World Optometry Day

“World Optometry Day” hi kum tin March ni 23-ah hman ṭhin a ni a. Mizoramah pawh he ni hi kan lo hmang ve tawh ṭhin a. Vawiin, a champha a lo thlen hian hemi puala programme buatsaih a nih mai bakah, chiang deuh zawka hemi chungchang hi mipuite'n kan hriat nan leh kan ṭangkaipui ngei beisei chungin he thu hi ka rawn ziak a ni.

Govt. of India in The National Commission for Allied and Healthcare Professions Act, 2021 chu March 28, 2021 khan a chhuah a, (ref. The Gazette of India Extraordinary, CGDL-E2803202-226213) he Act hnuai ah hian recognised Profession’s category 10-a dah a ni.

Optometrist bik hi Healthcare Professions category hnuaiah awmin, Schedule S/No. 5 (ISCO Code 2267) ah dah a ni. Thiamnaah pawh a minimum of four years of Baccalaureate degree tih a ni. A tawi zawngin Optometrist te chu Eye care Professionals tiin sawi ila a fiah mai awm e.

Optometry chu mit (eye) lam kaihhnawih harsatna endik leh a ṭhat lohna lai hmu chhuak a, a ṭul anga tidik thei tura thiamna neih hi a ni. A bikin heng Refraction (tarmit chawh), Contact lens chawh, mit exercise hmanga ngai awhtir te, mit pressure sang (Glaucoma), zun thlum vanga mit ṭha lo (Diabetic retinopathy), BP sang vanga mit ṭha lo (Hypertensive retinopathy), mit lam natna leh a kaihnawih te hmuchhuaka a ṭul anga enkawl leh Ophthalmologist (Mit Doctor) hnen emaw, hmunpui zawka thawn (refer) hi a ni. Mit lama harsatna hrang hrang thlen theitu laka mipuite ṭanpuitu pawimawh tak leh thurawn petute an ni bawk.

Mit hrisel ṭha nei tura mit entir hi thla 6 danah tal Optometrist/Ophthalmologist hnenah ngei check-tir ṭhin a pawimawh. Tarmit leh contact lens chawh mai bakah, mit hrisel lohna hrang hrang naupan laia inṭan fo thin, mit ṭhat lohna Amblyopia (Lazy Eye) vison therapy hmanga enkawl te, mit naute paw (Cataract) zai zawh hnu leh hma endik te, mit khinghnih a ruala khawhmuh fiah lo (Binocular vision disorder) avanga harsatna nei, binocular vision therapy hrang hrang hmanga enkawl te, mit tih pem palh avanga mita ser (scar) awm, tarmit nen pawha khaw hmuh fiah thei tawh lo Special contact lens leh, Scleral contact lens (RGP) hmanga fiah leh thei tura ṭanpui te, tarmit leh zai pawha khaw hmuh fiah theih tawh lo (Low Vision) natna nei te tan pawha Low vision Aids (Optical and Non-optical aids) hmanga ṭanpui te, Orthokeratology contact lens hmanga tarmit vuah ngai lo tura enkawlte leh mit hrisel tak nei thei tura ṭanpui theitu che an ni.

World Optometry Day pual hian khawvel puma Optometrist Association te, Ophthalmologist te leh Healthcare Professional-ten hnathawhna hrang hrang an buatsaih ṭhin a, chu'ngte chu:

• Thingtlang leh hmun hla taka Eye screening camp a thlawna neih te.

• Mit hriselna chungchanga mipui hnena Seminar leh awareness campaign neih te.

• Optometry professional-te tana zirna chhunzawm zel tur programme buatsaih.

• Mit hriselna pawimawhzia thehdarh tura social media a hmalak.

• Vantlanga mi rethei leh harsa zawkte mit enkawlna tura sum thawhkhawm etc.

Optometrist lamah hmasawnna awm mah se, khawvel puma mi maktaduai tam tak chuan mit enkawlna an dawn tlem avangin ven theih lovin mit del phah an la awm reng a ni. Sum leh pai lama harsatna te, a nachang hriat loh avangte leh healthcare/eyecare la changtlung lohna avanga thlengte a ni fo. World Optometry Day hian heng harsatnate sutkian nan leh mi zawng zawngin an awmhmun emaw, an sum leh pai dinhmun emaw pawh ni se, mit enkawlna ṭha tak an dawn theih nan hmalak hi a tum ber a ni.

Optometrist zirchhuak tawh tam zawk hi Private Hospital, clinic leh Optical shop (tarmit dawr) ah te an thawk deuh ber a (mahnia Optical clinic neih pawh an awm nual tawh), Mizoram pawn lama Eye Hospital lian leh Company lian a thawk pawh an awm nual bawk.

Mipuite pawhin Optometrist te hi a ṭha thei ang berin chhawr tum ila, Doctor rawn kher lova tarmit kan duh a nih pawhin heng thiamna bik nei Optometrist-in an ṭhutchilh tarmit dawr (Optical shop) emaw, Optometrist clinic pan hi a finthlak ber a, tarmit mamawh vanga mit fiah loh piah lamah harsatna awm thei laka inven dan te, tarmit inchawh mai piah lamah mit fiah loh chhan leh mit lam natnate an hriatsak thei dawn che a, a ṭul anga mi thiam zawk Ophthalmologist (mit doctor) rawn turin an refer thei bawk a ni.

Hetiang taka mipuite tana ṭangkai an nih avang hian mipuite pawhin Optometrist te nihna leh an hnathawhte kan hriat a, a hun taka a mamawhtute'n an pan theih tura awm an nih hi kan hriat thar leh a ṭul hle a ni.

- Joseph Lalhmingsanga Hrahsel, Clinical Optometrist (Comprehensive), RIPANS Hospital