covid hrileng vangin inthlan hun sawn hlat hret a ni a. AMC election vawi 3-naah hian voters 2,18,870 an awm. February ni 16, 2021 ah inthlan niin February ni 18 ah vote chhiar a ni. A tum thumnaah hian party tangho awm lovin Congress, ZPM leh MNF te an mal din theuh a.
MNF sawrkar laiin seat 11 bawk la lehin, an sawrkar nawn leh a. ZPM in seat 6 lain, Congress in seat 2 an la thung.
A term hnihnaah Congress in Hmeichhe ward 5 lai an la ang khan ZPM lamin Hmeichhe ward 5 lai an la ve thung a. Ward no. 10 ah Pi Chuauzikpuii, MNF a tling thung. Pu Lalrinenga Sailo, MNF ward no. 1 atanga tling chu Mayor a ni.
A term thumnaah hi chuan hmeichhe lam pawh an lo tlangnel ta deuh a. An bial General ward ah dah tawh mahse ward no. 9 ah Pi Lalawmpuii, MNF leh ward no. 15 ah Pi Zodingpuii Congress te ding nawnin, an tling nawn ve ve a. AMC vawithum naah hian hmeichhia 8 lai an awm ta nghe nghe a ni.
Term laklawh laiin ward no. 19 Corporator Baryl Vanneihsangi, ZPM chu MLA a nih tak avangin bye election neih a ni a. Dr.C. Malsawmtluangi, ZPM chu a tling.
Ward no. 6 corporator nilai Pu John Zosangliana Ralte, MNF a thih vangin bye election neih a ni bawk a, Pu H. Lalremtluanga, ZPM a tling leh a, ZPM in seat 1 neih belh mahse MNF lam hi 10 an la nih tho avangin sawrkarna a danglam chuang lo.
2026 AMC inthlan tur thlir lawkna lam
Tun AMC term hi March ni 1, 2026 ah a tawp dawn a. Nakum kum bul lamah kan inthlang dawn tih a chiang a, a hun tak erawh ruat a la ni lova. Final roll pawh January 2026 ah chhuah beisei a ni.
May ni 30, 2025 khan reserve seat (hmeichhe ward) tur siam fel a ni daih tawh a.
Ward no 2 (Bawngkawn, Chaltlang, etc)
Ward no 4 (Ramhlun, Ramthar)
Ward no 5 (Chanmari, Electric etc)
Ward no 11 (Luangmual, Chawlhhmun, etc)
Ward no 12 (Tuikual, Dinthar)
Ward no 17 (Republic, Venghlui, etc) te an ni.
ZPM party hi corporator an neih 7 zinga 5 te hi reserve seat atanga tling an nih vangin, hmeichhe ward hi sawn zel a nih bawk si avangin an ding leh vek dawn em tih a chiang lova. Chutih rualin, AMC vawithumnaah pawh Hmeichhe ward atanga tling, reserve seat ni tawh lo, general ward a mipa nen inkhing pawh pahnih lai an tling kan tih tawh kha, chuvangin hnathawk tha leh bial tana tha chu mipa leh hmeichhia, gender lamin kawngro a su vak lo tih chu kan experience mek tawh a, an ward reserve ni tawh lo mahse ding lo tura lo ngaih ngawt chi chu a ni lo maithei.
MNF lam pawh hi hmeichhe seat atan reserve zingah ward no. 5 tih loh ward dang 5 hi an mipa corporator te bial a nih vek vangin an bial ngai an ding thei dawn lova, an insawn dawn nge, an chawl zawk dawn tih chu hriat a ni lo.
AMC hi chu MLA anga, chumi bialah chuan chu mi te party chu an tha tih theih chiah pawh a ni lova, hmeichhe seat sawn kual zel a ni bawk nen, a ngai tlin reng theih a nih lohna lai a awm a. Ward no. 5 atanga tling Pu Rosiamngheta hi vawi thum tling zawn awmchhun a ni, a hmasa ber MPC in, a dawt pahnih Congress in. Tunah erawh a ward hi hmeichhe ward la ni miah lo awmchhun anih vangin reserve seat ah a lut ve ta a, bial dangah a insawn dawn nge?
Hetiang a nih vang hian, Party tan pawh AMC inthlan dawn apiangin candidate set uluk a ngaiin, a ngai rin mai tur an tam lo thin. A mihring an pawimawh viau bakah candidate te chenna veng pawhin awmzia a nei thui hle. Veng pakhat atanga party pahnih emaw ten candidate an neih chuan veng mal pakhat atanga candidate pakhat chauh awm te khan advantage an nei duh a. Veng lian deuh vote tamna leh veng te deuh vote tlemna atanga candidate te pawhin awmzia a nei thui thei hle.
Heng bakah hian a hma lama councillor/corporator lo nei thei deuh leh la nei ve miah lo veng te pawhin tun tumah chuan candidate set kawngah awmzia a nei tel theiin a rinawm.
AMC kum 15 kan neih tawhah MNF hi kum 10 lai an sawrkar ta a. Tuna Congress aia an ruhrel len zawk nachhan pawh hi khawpui Block leh Unit lam tihnun reng theihna, party inhlawhna engemaw chen Municipal sawrkar atanga an insiam theih vang pakhat hi a nih a rinawm.
Aizawl Municipal Corporation (AMC) kum 2025-26 budget estimate hi lo thlir thuak ila, budget estimates atan cheng vbc (vaibelchhe) 112.17 pharh a ni. He budget hman tura ruahman zawng zawng aṭanga 79.83% chu hmasawnna hna (development work) thawhna atan dah a ni.
Budget Ruahmanna Tlangpui (2025-26) chu:
Total Budget Estimate: cheng vbc 112.17
Hmasawnna Hna: 79.83%
Corporator leh Thawktute Hlawh: 13.79%
Local Council Lawmman: cheng nuai 122
AMC sum hnar lian ber chu 15th Finance Commission grant a ni a, state sorkar leh AMC-in mahni sum hnar (Own Source of Revenue) aṭangin sum hmuh belh a ni bawk.
Hmasawnna hnathawh tur 79 percent lai atang khian sawrkar lai party chuan mahni block leh unit an duhsak theih dan tur chu kan hrethiam mai awm e.
State sawrkar nena kawprem taka thawk duh thei tur AMC khawpui sawrkar tha tak siam ngei turin theih tawp kan chhuah a ngai. MNF in kum 10 lai an enkawl tawhnaah hian hmasawn lo tawp chu kan ni lovang a, hei aia nasa zawk leh tha zawk Municipal sawrkar nei tur chuan kan MLA/Minister te nena inkawp rem, policy thuhmun hnuaia awm, inlungrual tlang ngei ni thei se, a tha berin a rinawm.
- Hruaia Kawlni