TU NGE ZORAM HMANGAIH ANG?

Ram hruaitu chuan ram a hmangaihna te, a duhsakna te, ram tan ṭhahnem a ngaihnate chu a thinlungah a dah ngheh tlat chuan, chu chuan ram a kaihhruaina tha chu a thil tihah a rawn lan chhuahtir thin.

Ram tana thil ṭha a ngaihtuahnate chu chapona avanga lansarh leh lan mawi duhna te, duhamna avanga mahni hmasialna te, ram hmangaihna tak tel lova dikna palzutna te chuan a hliahkhuhtir hlauh si chuan, chumi rorelna hnuaiah chuan ram hmasawnna hmuh tur a awm ngai lo.

Ram hruaitu kum rei tak lo ni tawhte chuan an thil tihte chu ram dinhmunah hian darthlalang anga an inen let a tulin a hun ta hle mai. Kan ram hian ram tana thil tha leh thil tha lo titute thil tih chu thup theih miah lovin a rawn her chhuahpui zel mai si a.

Ram mipuite hian ram hruaitute thil tha tihte chu khawiah hian nge a awm, a ngêlnghet em, tiin an thlir reng che asin. Ram rorelna sangah, ram mipuite mithmuhah, ram hruaitute’n mahni thil tih chhuangin, an inhnial vak mai ṭhin hi chu a zahthlakin thlir pawh a nuam lo hial thin asin.

Kan ram hi ‘LALPA hruai kan ni’ kan intih si chuan, LALPA chuan chapona a haw si a, chuvangin, tlawmna nun nen ram hruaitute’n bul an ṭan ṭhat leh a tul ta hle mai.

Ram hmangaihtu miziaah chuan ṭawng tam lova hna thawh mawlh mawlh (work more talkless) te, mite thil tih ṭhat lawmpui thiam te, mahni thil tih ṭhatte ram hmel lo lan hun atana dah ṭhat thin te, sum lo kal îtna thinlung ata nun inseam ṭhatna te an awm a. Hengte hi ram hruaituin a neih theih loh chuan ram hruaina ata lo châwl tawh mai se, tih hi tunlai ṭhangtharte duh dan a ni ta.

- H. Neihchungnunga, Durtlang