Politics-a Kristiante mawhphurhna

Khawvela Kristian tamtak te hian tun hma aṭangin Kohhran hi politics-ah hian inrawlh ve lo tura ngaihna lian tak a nei a, kan inrawlh hreh hle ṭhin bawk. Mizoramah pawh Kohhran Upa, Pastor Pension adt te Politics khawvela an luh hian mipui rilru hi a dam zan lo ṭhin a, kan ram inrelbawlna chu Politician lo ni tawh sa te kutah kan dah ṭhin.

Tin, Rom 13–ah khan roreltute hi Pathian ruat an nih thu leh an thu thu a awm tur a tih kan nih thu kan hmu a, chuvang te pawh chuan a ni maithei – Kohhran hian kan ram hruaitute langsar taka sawisel hi kan ti em em lo a, sorkar hi kan nawr ngai lem lo bawk. Mahse bâwih ang maia roreltu dik lo te laka kun tur hian Pathianin min ko lo tih kan hriat a ṭul awm e.

Charles Finney, evangelist ropui tak chuan kum 1800 velah daih tawh khan Kohhran hi politics-ah thil dik tak ti turin kut a thawh tur a ni tiin a sawi a. Politics chu rawngbawlna peng pakhat anga ngaihtur a nih thu leh, Pathian hnena ramin malsawmna leh anchhia a dawnna tur pawh hi Kohhran te’n ram rolrelnaah an inrawlh dan dik leh dik loah a innghat a ni tiin a sawi a, a pawmawm hle.

Politics hrim hrimah hian Pathian hi a inrawlh thukin a inrawlh hma hle a.Thuthlung Hlui Exodus aṭang daih tawhin Pathianin Mosia hnenah Israel mipuite kaihruai turin dan (Thusawm Pek) a pe tih kan hre awm e. Tin, Numbers-ah te pawh an aiawh thlang turin Pathianin Israel fate rem a ruatsak tih kan hmu a ni. Lalte bu hnihah hian roreltu ṭha leh sual inkar hlatzia chu kan hre thei ang a, roreltu ṭha loin ram leh hnam a tihchhiat nasatzia kan hmu ang. Josepha leh Daniela te pawh ram inrelbawlnaah chanvo pawimawh tak an chelh a ni tih kan hre awm e.

Thuthlung Thar lamah pawh Lal Isua rawngbawlna kan hmu a, chu chu Sap ṭawngin ‘Holistic Ministry’ an ti a. A awmzia ber chu Lal Isua hian thlarau chauh chhandamna ni loin rilru taksa, ram leh hnam tana chhandamna thlen turin khawvelah a lo kal a ni. Chuvangin Lal Isua hnungzuitu keini Kristiante hian ram inrelbawlna – politics-ah hian tihtur leh mawphurhna kan nei a ni. Matthaia 5:13 ah Lal Isua’n lei chi kan nih thu min hrilh a. Hei hian a sawi tum pakhat chu kohhran rawngbawlnaah chauh ni lo kan khawtlang leh ram tan pawha mi ṭangkai ni turin min duh a ni.

Politics hi Kristian kan nih avangin kan pumpelh thei lo a. Chu chu Tirhkoh Paula pawh khan a lo hre chiang em em a. Timothea hnena lehkha a thawn vawi khatna 2:1-2 ah pawh khan lal ber leh thuneitu zawng zawng pawh ṭawngṭaisak turin min chah a nih kha. Sorkar hi dik taka a kal chuan khawvelah hian Pathian ram hlimthla hi a din theih a ni.

Kristian kan nih anga kan mawhphurhna hi kan ram rorelnaah hian kan hlen ṭha tawk lo tih chu a hrechiang bertute kan nih a rinawm. Kan ram hruaitute leh a thlangtu mipuite hi Politics khawvelah hian Kristian kan nihna hi a bo ta daih emaw tih turin kan khawsa ṭhin a, a pawi hle. Ram leh hnam tana roreltu nih hi Pathian ruat leh Pathian rawngbawlna a ni tih kan hriat chian a ngai takzet a ni.

Kum 2026 Mizoram Synod Puitling Sunday School Zirlaibuah pawh 'Kristiante leh Ram Rorelna', Rev Dr. H. Lalrinthanga ziah kan zir mek a nih hi. Hei hian rah ṭha chhuah se la. Ram rorelnaah hian Kristian kan nihna zawnah pawh mawhphurhna leh tihtur tam tak kan nei a ni tih Kohhrante hian hrechiang lehzual ila. Hriat mai duh tawk loin a theih chin chinah pawh kan ram ṭhatna turin hma la zel ila, a ṭha hle ang.

Lal Isua rawngbawlna –holistic mission- chhunzawm zel tura koh leh ruat kan nih angin kan ram hi tisa leh thlaraua chhamdamna a chan theih nan nang leh, kei hi missionary pawimawh ber kan ni tih hriain chu rilru pu chuan kan ram politics hi i buaipui zel teh ang u.

- Rinfela Zadeng