Mizo hmeichhia politician MLA awm chhoh dan
Mizo District Council hmasa berah khan Pi Lalziki Sailo kha ṭangrual khan an nominated seat an pe a.
Chumi zawh term dawtah khan Pi Maria Hmingliani, President, Mizo Hmeichhe Ṭangrual kha nominated pek a ni ve leh a.
U.T. kan nih hnua MLA general election kan neih hmasak ber April 18, 1972 ah khan tu party mahin hmeichhia an candidate lova, Independent erawh chuan 2 an awm mah se an tling lo ve ve.
Mizo Union sorkarna siam te khan Pi Saptawni kha ruat seat in an awmtir a, hmeichhe MLA hmasa ber a ni ta.
MLA inthlanpui 2-na 1978 May ni 17 leh 20 a neihah khan P.C. ticket in Serchhip bial aṭangin Pi Thanmawii kha a tling a. Ruat seat ni lo, thlan pangngai a hmeichhe MLA hmasa ber a ni ve leh ta a ni. Mahse kha sorkar kha a buai a; thla 6 chiah a sorkar ta a.
Kum 1979 April ah inthlanpui neih ṭhat a ni leh a, tah chuan Pi Thanmawii bawk kha Aizawl East constituency ah a tling leh a. P.C. bawk an sorkar leh a.
P.C. sorkar chuan Pi K.Thansiami kha ruat seat ah an dah a, Pi Saptawni (1972) hnuah hmeichhe ruat seat leh hmasa ber niin kha sorkar Assembly House ah khan hmeichhe 2 an awm ta a ni.
Inthlanpui vawi 4-na chu April ni 25, 1984 ah neih a ni leh a. Congress an sorkar a, Pi Rokungi chu ruat seat ah dah a ni ve leh ta a. A term erawh remna sign avangin a hmang tluan ta lo.
State MLA inthlanpui hmasa ber February ni 2, 1987 a neihah Pi Lalhlimpuii chu MNF ticket a tlingin hmeichhe Minister hmasa ber a ni ta.
Chuta tang chuan rei tak Assembly House ah Hmeichhia an awm loh hnuin, kum 2014 ah Hrangturzo bial By election ah Nl. Vanlalawmpuii Chawngthu kan hmu leh ta a, term tawp lamah Minister of state ah dah niin Mizo nula Minister hmasa ber a ni ta.
Term khat hmeichhia tel lova Assembly House a awm hnuin kum 2023 ah chuan hmeichhia 3 ngawt mai an rawn tling a. House ah hmeichhe member awm tam ber ṭum a ni ta a. Pi Rinpuii phei chu hmeichhia minister 2 lo awm tawh ṭhin mah se Cabinet Minister ni thei hmasa ber hmeichhiaah chuan a lo ni ta.
Tichuan Mizo District Council hunlai in MDC hmeichhe pahnih
1. Pi Lalziki Sailo–MDC
2. Pi Maria Hmingliani–MDC
UT chin MLA kan neih theih hnuah hmeichhia MLA-te:
1. Pi Saptawni (ruat seat/nominated)
2. Pi Thanmawii (elected)
3. Pi K. Thansiami (ruat seat/nominate)
4. Pi Rokungi (ruat seat/nominated)
5. Pi Lalhlimpuii (elected)
6. Nl. Vanlalawmpuii Chawngthu (elected)
7. Pi Lalrinpuii (elected)
8. Pi Prova Chakma (elected)
9. Nl. Baryl Vanneihsangi (elected)
Tihian an zavaiin Mizoram rorelna sang berah Mizo hmeichhia 11 (pahnih District Council hun lai MDC leh, pakua chu UT/state hnuah MLA) kan nei tawh a ni.
- Hruaia Kawlni